تحيا مصر حُرَّة
ورجـِعـتـى يا مصر من تاني محبوسه بأمر سجَّانِـك
يا حبيبتي بس ذنبـِك إيه
وميـن سَلـِّمِك لإيديه
قوليلي يا مصر ميـن خانِـك
مين عـن الحـق بيبعد وليه نهارِكِ بقى اِسود
جَلاَّدِك كل يوم يجلد
ضَهرِكِ ألف جَلده وجَلده
يعني اِللي كانت سَيده
بتِركع واهِي طالبه اِلرضا
من سجَّنها اِللي اِرتضا
تبقى لـ جزمتهُ عَبدَه
ياما بـ إيدينا صَنـَعنـَا حُكـَّام علينا بَـقـوا فـراعنة
اِللي بيقتل واِللي بيظلم واِللي يخون
فرعون ورآ فرعون ورآ فرعون
وِاِحنا بتـزيد أوجاعنا
اِلخُوف سلسِلنا أجمعنا
قولنا سَمِعنا وأطـَعنا
ولمّا وَرا موسى مِشينا فرعون اِللي كان بـيئذينا
غِرِق وشـُوفنا بـعينينا
وشاء ربـّك ينجِّـينا
من وسط اِلـيَّـم عدّينا بعد ما عدّينا نسينا
موسى اِللي كان قلبهُ علينا
رِجـِعنا لِـفرعون وأدينا
بنلومهُ واِحنا اِلـعِـيـب فينا
فرعون من تانى بيستعلى
وصوت طـُغيانهُ بـِالعسكـر عن صُوت الحق بقى أعلى
يا خُوفى تمجَّدوه أكتر
ويبقى ربـُكـُم الأعلى
ومهما عِلِي فرعون وزاد بـِالظـُلم وطغى في اِلبلاد
ونشر فـ رِبوعها الفساد
بطش ربّك برضو شديد
سبحانهُ ذو العرش اِلمجيد
يشاء ويفعـل ما يُـريد يـُمهل ولا يـُهمل أكيد
إن ربّك بـالمـرصاد
لكـل ظالم حدد يوم يـرُدّ فيه حقوق العباد
وِاِحنا برضو هَـنتسِـئِــل عن اِلشَهيد اِللي اِِتـقـتـل
واِللى دَمّهُ سال عشان يفتحلنا طاقه أمـل
واللا التضحيه بـِالروح واِلدمّ
شيء في نـَظـَـرنا ماعَدش مـُهم؟؟
وجَمع اِلمَكاسب واِلغنايم دا اِللي بـالنسبه لنا أهم!!
اِلكل أصبح مُـتـّهم يوم اِلشهيد ما اتهزم
لحظة ما تـَركنا اِلميدان
نـَده علينا مردِّناش دمّهُ ليه يضيع بلاش
دا لسّه ريحتهُ فـ المكان
كان صُوتهُ زي صوت اِلأذان
للجميع قال اِسمعوا من بَعدِي بلاش تتفرََََََّقوا
وتسيبوا غيركم يسرقوا
مصر منكـُم ينهبوها ويخنوها ويبيعوها
بَعد رحيلـَك يا شهيد اِلوصيه ضيِّعوها
بـ الـفـُرقه مصـر سَلـِّموها
بـَقت فـ إيد فرعون جديد
أصدر أوامر يحبسوها
يكلبشوها بـِالحديد
ليه فـرَّطنا فـ الوصيه واِلشَهيد أصبح شريد؟؟
واِلبلد صَبَحِت تكيِّه
يعني لـ غيــرنا بـَقت وِسِيِّه
واِحنا اِختارنا نكون عابيد
رضينا اِزاي على نـَفسِنا تضيع كرامتنا منـّـنا
فرعون من تانى يـزلــّـنا يستقوى علينا بضعفنا؟؟؟
مع أنهُ من جُوُّاه جبان
لازم ندعي رَبّـنـا يرزُقنا بـ موسى يلمّـنا
يرجع يجـَمَّع شملنا ياخـُـد بـ إيدينا كـُلـّـنـا
نوصل معاه لـ برّ الأمان
مايكونش فيه زُلّ وهَوان
ولا أي سُّـلطه مُستبدّه
مابتسمعش لـ صُوت مُعارضه
واِلفـُرقه تتحُّول لـ وِحده
وجمُوع اِلشعب تبقى واحده
واقفه جاهزه ومُستعدّه
لأي حد يحاول اِنهُ على حُرِّيتها يستعدّى
وأي وضع مُؤسِف
اِلشعب اِلمصرى كلهُ يخرج ضدّه يهتِف
فـليسقـُط أي حاكم فرعون على شَعبهُ ظالِـم
بـ إهانه وبمذلـَّه
فـلتسقـُط أي سُّـلطه حواليها حاشيه فاسده
عن حُب واطنها ضالـّـه
لِـتـُـنـكـّس أي رايات أحـزاب أو جماعات
مـُضِلـّه ومُـستـَـغِــلـّه
ولـ تحيا مصر حُـرَّة
فـَلتحيا مـُستـَقِـلـّه