( إحساسين ) قصيدة بالعامية المصرية

إحساسين

حيرتي فيكِ
سيف ضَرَب إحساسي بيكِ
صَبَحْت اَعاني إحساسين
إحساس بيمسك
طَرْف من توبِك ويبكي
زيّ طفل
أُمُه غضبانه من ابوه
فايتاه وسايبه البيت وماشيه
خايف من عَطَش الحنين
والعكس فـ إحساسي القوي
بيضحك ضحكة مُنتصر
ماقدِرش قلبِك يكسبُه
أو يستميلُه
ضِحْكِتُه حسّاها وإنتِ
جوّه منِّك بيناديلُه
صداها هَز كبريائِك
فـَ انكسر
وانفطر قلبِك آنين
وانا اللي حَبِّك
فـ نفس وقت ما بـ اكرهِك
و بـ اعاني لسّه
من حيرتي بين الإحساسين

#ذِكر_ما_لا_يُقال

» ( تُفّاحه ) قصيدة بالعامية المصرية
» قصيدة بالعامية المصرية ((( العُوره )))
» ( بورتريه ) قصيدة بالعامية المصرية
» ( الأچنده ) قصيدة بالعامية المصرية
» ( زنزانة ٥٢ ) قصيدة بالعامية المصرية