طريقة عمل الشمع المعطر فى البيت بالصور

طريقة عمل الشمع المعطر فى البيت بالصور


المقادير
* شمع ( اى شمع مكسر عندك فى البيت وشمع السبوع )
* كوباية ازاز مستغنية عنها بس يكون شكلها لطيف
* حاجة تسخنى فيها بصى الافضل انها تكون حاجة مستغنية عنها عشان تنضيفه رخم ممكن علبة سمنة صغيرة او ازازة عصير ياهو بس تعملى حمام مائى ساعتها
* فتلة اى شمعة من المتكسرين
* بنسة شعر
* زيت عطر خام
* لو حابة تلونيه ممكن تلونيه باى الوان صناعية او طبيعية انا استعملت دم غزال وممكن زهرة عشان تديكى اللون الازرق والكركم للون الاصفر

اه فى حاجة لو هتعملوه فى قوالب اشكال ولا حاجة ولا حتى بتاعة الكاب كيك ابقو ادهنوها فازلين عشان تسهل خروجها

الطريقة بقى
نسيح الشمع كده



بعد ما نسيحه
ننزله من ع النار ونسيبه يهدى ثانية واحدة عشان بيتجمد بسرعة واضيف عليه الزيت العطر
ونبتدى نصب الشمع فى الكوباية ونكون مثبتين الفتلة فى النص بالبنسة






وده الشكل بعد ما اتجمد



ممكن تكتفى بالمنظر ده ولو عايزة بقى تعمليه منظر جمالى ومج الالوان لازم نكون عاملينه من الاول بشمع لونه ابيض
وبعد ما هنعمله بالطريقة العادية هنعمل فيه فتحات خروم كدة بحاجة حديد او ممكن خلة اسنان او بتاع الشيش طاووق معلش نسيت اسمه



نبتدى نضيف الالوان بسلاكة الودان مش عارفة الزهرة ودم الغزال عشان بودرة هينفعو هنا ولا لا لانى استخدمتهم فى تلوين الشمعة كلها وانا بسيحها مش عشان اعمل المنظر ده بس نجرب ورانا ايه



بعدين نشغل عليهم السشوار او نحطهم فى ماية دافيه عشان الالوان تتداخل وتبقى بالمنظر ده






شكله جميل صح

وادى شوية صور تاخدوا منها افكار

ده شكل كوباية لذيذة



وده شكل قوالب روعة












وممكن فى نص قشرة برتقانة

واتمنى اكون افادتكم بالموضوع