تُفّاحه
كان لازم افهم وقتها
ان الحكايه كُلّها
حقيقه مـ النوع المُزيّف
يجوز باخرّف
بعد شُرب كاس فُراق
خلاني أسكر مـ الوجع
بس وحياة بوسه منِّك
فوق شفايفي
صوتها فـ وداني اتطبع
انتي قلبِك مش جدع
عشان ماكُنتش يوم بـ اشوفِك
غير ملاك
مُستحيل شيطان يمسُّه
قلبي كوكب دون حياه
لو ماكُنتيش انتي شمسُه
ملعون أبو دين الحنين
اللي بيشرّع بشوق
لفهه في بُعد الأحبّه
كنتي الوطن بيضُم روحي
قبل ما يضُم البَدَن
وفجأه حسّستيني غُربه
بقيت غريب
وانا اللي عشت كام سنه
فيكي بابني كام مقام
لكل ضحكه بتضحكيها
لكل كلمة بتنطقيها
مافيش عَدد
يوصف مقامات اللي حبِّك
ووزع قلبُه يطوف عليهم
كُنت انا المجذوب واتوب
ازاي وسايب روحي فيهم
مُعتكِفه رغم اللي كان
واللي باقي
هَجر سكاكينُه بتدبح
الشوق المحتاج حنان
إضحكي
وعيشي الحياه
بدوني نغم
بيوزّع الأحزان بعدل
على مشاعري المحتاجاكي
دا انتي من شِدة أساكي
على قلبي العاشق هواكي
دهوستيه بمليون قَدم
سيبيني أنعي حلم بإيديكي اتهدم
مش باقي منُّه غير كلام
واجمع شتات روحي
من وسط الحُطام
واسد باب
تملّي يجي منُّه ريح
فاستَرِيْح
لا كُنتي عذرا
بعد ما كفلتِك بـ قلبي
ولا كُنت انا بدون خطيئه
كالمسيح
انتي الخطيئه
تفاحه على شجره بتغري
بالجمال
وقت ما تقطُفها تشعُر
بالألم
فازاي ادوقها وارمي روحي
للندم
ينهشها نهش
صَنَعت من ورق القصايد
اللي بتتكلّم فـ سرتِك
ليا نعش
محمول على أربع كتاف
كتف من حُبي اللي خاف
يوم الفُراق
وكتف من إخلاص وطيبه
إمتزجوا بضعف وغباء
وكتف من حبّة صور
ملامحنا فيها من السعاده
مزوّقه
وكتف من كل الشوارع
اللي شِهدت عـ اللُقا
#ذِكر_ما_لا_يُقال