قصيده بالعاميه المصريه ((( البَراءَة )))

البَراءَة

( مُفتتح )

كانت فـ عينيا البَراءَة

واخده حقـّها

وبتطوي الأرض زي البُراق

في ليلة الإسراء

كـُنت عـيّـل

أفرح ببلـّونه ملوُّنه

واشوف جواها العالم

بعد ما انفوخها

يادوب ساعة وتفرقع

واُمي من كتر عياطي

كات تمسك نـَفوخها

يمكن كات فضلـِت طفولتي

لو نفوخ اُمي اتصالح مع عياطي

عدّاد عُمْري قَلَب عـ الإحتياطي

فـ عَجّزت بدري

مافيش بنت هتعاشر عجوز

واديني عايش بنـُص دين

جايز اقدر اكمّلـُه

بكتابتي للشِعر فـ يومين

( النَص )

زيّ باقي البني آدمين

يوم ميلادي

ويوم وفاتي

سكـّتين

بنهم حياتي

خيط مشدود من ناحيتين

ظاهرلي أجزاء مـ الحقيقه

الباقي منها متداري

كـَف الزمن قافل عليه

عضّيت صوابعـُه بكام سؤال

بيقولوا ليه

أحلام بتتعشّم تطير

مش لاقيه فـ الواقع وسيله

أغاني بتـُهجُر لحنها

والصبر مُفتاحـُه الغـُنا

والسكـّه لسّاها طويله

يسرسب السؤال سؤال

ومستمرّه السرسبه

وانا فـ انتظار الأجوبه

بهدؤ طيور متوكـّله

طايره وعارفه ان الزمن

أصدق بفعلـُه من نوايا الأسئله

مابادّعيش الدروشه

ماانيش وَلـْي

لكن رجليّا ساعات تاخُدني

لجل ازور الأوليا

واشوف براءة ضحكهم

من عجزهم

على مساعدة سآئلين

تهتز ليها الأضرحه

وتفكـّرني بهزّه أعنف

كات لروحي

لمّا اليتامى استغربوا

إزاي انا بنهم يتيم

واُمّي على قيد الحياه

فـالوقت دا

اليأس من حوالين براءتي

لـَف حبل المشنقه

اترجّى فيه

يرحمها من يُتم وشقى

وعينيا بتسحّ فـ بُكا

لكنـُّه ماقبلش الرجا

والخوف شرخ فـ قلبي شرخ

إزّاي راح اكبر

واُمّي مش مُعترِفه بيّا

كأن انا ابن لزنا

وماليش هِويّه

وكل ما اكبر

شرخ الخوف فـ قلبي يكبر

أحس روحي

فيّا مش لاقيالها مطرح

أنسى حُزني ازّاي وأفرح

بعد سِرقِت ضحكتي

أوتار سنين عمري بتعزف

غُربتي

اللي عايشها فـ موطني

فوق كتافي جبال هموم

وضهري قرّب يتحني

والشمس فوق راس الجروح

مبهدلاها من العَرَق

وانا كل شيء فيّا اتسرق

والباقي منـّي كام قصيده

حبيسه في حبة ورق

و اما جالها فرصه تهرب

الهوا كفكف خُدودها

قبل ما تعدّي حدودها

رجّعها للحبس تاني

يا عُقده صيباني فـ لساني

بـ احلم وانتِ منعاني

أتكلـّم يفقهوا قولي

يتلون الكون بالبَراءَة

فـ احب كل شيء حولي

لك كل الشكر والتقدير على مجهودك الرائع والمميز
نتمنى من الكل ان يستفيد من هذه المعلومات القيمة

مـجـهـود رائــع جميل حداااا
مشكورين عالطرح الجميل

احسنت الاختيار تـسلم تسلم عالطرح الراقى
يدوم عطائك المميز . تحياتى مع الشكر

مجهود رائع مواضيعك دائما تتسم بالتميز
بارك الله فيكم ويارب دايما فى تالق

» قصيده بالعاميه المصريه (( اللعبه ))
» قصيده بالعاميه المصريه (( نفرتيتي ))
» قصيده بالعاميه المصريه (( يونس ))
» قصيده بالعاميه المصريه ((( القيثارة )))
» قصيده بالعاميه المصريه ((( القِبله )))