أنا مش هـَ نافـقِـك وامدحِك
لو لم أكـُن مصرياً
ماكـُنتش اتمنى إنـّى اكون مصري
انا مُش مريض نـَفسيـاً
دا كلامي لهُ معنى دي حقيقة مش بـَهـزي
وقبـل ما تلوموني
صارحوني جاوبوني ليه بيحـرِموني
في بلدي مـن حـقــّــي
بـِالظلم ذلـّوني لمّا اِنحنى ضَهري
وفـ ارضي حَبَسوني بـذ ُلــّي وبـقـَهري
كسَروني خـلـُّـوني مااقبلش على نـَفسِي
يكونوا دُوُل أهلي
ولا حتى احلم بـ مصر تبقى فـ يوم وطـَني
انا المواطن اِلبسيط اِللي فاكـرينهُ عَـبيط
انا الفلاَّح بـِطاقيتي وجلابيتي
وبفاسي وطين اِلغيط ياما شَكِيت
ولا حد كان سامِع
انا العامِـل فـ قلب اِلمصنع بـانتِـج واصنـَع
بطلـُب حقي ومين يسمع وهل ينفع
أتعب وحقي ضايع؟!!!!
انا الشاب اِللي اِتـقـتـل فيه اِلأمل
انا فـ مدارِسكـُم إتعلـِّـمت من كـُلـِّياتكـُم اِتخـَرَّجت
ومش لاقي فـُرصة عَمل
دا العَلام طريق نجاح بقى فـ بَلدنا طريق فـَشل
آه يا بلد حالها فـَسد فيكي اِلحياة لا تـُحتـَمل
فيكي اِلمواطِـن أصبح غريب جُوُّه الوطن
عايش ولكن فـ نـَظـَرِكِ رِخيص مالوش تمـن
ومش هـَمِّـِك لو كان محتاج أو مامعاهـُوش حـق اِلعلاج
أو حتى مش لاقي اِلسكن
وأجمل حـلّ بتقوليه يشُوف رصيف ينام عليه
واِلمريض مايموتش ليه
ما يستلِف حق اِلكفـن
دا لسّه ما فرَضناش ضريبه عَـ الميِّت لمّا بيندفِـن
وهَـنـِصدِر بيها أكيد قرار
يـُفرض على كل اِلأعمار
اِنتظروا مِعـَاد تطبيقها خلال فتره بسيطة مـن اِلـزمن
أنهـِي شخص مـُغفـّـل اهبل اِللي يتجنِـن ويقبل
يكون مواطن في وطـن غرقان في بحر من اِلعفن
ليه بقى مستغربه ومستعجبه!!
لردّ فعلي ومش شايفـِك مستوعِبه
فوقي واِنتبهي يا مصر
انا مش سَّـفِـيه أو واحـد قـليـل أدب
إذا اِتعرف إيه اِلسبب بـِطـِل اِلعَجَب
وانا عَندي تسعين ألف عـُذر
يمنعـُوني لو بـ إيدي اِلاِختيار
إنـِّي ليكي أنتمي أو حتى بيكي أحتمي
أو يبقى ليِّا فيكي دار
يا مصر أصـل اِلإنتماء نابع مـن قلب اِلوَلاء
واِلمفروض يكون موجود
ما بـِنـّا على حداٍ سواء
يعنى نتبادِل بـِالحُب انا وانتي ودّ وعطاء
حتى لو كان فيه فـُراق
يدوب ما بـِنـّا فـ بحر إسمُهُ اِلإشتياق
هُـوَّ ده معنى الوفاء
إحساس يا ريتـِك تفهَميه وتبطـَّلي جهـل وغباء
بس اِلمقصود من كلامي يستحيل هتنفـِّذيه
إزاي يا مصر اطالبـِك بيه
وفاقد اِلشيء لا يـُعطيه؟؟
وبـَعد كـل اِللي سمعتيه
مستنـّيه مِنـّا إيه؟!
لمّا نوصف أحوالِـك
نتكلم بس عن اِلمحاسن و اِلمفاتـن و لـُونِـك اِلقمحي و جمالِـك
ونِـفضـل نقول كلام معسول و نـرددوا و نلـحَّـنـوا و نـغـنـِّيه
مانِقولش إيه إديتنا مصر نقول هَـ ندِّي إيه لِـ مصر
هُـوَّ ده اِللي انتي عايــزه تسمعيه
كلام أغاني وطبل وزمر
كأن اِللي بيقولهُ مـُغيب
مش قادر يدرك اِللي بـيجرَى من حواليه
ماهوش داريان بحقيقة اِلأمر
زي السكـران مـن شـُرب الخمر
وإذاي ألـُوم واعتب عليه
بس كلامُهُ اكيد يا مصر بـ يفرحِـك ويـريِّحِـك
أمّا أنا فـ شايفه كلامي بيجرحِـك ويمكـن يا مصر بيفضحِـك
أهم شيء إنهُ بيعبـّر عـن حقيقه
ما انا مش هَـ نـَفقـِك وامدحِـك
ما يهمِّـنـِيش تفهَميه بـ أنهي طريقه
إفهَميه واِعقليه بـ أي طريقه تـريحِـك