بورتريه
قلّب فـ دفاترُه القديمه
بيفتّش زي الخواجه
لمّا بيفلّس يحاول
يفتكر مين كان بيُطلُب
وقت زنقه منُّه حاجه
أصلُه كان ديماً مُبزّر
لمشاعرُه عالخلق تِمّاً
دون ما يبقى فـ حساباتُه
إنُّه يوم يحتاجلهم
برضو مالقيش حد فاكر
بَعد تفتيش الدفاتر
والحقيقه الكل فاتُه
حتى سُوزي
اللي كان عشمان تكمّل
بورتريه
رَسَمِتلُه فيه معظم ملامحُه
بس كان ناقص عينيه
يمكن عشان كات حاسّه إنُّه هيبقى عاجز
فيما بَعد
يحس أصلاً موهبتها
أو إن فعلاً رَسْمها للبورتريه
هيفضل الشاهد على
أوقات خيبتها
رََسِمت ازّاي حَد مُش ممكن يشوف إبداعها فيه
يادي الدموع البادئه رحله
والمسافه بين عيونُه وبين خدودُه
مسافه بين أرض وسما
غاويه النزول للحُزن بمشاعرُه الأسيره
فتلتقي قهر واسى
البورتريه يا سُوزي لو كُنت اِتنَسيت
جوّايه عُمرُه ما يتنسى
لمسة صوابعي لكل زاويه بتحكي عن ذكرى مابنا
عن إبتسامتكِ اللي بتوصّيني أفضل
ملتزم وضع الثّبات
وانتِ بفُرشة فـإيد بترسم
وإيد بتمسك ألوانات
و عن خصامِك لمّا بتوريني ساعتِك
وإني متأخر دقيقه عن المعاد
واتهامِك
إني متلذذ أشوفِك
تغرقي فـ قلقِك وخوفِك
وسط لحظات لنتظار
وعن الهزار
وعن الحصار
لقلبي من شوق لهفتِك
فـ يسلّمك
عن رضا كُل اللي فيه
من حُب يصبح عُهدتِك
صوت ضحكتِك
ماكانش يهوى العزف غير وقت الآنين
يبدّل الحُزن بحنين
والاقيني عايش فرحتِك
لكن خلاص
دي الوقتِ أصبح وضعي ليكِ
مش مناسب
دي الوقتِ لازم
تطب كفّة الخُسارة
مهما كانت المكاسب
دي الوقتِ أصبح قلبي فاقد للونس
بـ اَعلن بإن مشاعري إللي اتوزّغت
بدون حساب
خلّتني في نظر الجميع
رغم الحضور محسوب غياب
قلبي بنك من المشاعر
سَلِّف كُل الخلق حُب
وداخل على حالة فَلَس
صاحبتي صَبَحِت عصايا
هي اكتر حَد مُخلص
لخطوتي ديماً مُعين
أمّا عينيا إللي صبحوا عميانين
ماعدتش قادره زي زمان
تعرِض وشوش
ساعات باقول أحسن كتير
إنهم مابيظهروش
وإنِك انتِ ضمنهم مابتظهريش
الضلمه أجمل حاجه فيها إنّها
بتداري اللي مابيداريش
وبتصنع عالم موازي
نعيشُه لكن فـ الخيال
إيه فايدة النور لو يغش
إيه فايدة الناس لو تكون
معاك وليها ألف وش
يادوب بتِخْلَص مصلحتها
يتقطّع حَبل الوصال
وإنتِ نَفْسِك تشبهيهم
بس الفرق في الجمال
ماعدش باقي حاجه منِّك
غير ياسُوزي بورتريه
وماعدش باقي حَد ليا
غيرُه هُوَّ
طب ووصف الحالة إيه ؟
وحيد ومين يسأل عليه ؟
#ذِكر_ما_لا_يُقال