كرَكيب
مين فيكم ناوي يرتّبني
من بَعد الحُزن ما كركبني
وبقيت كرَكيب
ولا واحد فيكم هيرتّب
شايفين الوِحدة بتتشلقب
فـِ القلب الباكي المتعذِّب
ضحكتكم ليّا بتتحول
فـ الأخر ديب
يغرِذ فـ نيابُه وبيمزّع
الروح عمّال بتتقطّع
والوضع صَعيب
كان مين بيطبطب على كِتفي
والله مافيش
النار كات تحرق أحلامي
دُخّانها يخليني أدمع
وبنادي على على خلق كتيرة
مابتسمعنيش
ما انا برضو جبان
لو الاقي جوّايا شجاعه
عن قلبي اللي جايبلي الكافيه
بإيديّا راح اشد الفيش
فـ يبطّل نبض
وطيبه بتوزّع حُبُّه على كُل الناس
مش عاوز اكون أكتر واحد
فـ الكون حساس
الحُب خريف
بيسقّط كل اماني القُرب
فـ قلب شقوق
البُعد كفيف
مايشوفش ألام بتحب الضرب
فـ وقت الشوق
الصُحبه إيدين بتلف حِبال
وبـ اشوفها خيال
مشنقه وانا فيها بقيت مشنوق
جَرّبت تدوق
الخوف من اِنك تبقى وحيد
مع اِن قريبك من حواليك
لكن احساسك بيأكد
اِن اِنت وحيد والخوف بيزيد
حيطان الأوضه بتتقرّب
فـ تحس بضيق
فـ الوقع ثابته فـ مكانها
والضيق بيبانلك فـ خيالك
فـ تشوفُه حقيق
كان مُمكن تضحك ضحكتهُم
كان مُمكن تُسلُك مسلَكهُم
كان مُمكن طب ليه مش ممكن ؟!
علشان مش عاوز تتحوّل
لواحد فـ سبيل مصلحتُه
بيبان غلبان
ويرخص روحه ويتدنّىٰ
علشانها حتى لو اتسوّل
#ذِكر_ما_لا_يُقال
الخميس 29 نوفمبر 2018, 2:24 pm من طرف 
