كارت شَحن
” مُفتتح “
الشوك وبس نصيبي من وَرْدِك
معقوله الحُب حاجه بتحَزَّن
انا خُفت أكتب شِعر من بَعدِك
كَتَبني الشِعر دون ما يستأذِن
”” النَص ““
يا اُم العيون الخُضر
يا اُم الشفايف خَمر
شِرِبْت مِنْها سِكِرْت
فـ نِسِيت هموم العُمْر
مع اِني فارس حُر
اِخترت اَكون ليكِ
وبين إيديكِ العَبد
بـ اَدفعلِك اِللي اَملُكُه
وان شاالله اَعيش محتاج
ولا ضَهري مرّة اِشتكى
من لَسعِة اِلكُرباج
كل اِللي قال حبِّك
من قبلي كان كدّاب
انا الوحيد حبّيت
وفِتَحْت روحي كتاب
عنوانُه كان إسمِك
وكلامُه من رَسمِك
واَجمل حالات الحُب
لمّا يدُق القلب
لـ عِشْق دون أسباب
وكفّي كان منديل
يجري أوام يمسح
وقت اَمّا يلقى دموع
نازله من عينيك
وكنت ليكِ الجَمَل
لمّا التُّعَب بيحلّ
وقوّتِك بتقِلّ
على ضَهرُه بيعينِك
انا الوحيد لقيتيه
وسط الجموع شاري
والكُل بايعينِك
وكُنت ليكِ السَّكَن
وقت الخَطَر والمِحَن
سِبتيه شروخُه تزيد
خنقتي أملُه بـ إيد
وإيد بتحقِن فيه
يسري فـ شقُوقُه الشَجن
بقيت فـ نظرِك إيه
وانا يعني بـ اسأل ليه ؟
بقى كارت شَحن اِتشَحن
هل لُه لزوم أو تَمن ؟!
#ذِكر_ما_لا_يُقال