( المقياس ) قصيدة بالعامية المصرية

المقياس

ماتقيْسش الحُزن بالدّمعات
عشان فيه ناس
بتكفِّن حُزنها فـ سُكات

ماتقيْسش الفرحة بالضحكات
عشان فيه ناس
بتضحك غِش لجل حاجات

ماتقيسش البُعد بالمسافات
دا ياما فيه قلوب جنبك
محسوب فـ نظرها مـ الأموات

ماتقيسش الحُب بـ الكلمات
عشان مافيش كلام يوصف
هذا المُصطلح بالذّات

ماتقيسش الصُحبه باللّمه
ماتقيسش الوضع بالعامّه
والأفضل لينا نِفْتَح قوس
ونقفل لمّا نتأكّد
بإن الوضع لو معكوس
نتايجُه هتبقى سلبيّه

ومع إن الحياة غيّه
ومافيش حمام مالوش فـ الطير
فيه ناس بتقيس أمور ياما
تحت مؤثّر التخدير

#ذِكر_ما_لا_يُقال

» ( تُفّاحه ) قصيدة بالعامية المصرية
» قصيدة بالعامية المصرية ((( العُوره )))
» ( بورتريه ) قصيدة بالعامية المصرية
» ( الأچنده ) قصيدة بالعامية المصرية
» ( زنزانة ٥٢ ) قصيدة بالعامية المصرية