عيد تايب يوسف
عضو متميز
عدد المساهمات : 222
نقاط : 508
السٌّمعَة : 5
تاريخ التسجيل : 30/07/2015
 | موضوع: ( مشهد موت ) قصيدة بالعامية المصرية  الأحد 25 نوفمبر 2018, 1:46 pm | |
| مَشهد موت
إضاءه .. تنوّر
كلُّه مكانُه .. سكوت .. هنصوّر ????
(الكلاكيت) ????
مشهد فيه بلياتشو وناس
من نمرتُه ماتملّش تضحك
والأطفال بتشوفُه بتفرح
نصيبُه الليله
يزورُه الموت على خشبة مسرح .
(أول مرّة) ????
( المُخرج ) .. أكشن . ????
حاسس ضحك الناس حواليه
ويّه الفرحه فـ عين أطفال
إدين بتزّقّه يمين وشمال
فـَ تدلدق من روحُه الحُزن
في نظركم المسرح إيه ؟
ستاره وخشبه
وكراسي بتشيل جمهور
هُوَّ فـِ نظرُه المسرح حُضن
وأصدق رُكن
بَعد ما كل اركان الدنيا
اتخلّت عنُّه
كانلُه فـِ عِز الضلمه النور
الموت خد منُّه ابن وحيد
الليله وقبل معاد نمرتُه
دَفَنُه وباقي تراب القبر
يبان فـ ملامحُه
كمان شابطان لسّه فـ هدمتُه
منظرُه متعفّر
خلّي الناس مـ الضحك تسخسخ
وهُوَّ مخبّي مرار دمعتُه
فـِ جيوب ضحكتُه
من برّه سَليم من جوّه مشرّخ
لازم ما يبيّنش دموع
علشان رزقُه فـ ضِحك الناس
من غيرُه ازاي
هيسد إيجار
ويسد الجوع
عينيه بتبرّق
حَس بطعم الموت وكأنُّه
فـِ بحر وفيه مخاليق عالشط
تتفرّج على مشهد مُمتع
سِر المُتعه بطلُه بيغرق
مين هيصدّق
عَرقُه النازل فجأه يلخبط
ألوان وشُّه
إنّها فعلاً سَكَرات موت
ومش ألاعيب وذكاء بلياتشو
بتخلّي الجمهور مبسوط
الموت مع إنُّه حقيقه كبيرة
تملّي تكون أقرب للشك
خُرم الإبره
أوسع مِيْت مره من الخُرم
المفتوح لخروج الروح
فيلم العُمْر فـ سيما الدنيا
قُدّام عينُه ومافيش غيرُه
بيتابع أحداث العرض
حَس البرد
زي مايكون مليون مرزبّه
فـِ كل عروقُه بشِده تِهد
ورغم دا كلُّه اتطمن قلبُه
لمّا التقى ترانيم لملايكه
من حواليه صوتها بيرسملُه
سكّه لوحدُه من غير ناس
بتفصّل من نور إيمانُه
توب بمقاس
يستُر روحُه
بعد ما فارقت جسدُه خلاص
المسرح فاتح درعاتُه
وخشبتُه حُضن بيتستقبل
البلياتشو
فـ أخر مشهد لُه فـ الدنيا
اللقطه أخيره
ماعدش فجيبُه أي ذخيره
يقاوح بيها
ويحاول مـ الوقعه يقوم
أهو أصبح عالمسرح مرمي
والجمهور عمّال بيصقّف
لِص صحيح بالضحكه بيخطف
حُزن قلوبهم
ويبدّلُه بهجه وأفراح
أخر مرّه هيسرق منهم
ساب الدُنيا بحالها وراح
هايل جداً .. قوم خلّصنا
مشهد مش محتاج يتعاد
تعاله بُسرعه الحقنا يا فندم
فيه إيه تاني إنت وهُوَّ
ماتغيروا ياالله الديكورات
اللي مثّل دور بلياتشو
مالو يا سيدي ؟
فعلاً مات ؟! #ذِكر_ما_لا_يُقال | |
|
