أُمنيّة التمثال
بِقيْت تمثال
ولا بيبكي
ولا بيضْحَك
ولا بيمسِك
ولا بيُترُك
ولا بيوفي
ولا بيُغدُر
ولا عاجز
ولا بيقدَر
ولا غايب
ولا حاضِر
ولا ناسي
ولا فاكر
ولا بيكسب
ولا بيخسر
مهما اتغيّرت أحوال
بشيء ييجي وشيء لزوال
مافيش شيء فـ الوجود حَسُّه
مخاليق حواليه كتير ياما
وبرضو لسّه مع نَفْسُه
يومُه نُسخه من أمسُه
واقف بمسافه متساويه
مابين أملُه وبين يأسُه
من برّه يبان بُحرّيتُه
من جوّه حقيقتُه متأيّد
لا هو صاحي ولا نايم
ولا راقد ولا قايم
مش حَي وبرضو مش مَيّت
مشاعرُه حجاره مش مُمكن
تفجّر للبشر مَيِّه
الصعب عندُه زيْ ساهل
ولو فارق ولو قابل
أو غيرُه شاري أو بايع
أو ضاحك حتى أو دامع
كل الأمور سواسيّه
ماعدش لبُكرة مستنّي
ماعدش قلبُه بيدقدق
مع أي حاجه بتغنّي
لا بيصنّف ولا يحدّد
لو حَد عنُّه راح يبعِد
أو لجل حاجتُه يتودِّد
الأبيض عَندُه زيْ لاِسود
مرور الوقت مايهمِّش
جرُوحُه مش فـ حُسبانُه
تِلمّ زيّ ماتِلمِّش
مافيش فرق بين إنُّه
يكون مُهم عَند النّاس
أو يبقى وجودُه مِتهَمِّش
لا يُمكن قلبُه يتأثر
أُمنيتُه واحده مش أكتر
يشوف مأساتُه دي تِخلص
بإنُّه فجأه يتكسّر
#ذِكر_ما_لا_يُقال