قصة حب وألم كاملة

قصة حب وألم

الحلقة الأولي

بصت فريده من شباك الطياره والدموع ماليه عينيها و مش راضيه تنزل عشان هي قررت مش هتعيط تاني ابدا مهما حصل وافتكرت آخر مره عيطت كان يوم موت مامتها في المستشفى وازاي هي وباباها حضنوا بعض جامد و فات سنتين على موت مامتها و وانهارده هي راجعه مصر بعد عشر سنين عاشتهم مع باباها ومامتها في المانيا و دلوقتي راجعه تعيش مع عمتها سلوى بعد موت باباها في حادثه من اسبوع وافتكرت كل اللي حصل:

كانت قاعده بتذاكر عشان هتقدم في الجامعه ورن جرس التليفون وجالها خبر وصول باباها للمستشفى بعد ما عمل حادثه وجريت بسرعه ركبت تاكسي وراحت المستشفى وقالولها الخبر ان باباها مات….مات من غير ما تودعه….مات آخر حد ليها في الدنيا ولقيت محامي باباها بيطبطب عليها وبيحاول يسكتها وهي مش مستوعبه اللي بيحصل ولأنها لسه عندها 16 سنه المحامي بلغها انها لازم ترجع تعيش في مصر وانه بعت ايميل لابن عمتها آدم وهو رحب بانها تيجي تعيش معاه هو ووالدته في مصر وهيستناها في المطار بعد اسبوع من دلوقتي وهيبعت التذكره على مكتبه .

فات الاسبوع ده عليها كأنه سنه وفضلت عند المحامي في بيته مع مراته واولاده لغاية يوم السفر وصلها لغاية المطار وقالها انه هيصفي اعمال باباها وهيبعت كل التفاصيل لابن عمتها على الايميل بتاعه وركبت فريده الطياره وبصت آخر بظره على المانيا بلد مامتها اللي قضت فيها احلى ايام حياتها وهي مش فاكره عمتها ولا ابن عمتها آدم خالص بس باباها كان دايما يتكلم عن اخته الكبيره سلوى بحب وحنان وكان دايما يقولها لازم في يوم هنرجع مصر بلدنا بس للأسف رجعت لوحدها………………..…..

المضيفه طلبت من الركاب ربط حزام الامان عشان الطياره هتنزل مطار القاهره وحست فريده ان قلبها بيدق من الخوف ومش عارفه ايه اللي هيحصلها في مصر و عمتها هتعاملها ازاي و نزلت فريده من الطياره و خلصت اجراءتها بسرعه عشان معاها جواز سفر الماني وراحت تستنى شنطتها وكان شكلها ملفت عشان كانت طويله وبشرتها بيضا وعينيها عسلي فاتح وشعرها بني وطويل وناعم وكانت عاملاه ضفيره عالجنب ولابسه جينز ازرق وتيشيرت ابيض واخدت شنطتها وخرجت من البوابه ووقفت تستنى عمتها عشان تاخدها

وكانت عينيها بتدور في كل الاتجاهات على عمتها, وفجأه سمعت صوت قوي بيقول من وراها :

الصوت:انتي فريده كامل؟؟؟؟؟؟؟

بصت فريده ومعرفتش ترد من كتر خوفها……

قصة حب وألم الحلقة الثانية

بصت فريده وراها لقيت شاب طويل وجسمه ضخم شعره اسود وعينيه بني غامق وعامل دقن دوجلاس وشكله مخيف ولابس بدله سودا وقميص اسود و حست فريده بالخوف وعينيها اتملت بالدموع بس مسكت نفسها و هزت راسها من فوق لتحت راح الشاب بصلها من فوق لتحت كأنه كان متوقع حد تاني وقالها بسرعه:

الشاب:انتي بتتكلمي عربي؟

فريده هزت راسها

الشاب:انا آدم ابن عمتك , انا هوصلك الفيلا عشان ماما مستنياكي

وخد منها الشنطه ومشي ادامها وهي مشيت وراه او جريت بمعنى اصح عشان هو كان خطوته واسعه وسريعه وكأنه في مهمه وعايز يخلصها بسرعه وخرجوا من المطار و فتحلها باب عربيه مرسيدس فخمه جدا وبعد ما قعدت حط الشنطه ورا و ركب وابتدى يسوق

وكانت فريده لازقه في الباب ومش عارفه تقول ايه فقررت تسكت خالص……..

آدم:عايز اقولك ان والدتي مريضه جدا و المرض زاد عليها بعد خبر وفاة والدك الله يرحمه وهي مستنياكي وكان نفسها تيجي تستناكي بس مقدرتش والدكتور طلب اننا نعاملها معامله خاصه و منعرضهاش أي ضغط خالص عشان قلبها تعبان.

فريده بصتله بعينيها الواسعه وفضلت ساكتها

بصلها آدم كأنها مش طبيعيه:انتي سامعاني؟؟

هزت راسها تاني

آدم:طيب كويس, انت هتروحي البيت تقعدي شويه مع ماما و تشوفي اوضتك وعايزك تنامي بدري عشان ان شاء الله بكره هقدملك اوراقك في الجامعه الألمانيه عشان تكملي دراستك.

فضلت فريده ساكته لغاية ما العربيه دخلت من بوابه سودا عاليه لفيلا كبيره و واسعه جدا وفيها جنينه واسعه مليانه اشجار وورود وفيها حمام سباحه كبير جدا و جواها جراش واسع فيه كذا عربيه , ووقفت العربيه ادام باب الفيلا و نزل آدم فتح لفريده باب العربيه واول ما وقفوا ادام الباب اتفتح وظهرت شغاله فلبينيه طلب منها آدم تجيب الشنطه من العربيه وبعد كده بص لفريده:

آدم: اتفضلي ماما مستنياكي

دخلت فريده ورا آدم ولقيت الفيلا من جوه فخمه وكلها تحف وفيها نافوره جميله في النص ولقيت من بعيد واحده جسمها طويل وشعرها ابيض قصير وناعم ولابسه بنطالون اسود وبلوزه بيضا جايه ناحيتها:

سلوى:فريده حبيبتي حمدلله على السلامه

بصت فريده ومدت ايديها تسلم عليها

سلوى: انا عمتك يا حبيبتي

فريده بصوت هادي بيترعش:ازي حضرتك؟

آدم بسخريه:انتي بتتكلمي بجد ؟؟؟؟؟؟؟؟

سلوي: آدم براحه عليها ده لسه مصدومه

آدم:انا وصلتهالك وعن اذنك بقى انا اتأخرت عالشغل

ومشي آدم وساب فريده مع سلوى اللي قربت من فريده وخدتها فحضنها وحست فريده بالأمان تاني وراحت حضنت عمتها ودفنت وشها في صدرها:

سلوى:عيطي يا حبيبتي … عيطي

و زي ما تكون فريده كانت مستنيه الأذن انها تعيط فابتدت دموعها تنزل وكأنها كانت مستنيه تنزل في حضن حد……………

بعد ساعه كانت فريده قاعده في الانتريه على كنبه وعمتها حاضناها وطلبتلها كاكاو سخن عشان تهدى وفضلت معاها لغاية ما خلصت الكاكاو وخدتها توريها اوضتها, طلعوا سوا الدور الاول وفتحت عمتها باب لاوضه واسعه لونها بينك كلها وفيها دولاب كبير وتسريحه كبيره وسرير واسع مدور وفيها حمام كبير لونه ابيض في بينك وفيه جاكوزي ومرايات كتير و رفوف مليانه كريمات وبيرفيومز وشامبوهات واي حاجه ممكن تستعملها بنت في سن فريده:

سلوى:انا اشترتلك الحاجات اللي ممكن تحتاجيها

وفتحت سلوى الدولاب:وكمان اشترتلك شوية هدوم مؤقتا لغاية ما ننزل سوا نشتري حاجات على ذوقك

فريده:متشكره بس ده كتير اوي

سلوى:مش كتير على بنت اغلى و احن انسان في حياتي الله يرحمك يا كامل

فريده:كان بيحبك اوي

سلوى:انا عارفه يا حبيبتي, هسيبك بقى ترتاحي وهخليهم يطلعولك العشا هنا وبعدين نامي عشان بكره ورانا حاجات كتير نعملها سوا

فريده:حاضر

سلوى:اسيبك بقى لو احتجتي اي حاجه انا اوضتي جنب اوضتك

فريده:حاضر

و خرجت سلوى وسابت فريده لوحدها , قعدت فريده على السرير وهي مش عارفه تعمل ايه ؟ فقررت تدخل تاخد شاور عشان تنام .

قصة حب وألم الحلقة الثالثة

صحيت فريده من النوم وبصت حواليها وهي مستغربه وبعدين افتكرت انها رجعت مصر وموجوده عند عمتها سلوى وقامت من السرير وراحت تبص من البلكونه وكانت لابسه بيجاما بينك نص كوم وشورت قصير ولقيت اشجار ياسمين تحت بلكونتها وريحتها جميله اوي

وسمعت صوت حد في البيسين بصت لقيت آدم بيعوم بسرعه ومن غير ما يشوفها دخلت عشان تلبس وتنزل عند عمتها ووقفت ادام الدولاب محتاره تلبس ايه واخيرا اختارت فستان جينز قصير نص كوم ولبست شوز ابيض ونزلت لقيت عمتها قاعده على السفره لوحدها مستنياها:

سلوى:صباح الخير يا حبيبتي , نمتي كويس؟

فريده بصوت رقيق:صباح الخير, الحمد لله نمت كويس

سلوى:انا مرضتش افطر من غيرك انت و آدم اصله بيحب يعوم شويه قبل ما يروح الشركه

فريده:هو كان قالي انه هيقدملي في الجامعه الالمانيه

سلوى:ايوه يا حبيبتي بعد الفطار هتروحوا علطول

دخل آدم عليهم وباس مامته في خدها وقال:

آدم:صباح الخير يا ماما, صباح الخير يا فريده

سلوى:صباح الخير يا حبيبي

فريده:صباح الخير

آدم: هنروح نقدم اوراقك في الجامعه

فريده هزت راسها

آدم: هتختاري كلية ايه ؟

فريده:ادارة اعمال

آدم:اشمعنى ادارة اعمال؟

فريده:كان بابا عايزني ادرس كده

آدم:طيب يلا نفطر عشان نروح

بعد الفطار سلمت فريده على عمتها وركبت مع آدم العربيه وكان لابس بنطالون جينز وقميص ابيض نص كوم وفضلت فريده ساكته طول الطريق وآدم كان بيتكلم في الموبايل مع سكرتيرته فالشغل لغاية ما وصلوا للجامعه ودخلوا وقدمت فريده اوراقها وكتبت استمارة كلية ادارة الاعمال والموظفه قالت ان التنسيق هيظهر كمان اسبوع .

آدم وصل فريده البيت وراح شغله وفضلت فريده طول اليوم مع عمتها في الجنينه يتكلموا عن مصر والاماكن اللي لازم فريده تزورها و الحاجات اللي هينزلوا يشتروها عشان الجامعه , وفي وقت الغدا اتصل آدم اعتذر لمامته انه مش هيقدر يجي يتغدى معاهم :

سلوى:تعرفي يا فريده آدم بيشتغل في شركة باباه من ساعة ما كان طالب في الجامعه ومن يوم باباه ما اتوفى وهو كل وقته للشغل تخيلي شاب عمره 29 سنه كل وقته مشغول ومش بيرتاح ابدا.

فريده:شكله بيحب شغله

سلوى:اوي اوي بيفكرني بباباكي الله يرحمه

فريده:فعلا

سلوى:تعرفي لما كان عندك ست سنين قبل ما تسافري المانيا مع باباكي كان آدم عمره 19 سنه يوميها لقيته زعلان اوي بقوله مالك قالي

خالي وفريده هيوحشوني اوي.

فريده:انا مش فاكره خالص اننا كنا في مصر زمان

سلوى:انتي كنتي صغيره ساعتها

فريده بصت لعمتها بحب وقالت:انا مش عارفه من غيرك كنت هعمل ايه؟

سلوى وهي بتضحك:الحمد لله ان ربنا طول في عمري عشان آخد بالي منك ومن آدم

فريده قامت وحضنت عمتها جامد وفضلوا سهرانين والساعه 9 سلوى قالت:

سلوى:فريده انا هقوم عشان معاد نومي جه خليكي براحتك

فريده:لا انا هطلع انام

سلوى:تنامي ايه ده انتي لسه شباب روحي انزلي البيسن او اتفرجي عالتليفزيون

فريده:طيب انا هنزل البيسين شويه

سلوى:هتلاقي كذا مايوه في الدولاب بس يا رب زوقي يعجبك

وطلعت سلوى عشان تنام وفريده راحت لقيت تلات مايوهات واحد اسود وواحد اصفر وواحد احمر بيكيني بس هي اختارت الاسود عشان كان قطعه واحده وخدت فوطه ونزلت الجنينه وسابت الفوطه عالكرسي ولبست البونيه ونزلت الميه وفضلت تحت الميه كتير كأنها محتاجه تريح اعصابها من الايام الصعبه اللي فاتت وطلعت راسها وابتدت تعوم وهي مسترخيه بس حست ان في حد بيبص عليها راحت خرجت من الميه ولفت الفوطه حوالين جسمها وراحت عشان تدخل الفيلا بس لقيت آدم ادامها:

آدم:فين ماما

فريده:طلعت تنام

آدم: انتي لازم تنامي بدري عشان الدراسه قربت

فريده ادايقت انه بيعاملها على انها طفله فبصتله وسكتت

آدم:يلا اطلعي اوضتك تصبحي على خير

وسابها آدم لوحدها ودخل اوضة المكتب بتاعته عشان يكمل شغل وهي طلع اوضتها خدت شاور و نامت نوم عميق….

قصة حب وألم الحلقة الرابعة

الايام اللي بعد كده قضتها فريده مع عمتها يشتروا حاجات جديده لفريده قبل بداية السنه الدراسيه وكانت فريده فرحانه اوي وخصوصا انها بقت متعلقه بعمتها كأنها مامتها بالضبط وكانت اغلب اليوم بيقضوه سوا أما آدم كان بيجي البيت قليل اوي عشان مشغول جدا بس كانت فريده ساعات تلاقيه بيعوم في البيسين بالليل او الصبح بدري و و قبل الدراسه بيوم جت الشغاله تقول لفريده ان آدم عايزها في مكتبه

خبطت فريده على باب المكتب وفتحت الباب:

آدم:تعالي اقعدي يا فريده

فريده:نعم

آدم :افتحي العلبه اللي ادامك ده

فتجت فريده العلبه لقيت لاب توب لونه فوشيا فبصت لآدم باستغراب

آدم:انا جبتهولك عشان اكيد هتحتاجيه في دراستك

فريده:متشكره اوي

آدم: اهم حاجه عايزه تكوني متفوقه في دراستك

فريده:ان شاء الله

آدم:تقدري تروحي اوضتك عشان بكره السواق هيوصلك الجامعه الصبح

فريده:عن اذنك

آدم من غير ما يبصلها كان بيشتغل عاللاب توب بتاعه:اتفضلي

طلعت فريده اوضتها وهي مش عارفه تفهم آدم هو طيب ولا قاسي ؟ وليه بيعمل معاها كل ده ؟ عشان بنت خاله؟؟؟

واسئله كتير بتدور جوه فريده مش عارفه تلاقيلها اجابه ونامت فريده وهي لسه بتفكر في آدم…………

الصبح صحيت فريده بدري ولبست جينز ازرق وعليه بلوزه صفرا وكوتشي ابيض وعملت شعرها ضفيره لورا وحطت ميك اب خفيف

و نزلت لقيت عمتها وآدم مستنينها على الفطار:

سلوى:صباح الخير يا حبيبتي, ها مستعده للدراسه؟

فريده:ان شاء الله

آدم:خلي بالك من نفسك السواق مستنيكي فالعربيه وهيستناكي لما تخلصي

فريده بصتله وقالت:حاضر

وبعد الفطار قام آدم وفريده وخرجوا من باب الفيلا سوا و فتحلها باب العربيه اللي ورا واداها فلوس:

فريده:ايه ده؟

آدم:ده مصروف ليكي عشان لو احتجتي حاجه

فريده:انا مش عايزه

آدم:وبعدين اسمعي الكلام

وقفل آدم باب العربيه والسواق اتحرك وفضلت فريده تبص على آدم لغاية ما اختفى عن عينيها, وصلت عند باب الجامعه و نزلت ودخلت الكليه بتاعتها وعرفت المكان اللي هتدرس فيه اول ماده وهتاك اتعرفت على بنتين هنا و ليان وقضوا اول يوم مع بعض والبنتين كانوا بيدرسوا في مدرسه المانيه في مصر وفريده ارتاحت لهم اوي وآخر اليوم لقيت فريده السواق مستنيها ورجعت البيت لقيت آدم موجود في الجنينه:

فريده:مساء الخير

آدم:مساء النور, ها عملتي ايه انهارده؟

فريده:الحمد لله

آدم:طيب كويس

فريده كانت عايزه تحكيله عن صاحباتها بس هو مكنش باصصلها وكان بيقرا ورق شغل فاستأذنت ودخلت الفيلا وقابلت عمتها وحكتلها كل اللي حصل في اول يوم دراسه .

وعدى التيرم الاول وكانت فريده مستنيه النتيجه على نار ولقيت موبايلها بيرن:

فريده:الو

ليان:الو يا فري

فريده:ها عندك اخبار؟

ليان:تدفعي كام؟

فريده: قولي بقى

ليان:مبروك طلعتي التانيه عالدفعه

فريده:بجد

ليان:ايوه يا بنتي النتيجه عالنت

فريده:وانتي وهنا عملتوا ايه؟

ليان:الحمد لله نجحنا

فريده:مبروك

ليان:لازم نخرج انهارده نحتفل

فريده:مش عارفه آدم هيوافق ولالأ؟

ليان:قولي لعمتك تقوله

فريده:هحاول واتصل بيكي

ليان:هستناكي

فريده:اوكيه باي

ليان:باي

نزلت فريده لقيت عمتها موجوده في الانتريه:

فريده:طنط

سلوى:نعم يا حبيبتي

فريده:انا طلعت التانيه عالدفعه

سلوى:مبروك يا حبيبتي , روحي فرحي آدم هو موجود فالمكتب

فريده:اوكيه

وقفت فريده على باب المكتب متردده وبعدين خدت نفس وهي مش عارفه ايه سر الرهبه اللي بتحسها ناحية آدم:

فريده:آدم

آدم:تعالي يا فريده, عايزه حاجه؟

فريده:النتيجه ظهرت

آدم بصلها وساب الورق اللي في ايده:عملتي ايه؟

فريده:طلعت التانيه عالدفعه

آدم ابتسم:مبروك الف مبروك

بصتله فريده جامد عشان كان اول مره تشوفه بيضحك: الله يبارك فيك

آدم:اختاري اي هديه

فريده بصوت متردد:ممكن اخرج مع صاحباتي انهارده

آدم بصلها اوي:هتروحوا فين؟

فريده:مش عارفه لسه

آدم:اوكيه يا فريده بس السواق هيوصلك ويستناكي عشان يرجعك

فريده وهي مش مصدقه انه وافق:متشكره يا آدم

آدم وهو شايف الفرحه فعينيها :روحي جهزي نفسك بقى

و جريت فريده عشان تكلم ليان ويتفقوا على المكان اللي هيسهروا فيه وبعد ما كلمت ليان وقفت ادام الدولاب واختارت فستان ابيض قصير وشوز فلات بيضا شنطه صغيره وحطت حزام رفيع دهبي ولبست حلق لونه دهبي وحطت ميك اب رقيق و فردت شعرها ونزلت لقيت آدم واقف عند الباب حاطط ايده في جيبه وكان بيبصلها وهي نازله من فوق وده كان اول مره يشوفها حاطه ميك اب و شعرها مفرود ولما وصلت فريده لآخر السلم خرجت عمتها من الانتريه وقالت:

سلوى:شايف يا آدم فريده كبرت ازاي؟

آدم:آه فعلا , فريده متتأخريش عن الساعه 9

فريده:حاضر

وخرجت فريده وركبت العربيه وفضل آدم باصص عليها وهو قلقان عليها عشان اول مره تخرج لوحدها في مصر……

قصة حب وألم الحلقة الخامسة

وصلت فريده الكافيه اللي هتقابل فيه هنا وليان وقعدوا وطلبوا عشا وفضلوا يتكلموا ويضحكوا وبعد العشا طلبت ليان شيشه :

فريده:ايه ده يا ليان انتي بتشربي شيشه؟؟؟؟؟؟؟

ليان:ايه يا بنتي عادي

فريده: بس ده مضره جدا

ليان:يا فري بقى ده انهارده بنحتفل بنجاحنا

هنا:انا بقالي كتير بقولها لازم تبطلها وهي مش عايزه

فريده:مامتك وباباكي بعرفوا؟

ليان:لا طبعا انت عارفه التفكير الشرقي

هنا:على فكره التفكير الشرقي غالبا بيبقى صح جدا

فريده:انا موافقه على كلام هنا

ليان:انا بقى ضد الفكر الشرقي المتخلف اللي دايما بيقيد البنت ويدي الحريه للولد

فريده بصت في الساعه لقيتها 8 و نص فقامت بسرعه وقالتلهم:

فريده:انا اتأخرت ولازم امشي

ليان:شوفتي بقى لو كنتي ولد ما كنتيش قومتي

فريده:انا قومت عشان وعدت آدم اني ارجع البيت الساعه 9

هنا:برافو عليكي يا فري كده هيثق فيكي وهيوافق تخرجي معانا تاني

ليان:انا مش مصدقه انك كنت عايشه في المانيا

فريده:متنسيش ان بابا الله يرحمه كان مصري

هنا:يلا يا فري عشان متتأخريش

فريده:باي

هنا:مع السلامه

ليان:باي

و خرجت فريده من الكافيه و ركبت العربيه ووصلت البيت الساعه 9 بالدقيقه لقيت عمتها نامت وملقيتش آدم فطلعت اوضتها غيرت هدومها ونامت…

فات التيرم التاني ونجحت فريده و عمتها كانت فرحانه بيها وآدم باركلها وقالها تختار هديه بس هي شكرته وفي يوم على الفطار:

آدم:فريده هتعملي ايه انهارده

فريده:ولا حاجه يمكن اروح النادي مع طنط

آدم:اوكيه روحوا وانا هجيلكوا نتغدى سوا

وخرج آدم راح الشغل و طلعت فريده اوضتها تغير عشان تروح النادي ولبست بارتاكور جينز وعليه بلوزه قصيره خضرا و كوتشي ابيض وعملت شعرها ضفيره لورا ونزلت لقيت عمتها بتقولها:

سلوى: معلش يا فريده انا تعبانه شويه روحي انت

فريده:سلامتك يا طنط اطلبلك الدكتور؟

سلوى:لا يا حبيبتي انا هطلع ارتاح في اوضتي

فريده:طيب انا هطلع معاكي

سلوى:لا يا حبيبتي روحي النادي غيري جو وكمان عشان تتغدي مع آدم هناك

فريده:لا مش هروح من غير حضرتك

سلوى:اسمعي الكلام يا فريده , يلا السواق مستني بره

وراحت فريده النادي وكانت متعرفش حد خالص وفضلت قاعده على ترابيزه عالبيسين تتفرج عالاطفال اللي بيلعبوا وافتكرت باباها الله يرحمه لما كان بيلاعبها وهي صغيره , وهي قاعده لقيت مايه جت علي هدومها كلها فاتخضت وبصت لقيت شابين بيلعبوا ورشوا ميه عليها من غير ما يقصدوا ففريده وقفت عشان تمسح المايه بالمنديل فخرج شاب منهم وقرب منها:

الشاب:انا آسف جدا مكنتش اقصد

بصتله فريده لقيته شاب طويل وشعره اصفر وعينيه خضرا وشكله مؤدب جدا فقالتله:

فريده:حصل خير

الشاب:بجد مكنتش اقصد

فريده ابتسمت:خلاص حصل خير

الشاب مد ايده وقالها :اعرفك بنفسي اسمي مراد طالب في آخر سنه في كلية هندسه الجامعه الالمانيه

فريده مدت ايدها:اهلا بيك ,انا فريده سنه تانيه كلية ادارة اعمال الجامعه الالمانيه برده

مراد:ايه الصدفه الحلوه ده

فريده:هي فعلا صدفه

مراد:انتي قاعده لوحدك ليه؟

فريده :لسه معرفش حد اصلي رجعت من المانيا اول السنه الدراسيه

مراد:معقول لسه متعرفتيش على حد ده النادي كله اصحابي ثواني هغير هدومي وآجي اعرفك على اصحابي

وراح مراد يغير وساب فريده تستناه ولما رجع كان لابس شورت ابيض وعليه تيشيرت ازرق وشبشب ازرق وقالها:

مراد: اتاخرت عليكي

فريده:لا ابدا

وفضلوا يتمشوا لغاية ملاعب التنس ودخلوا لقيوا شلة بنات و ولاد واقفين بيشجعوا واحد صاحبهم وهو بيلعب وعرفها مراد على اصحابه

و كانوا كلهم في الجامعه الالمانيه والامريكيه وقضت فريده اليوم معاهم ومحستش بالوقت خالص غير وموبايلها بيرن:

فريده:الو

آدم:ايوه يا فريده انتوا فين؟

فريده:انا في ملاعب التنس

آدم:طيب انا جايلك

وبعد شويه جه آدم وكان لابس شورت اسود وعليه تيشيرت احمر وشوز اسود وكان لابس نظاره شمس ففريده بصت عليها فسألها مراد:

مراد:مين ده يا فريده؟

فريده:ده آدم ابن عمتي

بنت من البنات:واو ده وسيم اوي

فريده باصتلها وحست انها مدايقه من كلامها وسكتت:

آدم:هاي يا جماعه

مراد:اهلا بيك انا مراد

آدم:اهلا يا مراد انا آدم, بقى عندك اصحاب يا فريده؟

فريده:اتعرفت عليهم انهارده

آدم:طيب يلا عشان نروح نتغدى

بصت البنت لآدم ومدت ايديها:هاي انا مي

آدم:اهلا يا مي, فرصه سعيده يا جماعه عن اذنكوا

فريده:باي يا مراد

مراد:باي يا فري

ومشيت فريده مع آدم وراحوا مطعم النادي وبعد ما قعدوا:

آدم:هي ماما مجتش ولا ايه؟

فريده:لا اصلها تعبت وطلعت ترتاح في اوضتها

آدم بصلها اوي وقالها: زهقتي لوحدك؟

فريده:لا ابدا

آدم:انتي عرفتي مراد ازاي؟

حكتله فريده اللي حصل وقالتله انهم زملا في الجامعه , وطلبوا الغدا وفضل آدم يسألها على دراستها وبعد الغدا روحوا البيت وآدم غير هدومه وراح الشركه تاني وفضلت فريده بقيت اليوم لوحدها في الجنينه……………….…………

بعد اسبوع نزلت فريده عشان تفطر مع عمتها ولقيت آدم موجود وحط ادامها علبه ملفوفه لفة هدايا:

فريده:ايه ده؟

آدم بصلها بحنان:كل سنه وانتي طيبه يا فريده انهارده عيد ميلادك

فريده:انت عرفت منين؟

آدم:العصفوره قالتلي, مش هتفتحي الهديه

فريده فتحتها لقيت دبدوب بينك وماسك علبه بينك صغيره فتحتها لقيت سلسله دهب ابيض وفيها نجمه الماس فبصت للسلسله وقالت:

فريده:شكرا يا آدم ده حلوه اوي

آدم:هتقضي عيد ميلادك ال17 ازاي؟

فريده:مش عارفه, يمكن ليان وهنا يعدوا عليه

آدم:طيب انا هقوم اروح الشغل صبحي على ماما لما تنزل

فريده بصتله وعينيها بتلمع:حاضر

ولبست فريده السلسله واول ما عمتها نزلت:

فريده:شوفتي يا طنط آدم جابلي ايه هدية عيد ميلادي؟

سلوى باستها في خدها:كل سنه وانت طيبه يا حبيبتي , حلوه اوي السلسله و آدي هديتي انا

فريده فتحت هدية عمتها لقيت خاتم جميل فيه فص ازرق:شكرا يا طنط ربنا يخليكي ليه

وبالليل جت ليان وهنا عند فريده وجابوا تورته كبيره وعملوا لفريده عيد ميلاد في الجنينه وفضلوا يغنولها وبعد ما طفوا الشمع :

ليان:يلا اتمني امنيه

هنا:يلا يا فري

فريده غمضت عينيها و ملقيتش امنيه بس لقيت نفسها بتفكر في آدم واول ما فتحت عينيها لقيته واقف بيبصلها ولقيت ليان وهنا باصين لآدم بصة اعجاب:

آدم:اتمنيتي ايه؟

ليان:ده سر على فكره, هاي انا ليان

آدم:اهلا يا ليان , وانتي اسمك ايه؟

هنا:انا هنا فرصه سعيد اننا نشوفك فريده بتتكلم عنك علطول

آدم بص لفريده: ويا ترى بتقول عليه ايه؟

فضلت فريده باصه في عينيه ومتكلمتش خالص كأنها مش حاسه بوجود اي حد في الدنيا غير آدم بس…….

قصة حب وألم الحلقة السادسة

ابتدت السنه الدراسيه وكانت فريده بتروح كل يوم الجامعه وبقت بتقعد مع ليان وهنا ومراد واصحابه و حست فريده ان مراد معجب بيها بس هي مش حاسه ناحيته بأي حاجه كان بالنسبه ليها صديق واخ لغاية ما جه آخر يوم في امتحانات التيرم الاول وجالها مراد عند الكليه:

مراد:ازيك يا فري

فريده:ازيك يا مراد عملت ايه في الامتحانات؟

مراد:الحمد لله, ايه رأيك نتعشى سوا انهارده

فريده:لوحدنا؟؟

مراد:انا عايز اكلمك في موضوع مهم

فريده:بس آدم مش هيوافق

مراد:انا هكلمه

فريده:بس………

مراد:ارجوكي مترفضيش

فريده حست بالاحراج واضطرت توافق بس كان اكتر حاجه قالقاها آدم هيقول ايه؟؟؟؟؟؟؟؟؟؟

رجعت فريده البيت لقيت عمتها مستنياها عشان تطمن عليها عملت ايه في الامتحان وبعد ما طمنتها طلعت اوضتها تغير وبعد شويه طلعت الشغاله تخبط عليها وتقولها ان آدم مستنيها في المكتب:

خبطت فريده عالباب وهي خايفه وفتحت الباب ودخلت على آدم:

فريده:مساء الخير

آدم كان واقف وظهره ليها:اقعدي يا فريده

قعدت فريده وهي خايفه اوي

آدم:تعرفي ان مراد كلمني انهارده

فريده:ايوه هو قالي

آدم:طلب مني تتعشوا سوا بره انهارده

فريده: هو قالي بس انا موافقتش غير لما يستأذنك

آدم بصلها وقالها:انت عايزه تخرجي معاه؟

فريده:هو قالي انه عايز يكلمني في موضوع مهم

آدم وتعبيرات وشه ثابته: عايزه تروحي ؟

فريده:لو انت وافقت

آدم:اوكيه روحي يا فريده

فريده:طيب عن اذنك

آدم:اتفضلي

طلعت فريده اوضتها وهي مدايقه ان آدم وافق ومش عارفه ليه مع انها المفروض تفرح انه سايبها براحتها بس برده حست انه المفروض كان يرفض …………………..

الساعه سبعه بالضبط نزلت فريده من اوضتها وكانت لابسه جيب طويله لونها نبيتي في بيج وعليها بلوزه كات بيج وشوز نبيتي وشنطه نبيتي وكانت فارده شعرها وحاطه ميك اب هادي ولقيت آدم قاعد في مكتبه:

فريده:آدم

آدم :ها جاهزه

فريده:ايوه مراد هيجي كمان ربع ساعه

آدم:طيب كويس

فريده:لو مش عاوزني اروح انا ممكن اعتذرله

آدم بصلها وفي عينيه ابتسامه :روحي يا فريده بس تكوني في البيت الساعه تسعه

اتغاظت فريده انه بيضحك ومش مدايق انها هتخرج مع مراد وسابته وراحت عشان تستنى مراد في الجنينه ولقيت عمتها قاعده:

فريده:انا جاهزه

سلوى:مالك مدايقه ليه؟

فريده:ابدا

سلوى:آدم قالك حاجه زعلتك؟

فريده بصت لعمتها والدموع في عينيها:لأ…. مقلش حاجه

سلوى حست ان فريده مش عايزه تخرج مع مراد بس هي كانت فاكراها معجبه بيه ومعرفتش هي زعلانه ليه….

قصة حب وألم الحلقة السابعة

وصلت فريده مع مراد المطعم وكان مطعم هادي وقعدوا على ترابيزه في الجنب عليها شموع وطلبوا عشا وبعد ما خلصوا أكل ومراد فضل باصص لفريده وقالها:

مراد:فريده انا………..

فريده:خير يا مراد

مراد:انت عارفه اني فاضلي تيرم واتخرج ان شاء الله

فريده:ان شاء الله

مراد:وانا اتفقت مع بابا اني ارجع المانيا اشتغل في شركة عمي هناك

فريده:ده خبر كويس ربنا يوفقك يا مراد

مراد:انا معجب بيكي يا فريده و اتمنى توافقي اننا نتخطب الفتره اللي هتكملي دراستك في مصر وبعدين نتجوز ونسافر المانيا سوا

فريده بصت وهي مش عارفه تقول ايه

مراد:ارجوكي تفكري كويس , انتي الانسانه اللي طول عمري بحلم بيها

فريده:بس انا مبفكرش في الجواز دلوقتي خالص

مراد:انا عارف بس انا بقول نتخطب لغاية ما تتخرجي

فريده فكرت شويه وقالت: هو انت قلت لآدم عالموضوع ده

مراد:ايوه انا استأذنته اني افاتحك وهو وافق اننا نخرج عشان تقولي رأيك بصراحه

فريده: وهو رأيه ايه؟

مراد:بصراحه انا بحترم آدم جدا بس بحسه غامض وعينيه متعرفيش جواها ايه وحتى كلامه قليل بس متهيألي هو عايز يعرف رأيك الاول, ها يا فري قررتي ايه؟

فريده:يا مراد انا بعتبرك اكتر من صديق وانت انسان ممتاز بس انا مش بفكر الجواز خالص

مراد اتصدم من كلامها:ارجوكي فكري تاني

فريده:انا آسفه يا مراد

مراد:على العموم انا هستناكي تفكري تاني وانتي معاكي ارقامي هنا وفي المانيا كلميني اي وقت هتلاقيني مستنيكي

وفضلوا يتكلموا كلام عادي عن الدراسه و بعد كده وصل مراد فريده عند باب الفيلا ومشي وهو زعلان وكان نفسه تكون فريده بتبادله نفس الشعور بس فضل عنده امل تغير رأيها في يوم من الايام……………….

دخلت فريده الفيلا وفضلت قاعده في الجنينه تفكر في كلام مراد وطلبه للجواز منها , واكتر حاجه استغربتلها ان آدم مقلهاش اي حاجه عن طلب مراد انه يخطبها , وكلمت نفسها بصوت عالي:

فريده:وبعدين معاك ؟ انت تقصد ايه بتصرفاتك ده معايا؟ نفسي اعرف بتفكر في ايه؟

ودخلت فريده الفيلا عشان تطلع تنام بس لقيت نور المكتب منور فقررت تدخل تتكلم مع آدم , خبطت ودخلت لقيته مرجع راسه لورا عالكرسي وكان شكله مرهق جدا فحاولت تخرج تاني عشان تسيبه يرتاح بس هو فتح عينيه:

آدم:انت رجعتي يا فريده؟

فريده:ايوه رجعت الساعه 9

آدم:ها اتبسطتي؟

فريده:عادي, انت عارف مراد كان هيكلمني في ايه؟

آدم:ايوه عارف

فريده:وانت رأيك ايه فالموضوع ده؟

آدم:مش مهم رأيي المهم رأيك انت

فريده بصتله وسكتت شويه وبعدين قالت:انا مش عايزه اتجوز خالص

وسابته وطلعت تجري على اوضتها ولقيت نفسها بتعيط ومكنتش عارفه ليه؟؟؟؟؟؟؟؟

قصة حب وألم الحلقة الثامنة

بعد اليوم ده ابتدت فريده تتجنب تشوف آدم وبقت اغلب وقتها في الجامعه وفي الاجازات في النادي مع عمتها وليان وهنا صاحباتها وفضلت تسأل عنه عمتها بطريقه غير مباشره وعرفت انه هيسافر ايطاليا في شغل و قالت لنفسها انها لازم تسلم عليه قبل ما يسافرده ابن عمتها برده………………

و قبل السفر بيوم نزلت فريده عشان تتعشى مع عمتها خصوصا ان آدم بقاله فتره بياكل بره البيت وبعد ما ابتدوا يتعشوا دخل آدم من باب الفيلا وكان بقاله كتير ما شافش فريده فقالها:

آدم: مساء الخير يا ماما, مساء الخير يا فريده

بصتله فريده نظره رقيقه و قالت:مساء النور

سلوى:مساء النور يا حبيبي, كىيس ان جيت عشان تتعشى معانا

وقعد آدم عالسفره وقال: حد فيكم محتاج حاجه من ايطاليا؟

سلوى:ميرسي يا حبيبي

فريده:شكرا

آدم:انا هسافر بكره الصبح ان شاء الله

فريده من غير ما تفكر:هترجع امتى؟

آدم:اسبوع او اتنين حسب ما اخلص شغلي

سلوى:كان نفسي اسافر معاك

آدم:اوعدكم ملره تانيه نسافر سوا نغير جو وكمان عشا ارتاح من ضغط الشغل

فريده:هتنزل فين في ايطاليا؟

آدم:هنزل الاول على روما

وقامت سلوى عشان تنام وسابت فريده مع ادهم اللي كان بيشرب قهوه في الانتريه وفضلت فريده ساكته وآدم اتكلم فجأه:

آدم:عامله ايه في دراستك؟

فريده:الحمد لله

آدم:واخبار مراد ايه؟

فريده:كويس

آدم:كلمك تاني في موضوع الخطوبه؟

فريده:لا ابدا

آدم:انا هتصل بيكم كل يوم عشان اطمن عليكم ومش هوصيكي على ماما

فريده:متقلقش

آدم:مش هتنامي

كانت فريده عايزه تقوله انا عايزه اقعد معاك ده انا هفضل اسبوعين ما شوفكش

فريده:خلاص انا هطلع

آدم بصلها نظره غريبه وعينيه بتلمع:تصبحي على خير

فريده:تصبح على خير

صحيت فريده بدري عشان تسلم على آدم قبل ما يسافر ولبست بنطالون جينز و تيشيرت احمر وعملت شعرها ضفيره عالجنب ونزلت بسرعه لقيت عمتها و آدم صاحين:

فريده:صباح الخير

آدم:صباح الخير

سلوى:ايه اللي صحاكي بدري يا حبيتي

فريده: عادي صحيت وقلت انزل اقعد معامكم

سلوى:طيب روحي عشان تفطري

فريده مكنتش عايزه تسيب آدم فقالت: انا مش جعانه

وفضلوا قاعدين يتكلموا عن ايطاليا والاماكن السياحيه اللي فيها و قام آدم وقالهم:

آدم:اسيبكم انا بقى وهكلمكوا لما اوصل ان شاء الله

سلوى:مع السلامه يا حبيبي

فريده وعينيها فيها دموع:مع السلامه

آدم:خلي بالكم من بعض

وخرج من الباب وسمعت فريده صوت العربيه وهي بتبعد وحست ان قلبها راح مع آدم………………..

فاتوا الاسبوعين على فريده كأنهم سنه وكانت بتروح الكليه ومش بتركز في اي حاجه ومبقتش تروح النادي ودايما قاعده في الجنينه او بتعوم في البيسين وكل يوم تستنى آدم لما يكلم مامته عشان تطمن عليه وساعات كانت سلوى تقوله خد فريده هتسلم عليك وكان صوتها بيبقى فرحان لما تسمع صوته وحدد آدم يوم الوصول وكان هيوصل بالليل خالص وفضلت فريده مستنياه هي وسلوى بس سلوى نامت وهي قاعده ففريده قالتلها:

فريده:اطلعي انت يا طنط ارتاحي وانا هستناه

سلوى:طيب يا حبيبتي انا هقوم عشان تعبت خالص

فريده:تصبحي على خير

سلوى:وانت من اهله

وفضلت فريده قاعده فالجنينه مستنيه آدم و جابت شال اتغطت بيه عشان الجو كان برد شويه ونامت وهي قاعده عالكنبه وكان شكلها برئ اوي …………

قصة حب وألم الحلقة التاسعة

دخل آدم من باب الفيلا لقى فريده نايمه ومتغطيه فصعبت عليه عشان الجو برد فصحاها براحه :

آدم: فريده…. فريده

فريده كانت بتحلم حلم جميل وان آدم ماسك ايديها وبيبص في عينيها ………….

فريده:اممممممممممم

آدم:فريده

فريده:آدم .. وحشتني اوي

آدم بصوت عالي شويه:فريده اصحي عشان تنامي جوه

فريده فتحت عينيها لقيت آدم قريب منها اوي:آدم انتي جيت ؟

آدم :ايه اللي نيمك كده؟

فريده:كنت مستنياك

آدم بصلها بحنان:طيب يلا ادخلي نامي كده هتاخدي برد

فريده قامت وشعرها كان مفرود وشكلها جميل اوي ودخلت جوه عشان تنام , وفضل آدم قاعد مكانها ومسك الشال اللي كانت متغطيه بيه وحضنه وفضل يفكر فيها وقال لنفسه:

انتي هتعملي ايه فيه يا فريده……….؟ مينفعش افكر فيكي… انا اكبر منك ب13 سنه , لازم ابعدك عني عشان تعيشي حياتك وسنك, بس يا ترى هقدر اقاومك لغاية امتى؟

وحاول آدم يقضي اغلب اليوم بره البيت عشان يبعد عن فريده وهي مش عارفه تشوفه عشان دراستها وخلصت السنه الدراسيه وجت الاجازه وبرده آدم بيهرب وفريده بقت علطول زعلانه وبطلت تخرج من البيت عشان تحاول تشوفه بس هو كل ما يشوفها يسلم عليها ويدخل المكتب او يخرج من البيت وعمتها حست ان فريده مش سعيده خالص وبطلت تروح النادي وتشوف اصحابها:

سلوى:مالك يا فريده؟ مش بتحرجي مع صحباتك ليه؟

فريده:عادي مش عايزه

سلوى وهي بتهزر:ولا عشان عيد ميلادك قرب؟

فريده:آه صحيح ده يوم الخميس

سلوى:ايه رأيك نعمله في الفيلا ؟

فريده:لا لا مفيش داعي

سلوى:السنه اللي فاتت مرضيناش نعمله عشان كان باباكي لسه متوفي بس السنه ده هنعمله ونعزم كل معارفنا عشان الناس تتعرف عليكي

فريده:بجد مش عايزه

سلوى:انا قلت هنعمله يعني هنعمله وبكه هننزل نشتريلك فستان يجنن عشان كل الناس يشوفوا بنت اخويه اللي زي القمر

فريده ضحكت عشان عمتها متزعلش:ربنا يخليكي ليه, هو عيد ميلاد آدم امتى؟

سلوى:1/1بتسألي ليه؟

فريده:عشان اجيبله هديه

سلوى :ربنا يخليكوا ليعض

فريده ابتسمت وبصت بعيد………………….…

نزلت تاني يوم فريده مع سلوى واتفقوا على التورته والجاتوهات و كل طلبات العيد ميلاد وراحوا يشتروا الفستان فاختارت سلوى فستان لونه دهبي طويل وحمالات وقماشته ناعمه جدا وليه ديل بسيط من ورا ومفتوح من عند الصدرو قاسته فريده وكان شكلها زي القمر و رجعوا البيت شايلين حاجات كتير وبيضحكوا وهما داخلين لقيوا آدم خارج:

سلوى:آدم .. كويس اني شوفتك تعالى شوف جبنا ايه عشان عيد ميلاد فريده

آدم بص لفريده:كل سنه وانتي طيبه

فريده وهي فرحانه: وانت طيب

سلوى:اوعى تكون نسيت عيد ميلادها؟

آدم بص في عينين فريده:عمري ما اقدر اساه

فريده كانت هتطير من السعاده عشان آدم فاكر عيد ميلادها , واستأذن آدم وخرج وفضلت فريده فرحانه لغاية ما دخلت سريرها عشان تنام … وحلمت بآدم بيضحكلها من بعيد ففضلت تضحك وهي نايمه…………

قصة حب وألم الحلقة العاشرة

يوم عيد ميلاد فريده صحيت بدري وفطرت مع عمتها وابتدوا يجهزوا الفيلا والجنينه عشان العيد ميلاد وبعد ما خلصوا جت ليان وهنا عشان يساعدوا فريده و هي بتلبس و فضلوا قاعدين في الاوضه يتكلموا وفريده بتجهز نفسها وكان فستان ليان لونه احمر وقصير وفستان هنا لونه موف وطويل وكانوا الاتنين شكلهم جميل وبعد ما فريده لبست الفستان وحطت ميك اب دهبي في بيج ولبست صاندال دهبي :

ليان:ايه ده؟ شيك اوي اشترتيه منين ؟

هنا:هتبقي احلى واحده انهارده يا فري

فريده:بجد شكلي حلو

ليان:جدا جدا

هنا:هو مراد هيجي؟

فريده:انا عزمته بس مش عارفه هيجي ولا لأ, اصله بيجهز اوراقه عشان هيسافر خلاص

هنا:لسه مش موافقه تتجوزيه؟

فريده:لأ مش موافقه مراد مش هو الانسان اللي بحلم بيه

هنا: وايه مواصفات الانسان ده بقى ؟

فريده:عايزاه حنين ورقيق ويكون ناضج ويكون…..

هنا:بس بس وهو فين فارس احلامك ده بقى؟

ليان:اوعي تكوني بتحبي من ورانا يا فري؟

فريده:لا ابدا , يلا بقى عشان اعمل شعري الضيوف قربوا يجوا

ونزلت فريده وصاحباتها الساعه 8 عشان يستقبلوا اصحابهم وابتدوا الضيوف يجوا وفضلت فريده عينيها عالباب مستنيه آدم يجي بس هو اتأخر وكانت عايزه تسأل عليه بس كانت مكسوفه وخصوصا ان عمتها كانت قاعده مع مرات عم آدم وبناتها الاتنين وناس تاني من عيلة آدم وفريده راحت سلمت عليهم وبعد كده راحت تسلم على مراد واصحابه.

جنب باب الفيلا كان فيه ترابيزه كبيره اتملت من الهدايا بس فريده كانت مستنيه آدم عشان فرحتها بعيد ميلادها تكمل والساعه عشره قامت فريده عشان تطفي الشمع وكانت بتضحك عشان محدش ياخد باله انها مدايقه وبعد ما اصحابها غنوا طفوا النور وطفت فريده الشمع و غمضت عينيها واتمنت ان آدم يجي بسرعه ولما فتحت عينيها اصحابها فتحوا الانوار لقيت آدم واقف ادامهاو كان لابس بدله لونها اسود وتحتها قميص ابيض مخطط بأسود وحاطط بيرفيوم حلو اوي فراحت عنده :

فريده:أتأخرت ليه؟

آدم ابتسم: كل سنه وانتي طيبه

فريده:وانت طيب

ليان:ازيك يا آدم, ها فين هدية فريده

آدم:الهديه بره الفيلا

وخرجت فريده واصحابها بره الباب لقيوا صندوق احمر كبير جدا ومليان شرايط ساتان بيضا بتلمع ووقفت فريده مش عارفه ايه اللي جوا الصندوق:

ليان :يلا يا فريده شدي الشرايط خلينا نشوف ايه الهديه

فريده قربت وشدت الشرايط الصندوق اتفتح ولقيت جواه عربيه لونها احمر مرسيدس صغيره

ليان وهنا:واااااااااااااااو

مراد:مبروك يا فري

ليان:مش ممكن آدم ده هايل

هنا:مبروك يا فري

فريده راحت لآدم: شكرا يا ىدم بس كده كتير اوي

آدم :مفيش حاجه تكتر عليكي يا فريده

وفضلوا باصيين لبعض وساكتين ومخدوش بالهم من البنت اللي قربت من آدم وخبت عينيه وقالت:

البنت:انا مين؟؟؟؟؟؟؟؟

آدم شال ايد البنت وقال:مش ممكن ازيك يا لانا عامله ايه؟

لانا:وحشتني موت

وحضنت آدم وهو بيضحك وفضلوا يتكلموا مع بعض , فريده فضلت واقفه تتفرج عليهم وكانت عايزه نجري تروح اوضتها بس اصحابها خدوها من ايديها عشان يرقصوا وفضلت فريده عينيها على آدم وهو مشغول بلانااللي كانت لابسه فستان قضير وضيق لونه فضيوشكلها جميل وشعرها طويل واصفر وعاملاه كيرلي وفريده عايزه تعرف مين لانا وايه علاقتها بآدم……

» عزاء والدة كاملة ابو ذكري هند صبري ويسرا وليلى علوي وعدد كبير من الفنانين يواسون كاملة أبو ذكري في وفاة والدتها.
» قصة سندريلا كاملة
» قصة سيدنا نوح كاملة
» صفات برج الحوت كاملة
» صفات برج القوس كاملة