عيد تايب يوسف
عضو متميز
عدد المساهمات : 222
نقاط : 508
السٌّمعَة : 5
تاريخ التسجيل : 30/07/2015
 | موضوع: ( حكايةفاشل ) قصيدة بالعامية المصرية  الخميس 29 نوفمبر 2018, 6:38 am | |
| حكايةفاشلانا كنت جبان
وقت ماحسّيت إن الدنيا
بتلطش ابويا بكفوفها
ماحوشتش عنُّه رغم اني
بعنيّا شايفها
ماهنش عليه هو ساعتها
يرميني فشُغل
وعايزني فالتعليم انجح
انا كنت لأليم
كان م المفروض ان اقوله
انا راجل يا ابا وراح اساعدك
ماتدلعنيش
ماهو كان حالُه من ضيق لـ اضيق
مابقاش قادر
على ضهره يشيل
إشوال الخيش
المتعبيه دقيق بلدي
علشان يعجنها
وتتقرّص
خبّاز يرميها فتعدي على سير بيلف
النار من تحتُه تسوّيها تتحوّل عيش
عربيتُه اليد كانت شاهده
إنُّه مش قادر عالمهنه
وبصبر جمال
على نظرة ناس بقوا شايفنه بياع جَوّال
بيقول أهو احسن ما اتسول
انا واخد عهد من الأول
ماتكُلش عيالي الا حلال
فـ وجودُه لا انا خُفت الجوع
ولا حتى اخواتي فـ يوم خافوا
وفـ عز الدنيا ما بتعَندُه
واكِّلنا من لحم اكتافُه
واهو لمُّه القبر فـ احضانُه
من بعد ماصارع أمراضُه
الموت فـ الأخر بقى مكسب
دلّوعتك ياابا يادوب أصبح
موظف مش قادر يخطُب
أمي الصعيديه المعجونه
فـ وقت الأزمات برجوله
رجليها اتحنّيت بالطين
علشان ننضف
علشان نعرف
إن اللي بيتعب بيلاقي
وروحها كات لينا سواقي
أروحنا من قبل عَطَشها
ترويها حنين
كات تفزع وقت ما بتشوف
الغلطة من واحد فينا
فبيعرف غلطتُه ويعود
تحضنُه وتأمنُه من الخوف
بتغطي راسها بخمارها
وجلابية عُمْرَها ما تشف
لعيون الناس غير العِفة
أهي كِبرت والعضم بيضعف
وسابتلي المركب والدفّه
يا امايا إبنك بقى واحد
من فشله عمّال يتخفّى
حبتني جداً فالأول
كانت بتقول انها عايشه
علشان ترضيني
تموت لو شافت يوم دمعه
مـ الحزن بتنزل من عيني
وانا كنت بعشق تقطيعها
طفوليه لحظة ما بتضحك
وحورية لحظة مابتمسك
إيديا وتقول لي بـ احبَّك
وانا كل كياني بيسمعها
أول ما قلتلي مافيش مخرج
في حد مع ابويا اتكلم
لازم تطلبني وتتقدم
حسيت وقتها ان انا واحد
من بَعد ما علّق احلامه
فـ فروع النور وقت الفرحه
بيشدُّه من تحتُه السِلّم
حبيبك فارس خيبان
ماخضش عشان حُبُّه معارك
بالعكس جايلك معزوم
زيْ ما معازيم جايه تبارك
إصاحبي يادوب إصحاب قهوه
علاقتنا ببعض ماوصلتشي
لدرجة تكوْن لحن وغنوه
وفـ سرتي طبعاً بيجيبوا
وبـ احس ديماً فـ غيابي
صدى صوت الضحك بيوصلّي
على حزن شايفينُه تملّي
فوق وش بملامح فشلي
طول عمري وانا عَيّل فاشل
جلّا من كل طريق واعر
وعشان ما يطفّي نيران فشلُه
بكلام معسول أصبح شاعر
#ذِكر_ما_لا_يُقال
| |
|
