إستفهام
سهل تجرح
صعب تبقى جريح
لو طُلت تدبح
بدل ماتبقى دبيح
اوقات بتكدب
لجل تبقى صَريح
كام باب قَفَلتُه
بيّجي منُّه الريح
بس الحقيقه
لسانها مُرّ فصيح
فَتَحِت بِبانك
من تاني بـ المفاتيح
ماتقولش صاحب
الكلمة دي بـ الذّات
خاضعه لمصالح
بتكُـرّ فـ ملذّات
تضرب فـ ضَهرَك
فـ الوِشّ تبقى مديح
هي اللي سابت
واللا انت سِيْبت إيديك
لـ حِبال فـ دابت
وقِعِت منها واَديك
دموع عينيك
شموع ألم بتسيح
الضِحْك ماسخ
لو اتنسخ من حُزن
الحُب فارغ
لو افتقد للحُضن
أوقات نمثّل
واحنا مُضطرّين
جوّانا ميّت
بيرسم التفاريح
الحرب واحده
بس العدو بـ وِشّين
في وِش منهم
ماتشفوف بـ العين
يظهر فـ ساعة
ماتبتدي تخسر
أقرب ماليك
وِش لعدو يا حزين
ماسندش كِتْفَك
بقيت بدونُه كسيح
كام مرة وطنك
كان بيقفل باب
فـ وِش حلمك
تحس منُّه عذاب
مافيش مرور
لـ حِلم دون تصريح
سِكِتّ واللا
كان الكلام ممنوع
فـ وقت لمّه
كَسَرِت لـ حق ضلوع
رَمَوْهُ فـ بحر
وصُراخُه مش مسموع
من فَرط جوع
بتنهشُه التماسيح
الصُبح نَفَسُه
يخُرج بـ صَدر الفجر
والفجر عُمْرُه
ما طالبُه مرّة بـ أجر
بالعكس حتى
دا من فرحتُه تلقى
الفجر هالل مزيناه تواشيح
أمَلَك فـ بُكرة
لسّه بنبضك حَيّ
والشمس قادرة
تملى عينيك بـ الضَيّ
يونس فـ كَرْبك
واللا خلاص قلبك
اليأس مَلَكُه فـ مَلّ مـ التسبيح ؟
#ذِكر_ما_لا_يُقال