الحالة
اِنت مين ؟
شاب شايب جوُّه منُّه
صَرْخِتُه تطلَع سُكات
شاب كُل مَرّه قَلبُه
يميل لـ واحدَه مـِ البنات
يسيْبلُه يأسُه فـ قَلبُه شَق
وإزدياد عَدْد الشقوق
بيموّت أملُه بهدؤ
ضيْق مَعيْشتُه حِبال تكتِّف
أي فُرصة اِرتباط
شاب مايبيّنش دمعه
وقت ماتضيع من أيديه
أي حاجه مـِ الحاجات
يعني ظاهر إنُّه راجل
والحقيقه
طفل جداً فـ العيْاط
شاب خايف يبقى خُوفُه
زيّ عاده
الحُزن غاوي يشد فيه
مهما تبّت فـ السعاده
شاب مش عاوز يكون
فوق كِتاف اُمه وابوه
حِمل زاد وتقيْل عليهم
بس جوّه منُّه عجز
مانعُه إنُّه يحتويهم
شاب لسّه بـ قلب طفل
الزمن عَمّال بيقفل
باب سعادتُه بـ ألف قِفل
شاب شاف الوِحده أحسن
من إيدين تفضل يومين
وبَعدها على طول تسيْب
الفُراق بـ الإختيار
اَريح كتير
من فُراق قِسْمَه ونصيب
شاب لو دَقّقت فيه
تشوف ملامحُه إزاز مكسّر
مهما يضحَك
برضو هيبانلك مكشّر
شاب لو عاوز يعبّر
ألف إيد تُربُط لسانُه
بـ يجري جَري
طلقه مضروبه فـ خلا
وجَريُه دا
ماوصّلوش لأي شيء
عشان مازال جَريُه فـ مَكانُه
شاب أي لون يشوفُه
يبان تملّي فـ عينُه غامق
حتى لـَ ابيض
روحُه لو هَنعِد كام
بقى قَطْع فيها
محتاجين يجي ألف تَرزي
عشان يخيّط
شاب حِلمُه عـ الحيطان
كان شويّة شَخْبَطه
يادوب يومين وعينيه شافتها
كُلّها متبيّضه
شاب حاسس
اِنُّه متغرّب فـ بَلَدُه
وان كل وزارة فيها
بتجتهد علشان تعَندُه
شاب لمّا يشوف مرايه
يداري وشُّه مـ الكسوف
لـَ يفتِكر خيبتُه التقيله
واِنُّه شَكْلاً شخص عايش
بس ميّت بـ الظروف
دي إجابتي على السّؤال
وانت مين ؟
مش هسيْبَك
تمشي غير لمّا تجاوبني
طيّب اِهدى
اِزاي هاجوبَك وانت اهو بـ إيديك خَنِقني
سيْبني واِهدى
إندهلي عَـ التمريض بسُرعه
الحالة رِجْعِت مُتعِبه
تمام يادكتور ..
حضرتك تأمر بـ إيه ؟
ياالله أوام
إدّولُه جَلسة كَهربا
#ذِكر_ما_لا_يُقال
الخميس 29 نوفمبر 2018, 2:24 pm من طرف 
