الأچنده
نظرة اُمي لمّا بتوجّهه ليّا
نفسي اَعرف هِيَّ قاصدة اللوم عليّا
والّا على فِعل القدر
تفسّيرها صعب ويحيّر
زي حيرة كل من حاول
يفسّر
فـ القُرءان بعض الحروف
المكتوبة مفرّقه
فـ بدايات بعض السور
نظرة اُمي بترمي بسهام من شجن
ترشق فـ قلبي
يعلن النبض الحداد
على حالة بائسه مُحزنه
بنت عدّا عُمْرها تلاتين سنة
ماهو مش بإدي افضل كدا
مين فـ الحياة اِختار ملامحُه
أنا عِشت عُمْري اَحلم بشاب
يمس قلبي بـ حُب فـ يطيّبلي جَرحُه
أحس شُوقُه ولهفتُه فـ كل لحظة
يبقى عارف إنُّه حتى لو بعيد
خط سيرُه وأي فِعل بيعملُه تحت الملاحظة
ماكنتش اعرف ان الحب شروطه أولها الجمال
كان نفسي افرح
زي كل بنت ليلة عُرسها
كان نفسي جداً فـ العيال
طفلة بتقول لي يا ماما
تمحي أي هموم وحُزن جوّه منّي بابتسامه
واما تكبر حبّتين وتروح يوماتي المدرسة
أدعي ترجع بالسلامة
استنى يوم ما تشوفها عيني عروسة قاعدة فـ الكوشه
وإيديا ماسكه فستنها
والله يارب انا كنت هضحي بكل حاجه علشانها
أهم حاجه أشوفها تفرح
مااهوش بإيدي خيالي يسرح
الحِكمة إيه
الله أعلم
بس متهيألي يعني
إن ممكن ربّنا
يوهبني رحمة و يسمحني
إنّي باتمنى و باحلم
خايفه؟
يمكن
بس خوفي
وقت ما بيحل بـابكي
بدون مايظهر للبشر دموع بُكايه
شايفه؟
يمكن
بس شوفي
بيبقى زيْ سكِّينة تلمه غاويه تدبح فيا لمّا
بـ اَشوف ملامحي فـ المرايه
انا كل ما افتح الأچنده واقرا منها مُذكّراتي
يتعرض قدام عينيا شريط حياتي
وازاي كتبت فـ كل صفحة منها حالة
صفحه فيها الحاله حُزن
صفحه واخده فيها رُكن
بعيد عن العالم بحالُه
صفحه فيها عقلي بيعاتب فـ قلبي
ليه بيرسملُه بخيالُه
لوحة من ألوان أساساً مستحيله
شاب ممكن يوم يحب
بنت فعلاً مش جميله
صفحة فيها عـ السِطور
الكلام حبّة قبور
اتمنى أسكُن قبر منهم
يمكن ألقي فـ قلبُه روضة
من رياض الجنة وافرح
وابتعد عن أي ناس غاويه لما تشوفني تدبح
فيا روحي
القبر جايز ضمّتُه تكون محبة
أحسّها حنيّه بتطيّب جروحي
وصفحة فيها البحر بيقول بانكسار
راميه ليه حِلمِك فـ وسط الموج يقدّف
دون مايعرف
أخر التقديف دا إيه
صعبان عليا اشوفُه يغرق جُوّه منّي
اتصوري
مع إنّي ياما بلعت أحلام من بشر
كانت تإن وهِيّ فـ قلبي بتحضر
الحلم دا بالذات أنينُه
ماانيش عارف بكّاني ليه
ساعات باشوف إن الأچنده
قاصده تبقى معايا جارحه
فـ كل صفحه
تمد عيني بالدموع
تغرّق المناديل وجع
من كام سنة
وانا إيديا متبّته فـ خيط الأمل
واسأل فـ نَفسي
هُوَّ قرّب يتقطع ؟
لو اتقطع أكيد هقع
والوقعه دي مااعرفش إيه هيكون أثارها
حُبي لـ الليل
وقت ما بيحدف ضلامُه عـ البيوت
يصتاد عيون تبتعد عنّي بنظارها
الحُب دا كرّهني فـ الشمس ونهارها
كل شيء حوليّا بيقول لي اُصبُري
لـ حَد إمتى ؟
دا الصبر منّي بيشتكي
فيه فـ الحياة هموم كتير
جايز فـ أچنده تتكتب
وجايز لو غيرنا يقراها ما يحسّهاش
غير وهِيَّ
من صاحبها بتتحكي
#ذِكر_مال_لا_يُقال