قصة (( في الحلال ))

في المساء إتصل إسلام بفاروق ليقابله ويأخذ رأيه في الأمر وذلك لأنه دائما يحب سماع أراء فاروق ويثق بها ، تقابلا وصافحه فاروق وسأله عن أحواله فقال :

- الحمد لله أديني مطحون أهو في الشركه دي ربنا يقدرني ، بس إنت عارف ؟ رغم إني كتير جـــدا بحس إن أنا الوحيد اللي براعي ربنا في شغلي والباقي نايميين ومقضينها أكل وهزار وشاي ومعرفش إيه ، لكن برضو ببقي مرتــاح جـــدا لما باخد المرتب وبحس إن هو حلال وإني أستحقه فعلا

نظر له فاروق نظرة إعجاب ثم تنهد بحسره وقال :

- هو ده الحال في معظم الوظايف للأسف ، المهم بس الواحد يراعي ربنا في شغله وميبصش للتاني ويقول إشمعني لأن كل واحد فينا يوم القيامه هيتحاسب علي نفسه وبس

أومأ برأسه مؤيدا ثم تذكر فجأة موقف ما جعله يقفز في سعاده كالأطفال وقال :

- عارف يا فاروق ؟ حصلت حاجه تحفه أوووي في شغلي الإسبوع ده

نظر له فاروق بلهفه وقال :

- خيــــر ؟

تنهد بأريحيه وقال :

- فاكر لما قولتي أبقي أسيب الشغل وقت الصلاة وأروح أصلي وأرجع ؟ رغم إن سعات المدير كان بيضايقني ومش بيوافق إلا إني برضو كنت بصر علي رأيي وأروح ، الإسبوع ده بقي لقيت اتنين صحابي في الشغل بقوا ييجوا يصلوا معايا وبيقولولي إنهم كان نفسهم يعملوا كده من زمان مع المدير بس مكانوش بيقدروا

أمسك فاروق كفه وربت عليه بخفه وقال :

- والله أنا فخور بيك يا إسلام فوق ما تتخيل

إستمع إسلام إلي هذه الكلمات وهو في سعاده بالغه وقال مازحا :

- عارف بيقولولي إيه كمان ؟ بيقولولي إنت ناقصلك لحيه وتبقي شيخ علي حق ، رغم إني مبعملش حاجه غير إني بعاملهم بما يرضي الله وبصلي وبتقي ربنا في شغلي ، سبحان الله ميعرفوش أنا كنت إيه في الأول ، اللهم لك الحمد .

نظر له فاروق بدهشه وقال :

- تصدق بالله ؟ أنا كنت لسه بفكر في موضوع اللحيه ده ، من زمان اوووي وأنا نفسي أعفي لحيتي بس مش عارف إيه اللي كان مأخرني لكن من يومين كده كلمت نهي وإتفقنا إننا نقرأ أكتر عن اللحيه والنقاب وبعدين نقرر ، بس كلامك ده حمسني ، بشرة خير إن شاء الله

تبسم له إسلام وقال :

- ربنا يوفقك يـــافاروق

نظر له فاروق بحماس وقال :

- طب بقولك إيه يا إسلام ؟ ما تيجي نعفي لحيتنا إحنا الإثنين وأهو نكون بنساعد بعض علي رضا ربنا وناخد الثواب سوا

نظر لها بدهشه وقال :

- لأ يابني لحية إيه دلوقتي ، صعب اوووي وانا مش أدها أصلا

- طيب فكر تاني في الموضوع وإقرأ عنها برضو وشوف

- إن شاء الله

وفجأة تذكر إسلام الموضوع الأساسي الذي أحضر فاروق لأجله فقال :

- بقولك إيه يا فاروق ، فاكر البنت اللي قولتلك إني عاوز أتقدملها دي ، إيه رأيك أروح دلوقتي وأنا مش جاهز ولا إستني ولا أعمل إيه ؟ أنا خايف تروح مني

نظر له بترقب وقال :

- إنت مش جاهز خالص يعني ولا إيه نظامك ؟

أجابه بالنفي قائلا :

- لأ الحمد لله بابا الله يرحمه سايبلي مبلغ كويس بس مش هيكفي برضو ، وكمان سمعت إن والدها عاوز حد غني يعني فقلقت بصراحه

نظر له فاروق بحماس ممزوج بالسعاده وقال :

- أيوه يابني روح طبعــا وبإذن الله ربنا يقدم اللي فيه الخير ، يعني ممكن يوافقوا علي إمكانياتك وممكن إنت تطول الخطوبه شويه لحد ما تجهز نفسك وطبعا ساعتها مرتبك كله هيتحوش للجهاز وممكن ربنا يرزقك بمكافئة أو تثبيت أو أي حاجه تزودلك المرتب شويه متقلقش .

رجع إسلام بذاكرته قليلا ثم قفز من مكانه بسعاده وقال :

- تصدق فعلا كانوا بيقولوا إنهم كل سنه في شهر 9 بيثبتوا واحد من اللي شغالين جداد ، وده طبعا بيكون علي حسب الكفاءه والضمير وكده ، وإحساسي بيقولي إني انا اللي هتثبت علشان أنا أكتر واحد بشتغل في الموظفين الجداد ، احم احم ده بفضل ربنا طبعـــا

ربت علي كتفه عدة مرات وقال مطمئنا إياه :

- خلاص يبقي إنت تروح تتقدم فـــورا وربنا ييسرلك الأمور

ثم قال مؤكدا :

- وبعدين يا عم لو ليك نصيب فيها محدش هيقدر يمنعكم عن بعض ، كل دي حجج البشر بيعملوها لكن اللي ربنا كاتبه هيحصل مهما كان ، إتطمن بقي

إبتسم إسلام بسعاده وقال :

- تصدق والله أحسن حاجه قولتها ، هي فعلا لو من نصيبي محدش هيقدر يمنعها عني ، هروح بقي وربنا ييسر الأمور إن شاء الله ، إدعيلي هاه

- حـــاضر

____________________

عاد إسلام إلي المنزل وذهب مباشرة إلي غرفة هند وقال بحماس :

- يلا روحي قوليلها إني عاوز اتجوزها بقي

أخذت هند تضحك ضحكات متواصله أغضبته فقال :

- وهو أنا قولت حاجه تضحك للدرجادي يعني ؟!!

أشارت إلي الساعه المعلقه علي الحائط وقالت بتعجب :

- إنت شايف الساعه كام ؟

نظر للساعه وقال بعدم فهم :

- اه 10 فيها إيه يعني ؟

أخذت تضحك مرة آخري وهي تقول :

- وأنا اروح أبات عندها دلوقتي يعني ولا أعمل إيه ؟

نظر للساعه مره آخري فوجدها العاشرة مساءا بالفعل فضرب جبهته بيده وقال محرجا :

- أوبـــس ، معلش مش مركز

نظرت له بمكر وقالت :

- اللي واخد عقلك بقي

أزاحها علي الفراش وقال مازحا :

- نامي يا هند يا حبيبتي شطــوره ، وبكره إن شاء الله إبقي روحي عند طنط سلمي جارتنا !

- ماشي هعديها مزاجي ، بكره بإذن الله أروحلها ونشوف

___________________

بالفعل ذهبت هند في اليوم التالي إلي منزل سلمي ، جلست كل منهما تحدث الآخري عن الكثير من أمور الحياة ، كانت سلمي تتحدث بينما هند تفكر كيف تفاتحها في الآمر وأخيرا إستجمعت شجاعتها وقالت :

- سلمي هو إنتي ممكن تتخطبي دلوقتي ؟

نظرت لها سلمي متعجبه وقالت :

- إيه يا هند مانتي عارفه رأيي من زمان في الموضوع ده !!

تنحنحت قائله بحرج :

- طيب لو جالك واحد زي ما بتتمني بالظبط توافقي ؟

نظرت لها بتوتر وقالت :

- وده هيجيلي منين ده ؟ قولي يا هند اللي عندك علطول قلقتيني

تنهدت تنهيده قويه وحاولت ترتيب كلماتها وقالت :

- أنا جايبالك عريس وفيه تقريبا كل المواصفات اللي إنتي عاوزاها ، هينفع ييجي دلوقتي ولا المبدأ مرفوض أصلا ؟

أسندت رأسها بداخل راحة كفها وقالت بقلق :

- طيب وهو مين العريس ده بقي ؟

أجابتها علي الفور :

- إسلام أخويا

إتسعت عينا سلمي وقالت بتعجب :

- إسلام أخوكي ؟!!

نظرت لها هند فشعرت بالتوتر وقالت بصوت هامس :

- اه وحش ولا إيه ؟

تنحنحت سلمي بإحراج وقالت متعذره :

- لأ والله مش قصدي ، علي عيني وعلي راسي طبعـــا ، بس يعني إنتي عارفه تفكيري كويس ومتهيألي إسلام أخوكي مش زي الشخص اللي في بالي خالص !!

تنهدت هند بأريحيه وقالت :

- لأ يا سلمي ده إسلام إتغير خــــالص ، ده حتي يا بنتي ....

وأخذت تقص عليها التغييرات التي طرأت علي أخيها ، شعرت سلمي بالسعاده وهي تستمع إلي كلمات هند ، ليس لأنها تتحدث عن إسلام بحد ذاته ولكنها دائما ما تفرح عندما تعلم أن هناك شخصا آخر عرف الله وإقترب منه أكثر ، إنتظرتها سلمي حتي إنتهت من كلماتها وكادت ان تتحدث ولكنها لم تجد ما تقوله فصمتت ، قالت لها هند متسائله :

- هاه إيه رأيك ؟

أجابتها بقلق :

- مش عارفه بصراحه

- طيب حتي قوليلي رأيك مثلا في شكله أو في الكلام اللي سمعتيه او أي حاجه

شعرت بالإحراج فقالت بصوت خفيض :

- بصي الكلام اللي أنا سمعته جميل طبعـا ويفرح أي حد ، وبالنسبه لشكله فأنا مشوفتهوش من زمان فمش مركزة في ملامحه يعني ، بس أصلا مش مهم عندي الشكل ، أهم حاجه من جواه عامل إيه

أخذت تحرك يدها بحماس وهي تقول :

- طب قولي بقي يلا يلا يلا

ضحكت بشده وقالت :

- أقول إيه بس ؟

- قولي إنك موافقه ، أنا عارفه إنك موافقه يا أروبه بس مكسوفه ، وعموما يا ستي اقعدوا مع بعض وشوفوا هتتفقوا ولا لأ

نظرت لها سلمي بجديه وقالت :

- طيب إنتي متأكده من الكلام اللي قولتيه عليه ده ؟

ثم قالت بمرح :

- مش علشان أخوكي بقي وكده هـــاه بدل ما أعرف الحقيقه وأعورك

ضحكت مؤكده وقالت :

- لأ والله كل اللي قولته عليه حقيقي ، وأصلا إنتوا من بعد ما بدأتوا تلتزموا وإنتوا شبه بعض جـــدا وأنا بصراحه عاوزه أخلص منكم إنتوا الإثنين وارتاح بقي

نظرت لها بقلق وقالت :

- طيب بصي هفكر وأقولك

نهضت هند من علي الفراش متجهه إلي باب الغرفه وهي تقول بجديه :

- خلاص قشطه هقوله إنك وافقتي ، إبقي عرفي باباكي بقي علشان ميتفاجئش لما إسلام يتصل بيه

قفزت سلمي من مكانها في فزع وقالت :

- يا هند إنتي بتهزري ؟!!

أطلقت ضحكات متواصله وقالت :

- إنتوا ما ينفعش معاكم إلا كده ، يلا أنا همشي بقي ماشي ، سلام عليكم

وقبل ان تستطيع الكلام وجدتها قد إختفت من أمامها فقفزت علي الفراش بخفه وسعاده وقالت :

- والله مجنـــونه !

_________________

عادت هند إلي المنزل فوجدت إسلام في إنتظارها ، نظر لها بلهفه فلم تعره أي إهتمام فقال بحزن :

- رفضت صح ؟ أنا كنت حاسس ، يلا كل شئ نصيب

وغادر المكان متجها إلي غرفته ، أسرعت الخطي خلفه وقالت بتعجب ممزوج بالمرح :

- ياعم هو أنا هلاقيها منك ولا منها ، بطلوا جنان بقي جننتوني معـاكم وأنا غلبانه أصلا وفي حالي

جلس علي حافة فراشه ونظر لها بيأس وقال :

- ماهي لو كانت وافقت كنتي هتقولي علطول ، خلاص بقي حصل خير

جذبته من يده وأوقفته أمامها مباشره وقالت :

- ركز معايا كده وبلاش شغل الأفلام ده هاه ، وإسمعني كويس

نظر لها بترقب وقلق ولم يتحدث فأمسكته من ذراعيه ونظرت في عينيه وقالت بصوت مرتفع :

- إسلـــــــام ســــلمــــــي وافــــقــــــت

لم تنتبه إلا عندما سقط أمامها علي الأرض فضربت علي قلبها بقوه وصرخت قائله :

- إسـلــــــــــام

لــ #رقيه_طه

هو مات ولا إيه ؟ ‏‎‎‏ رمز تعبيري

وإيه رأيكم في موقف هند كأخت وصديقه ؟

ورأيكم في الحلقه بقي متنسوش

يـــــــــارب الحلقه تعجبكم ‏‎‎‏ ^__^

في الحلال

الحلقه الحاديه والعشرون :

أمسكت هند إسلام من ذراعيه ونظرت في عينيه وهي تقول بصوت مرتفع :

- إسلـــــــام ســــلمــــــي وافــــقــــــت

لم تنتبه إلا عندما سقط أمامها علي الأرض فضربت علي قلبها بقوه وهي تقول بصراخ :

- إسـلــــــــــام

حاولت تحريكه يمينا ويسارا ولكنها لم تستطع فهرولت إلي الخارج وصرخت بأعلي صوتها مناديه والدتها ولكنها قبل أن تصل إلي غرفة والدتها سمعته يقول بمرح :

- بـت يا هند

عادت للغرفة ونظرت إليه بفزع وهو مازال مستلقيا علي الأرض وقالت بخوف :

- إسلام مالك ؟

نظر لها بتعجب مصطنع وقال :

- إيه ياختي عمرك ما شوفتي واحد ميت من الفرحه ولا إيه ؟!!

نظرت له بإندهاش وقالت :

- إنت بتهزر ؟ ولا إنت تعبان بجد ؟ ولا متفاجئ ولا إيه ؟!!

نهض من مكانه وجلس علي حافة الفراش محاولا التعديل من هيئة رابطه عنقه الغير موجوده أصلا ونظر لها بغرور وقال :

- يا بنتي أتفاجئ من إيه ؟ منا عارف إنها هتوافق أصلا ، هو أنا في واحده تقدر ترفضني

عقدت ذراعيها أمام صدرها وقالت بعصبيه :

- يا إسلام إنت بتستعبط !! هو ده وقت هزار أصلا ؟ وبعدين هي مقالتليش إنها موافقه اوي يعني

إنتفض من مكانه وهو ينظر لها بخوف ورفع حاجبه قائلا :

- اومال إنتي بتقولي وافقت إزاي ؟

جلست بجواره ووضعت ساقا فوق الآخري وقالت بتعالي :

- ههههههاي شوف من شوية كان عاملي فيها رئيس الجمهورية ودلوقتي أخره فرخه مشلوله

وكزها في ذراعها بشده وقال بصرامه :

- هند إخلصي وافقت ولا لا ؟!!

رفعت حاجبها ونظرت له بإستفزاز ولم تتحدث ، وكزها مره آخري بعصبيه وقال :

- يا بت إخلصي

نظرت له بإبتسامه وقالت مازحه :

- خلاص حرام صعبت عليا هقولك وأمري لله ، بص هي طبعا كانت مكسوفه وكده ومقالتليش حاجه ، بس يعني مكانتش رافضه فأنا بقي أخدتها في دوكة وقولتلها هقول لإسلام إنك موافقه وطلعت أجري ، بس يا سيدي

نظر لها بإعجاب وقال مشجع ا :

- جدعه يا هنود ، طالعه راجل من ظهر راجل

نظرت له بإستهزاء وقالت :

- هنشوف ياخويا الراجل ده هيكون شكله عامل إزاي لما عمو باباها يكلمك

نظر لها بثقه وقال :

- متقلقيش ، هستخبي تحت السرير بس

_______________________

أخذت سلمي تفكر في الامر في حيرة ، فكلام هند عن إسلام أسعدها بينما هي رافضه تماما لفكرة الخطوبه أثناء الدراسه ، ولكن ماذا إذا كان إسلام رجلا بحق ؟ ماذا لو كان هو الشاب الذي تتمناه ؟ هل ترفضه بسبب إنشغالها بالدراسه ؟ أم تقبل به وتجلس معه لتعرف عنه أكثر وبعدها تقرر ؟ تنهدت بعمق ثم تذكرت كلمات هند وإنها سوف تخبر إسلام ان سلمي وافقت علي رؤيته بالفعل ، فطردت الأفكار عن رأسها وحاولت التفكير في أمر آخر .

كيف ستخبر والدها ؟ هل سيوافق عليه أم انه اقتنع بوجهة نظر سلمي ولن يتدخل في حياتها قبل ان تتخرج ؟ أخذت تفكر كثيرا حتي إستجمعت شجاعتها وقررت الذهاب لإخبار والدها بالأمر كي يكون علي علم عندما يتصل به إسلام ،ذهبت إلي غرفته وطرقت بابها بخفه وقالت هامسه :

- بابا حضرتك صاحي ؟

أجابها من الداخل علي الفور :

- تعالي يا سلمي

دخلت وجلست بجوارة وقالت بهدوء :

- بابا في عريس عاوز يتقدملي وأنا مش عارفه أعمل إيه ؟ حضرتك رأيك إيه ؟

نظر لها بتعجب وقال :

- مش إنتي قولتي مش هوافق علي حد قبل التخرج ؟ بس عموما يعني لو غيرتي رأيك أنا معنديش مشكله طبعا ، بس هو مين العريس ده ؟

أجابته علي الفور :

- إسلام أخو هند صاحبتي

نظر لها بتفكير وقال :

- طيب وده مواصفاته إيه ؟

أخذت تتذكر كلمات هند وقالت مبتسمه :

- هو مهندس ومحترم وشايل مسئولية هند ومامته من زمان وشغال في شركة كده بس نسيت إسمها

نظر لها بإعجاب وقال :

- مهندس ، طيب حلو جــدا يعني هيعيشك في مستوي كويس

إبتلعت ريقها وقالت بتوتر :

- اه طبعا إن شاء الله

إبتسم لها قائلا :

- خلاص ماشي نشوفه واللي فيه الخير يقدمه ربنا

نظرت له بسعاده وقالت :

- هقول لهند بقي علشان تخليه يتصل بحضرتك

- ماشي

_____________________

وبعد ثلاثة أيام قالت هند وهي تتجه مسرعه إلي غرفة أخيها :

- إسلام سلمي إتصلت بيا وبتقولي إنها بلغت باباها بالموضوع خلاص ، دلوقتي بقي المفروض تتصل بيه إنت وتحدد معاه ميعاد

نظر لها بسعاده وقال :

- قشــطه بقي

ثم قال بحيره :

- هما الناس بيقولوا إيه في الحاجات اللي زي دي ؟ يعني أتصل بيه أقوله ياعمي أنا عاوز أتجوز بنتك ؟!!

أطلقت هند ضحكات متواصله وقالت :

- ياعم أنا مالي قول اللي إنت عاوزه ، المهم تتكلم بس

ثم أمسكت بهاتفها وقامت بالإتصال بوالد سلمي وأعطته الهاتف علي الفور ، تفاجئ من سرعتها ونظر لها بفزع وقبل أن يستطيع التحدث سمع صوتا يقول :

- السلام عليكم

إبتلع ريقه قائلا بحرج :

- وعليكم السلام ورحمة الله وبركاته

صمت للحظات محاولا الحصول علي أي كلمة ولكنه لم يجد ، أخذ ينظر لهند بقلق ويحاول إستغاثتها لتخبره بأي شئ يقوله ولكنها لم تفعل فسمع الصوت مره آخري يقول :

- مين معايا ؟

قال بتوتر :

- أنا إسلام يا عمي أخو هند صاحبة الأنسه سلمي بنت حضرتك

- أهلا يا إسلام إزيك ؟

- الحمد لله يا عمي بخير

ثم تنحنح قائلا :

- كنت حابب أحدد ميعاد مع حضرتك علشان أجي أتقدم للأنسه سلمي

قال بجديه :

- طيب يابني إحنا فاضيين بكره او الإسبوع الجاي اللي يريحك

- خلاص بإذن الله نيجي بكره ، ممكن علي الساعه 7 كده كويس ؟

في الحلال

- تمام كويس

- ماشي يا عمي بإذن الله قبل الميعاد هتصل بحضرتك ، سلام عليكم

- وعليكم السلام ورحمة الله وبركاته

أخذ يكرر الضغط علي زر الإغلاق للتأكد من أن والدها لن يسمعه بعد الآن ، إرتمي علي الفراش بإجهاد قائلا لهند :

- مكنتش أعرف إن الموضوع صعب أوي كده ، أنا حاسس إني قربت أنصهر

نظرت له بإستعلاء وقالت :

- ههههاي وأخيـــرا بقي هعرف أفرح فيك ، قولتلي بقي إني راجل من ظهر راجل هاه ؟

قذفها بالوساده بمرح ثم إبتسم برجاء وقال :

- طيب الله يخليكي يا هند هاتيلي الحته اللي علي الحبل بقي ولمعيلي الجذمه وكده يعني ، ولو عندك شويه برفيوم من أي نوع ميضرش برضو

رفعت حاجبها قائله بغضب :

- ألمعلك الجذمه ؟ أهي دي أخرتها كمان !! أنا خلاص دوري خلص لحد كده ، قابل بقي يا معلم

_________________

- يا سلمي تعالي عاوزك

قالها والدها بعدما تحدث مع إسلام وحدد معه موعد الرؤية الشرعيه ، حضرت علي الفور وقالت بإبتسامتها المعتاده :

- نعم يا بابا

نظر لها بجديه وقال :

- العريس هييجي بكره بعد المغرب إن شاء الله

نظرت له بإنتباه وقالت :

- بكره بكره يعني ؟ اليوم اللي طالع ده ؟!!

أجابتها ضاحكا :

- أيوه بكره اليوم اللي طالع ده

عادت للخلف قليلا وقالت بحياء :

- ماشي يا بابا اللي تشوفه

تركته وعادت إلي غرفتها وهي تحدث نفسها بصوت مرتفع قائله بتعجب :

- بكره ؟ طب بكره إزاي ؟ أوام كده ؟!! إستر يـــــارب

سمعتها ولاء فإقتربت منها وقالت بدهشه :

- هو إيه اللي بكره ؟

تنهدت بسعاده وقالت :

- إسلام أخو هند جاي يتقدملي بكره

قفزت ولاء من مكانها وقالت بفرحه :

- إسلـــــام ؟ كويس جدااااا ، ده ولد شيك وروش آخر حاجه

ثم نظرت لها بإستنكار وقالت :

- بس إنتي اكيد مش هتوافقي عليه أصلا !!

تبسمت سلمي وقالت :

- شيك وروش ؟ طب والله كويس ، وضيفي عليهم بقي كلمة ملتزم

نظرت لها بتعجب وقالت :

- ملتزم إزاي ؟!!

حاولت إستفزازها وقالت بسعاده :

- أيــوه يا بنتي ماهو من سنه وشوية كده بقي معقد زيي الحمد لله ، يعني دلوقتي شيك ومعقد في نفس ذات اللحظه ، والله حاجه تفرح

ثم نظرت لها بعدم فهم وقالت :

- بس صحيح إنتي إزاي عرفتي إنه شيك وروش زي ما بتقولي ؟ ده أنا نفسي صاحبة اخته اهو بس معرفش عنه حاجه

قالتها علي الفور :

- لأ ما أنا كنت دايما بشوفه مع اصحابه في الشارع ، يلا ما علينا المهم إنتي توافقي بس

تنهدت بحيره وقالت :

- قــــولي يـــارب

_______________________

في اليوم التالي إرتدت سلمي ملابسها وجلست علي الفراش بتوتر كعاده كل فتاة في ذلك الوقت ، سمعت جرس الباب فإزادت ضربات قلبها بشده ، إقتربت من باب غرفتها وفتحت منه جزء صغير لتستطيع رؤية أي شئ ولكنها مع الأسف لم تري شيئا ، ولكنها سمعته وهو يتحدث مع والدها ومن الواضح ان والدته فقط هي التي معه ، أخذ يحدث والدها عن عمله وأخلاقه وعائلته ووالده المتوفي وحياته وأشياء من هذا القبيل ، بعد عدة دقائق سمعت أصوات أقدام والدها تقترب من غرفتها فتبينت انه ات ليأخذها ، توترت أكثر حتي وجدت باب غرفتها يُفتح من قبل والدها وهو يقول لها :

- يلا يا سلمي

سارت خلفه علي إستحياء وجلست في المكان الذي أشار إليه والدها ، ظل الاب يتحدث عن إبنته ودراستها وأخلاقها ومعاملتها لهم وهي صامته تماما لا تتحدث ، تبتسم وفقط ، نظرت والدتها لوالدها نظرة ذات معني ، قام الأب وطلب من سلمي الجلوس مكانه وإستئذن هو للذهاب للداخل قليلا ليحضر شئ ما ، بينما نهضت والدة سلمي بصحبة والدة إسلام وجلسا في الغرفة المفتوحه علي الصالة في مواجهة إسلام وسلمي مباشره ، نظر لها مبتسما وقال :

- ازيك ؟

أجابت بخجل :

- الحمد لله

صمت قليلا وأخذ يفرك يده بالآخري في توتر ويحدث نفسه قائلا :

- فيــــــن الإسئلة اللي كنت محضرها !!

كاد أن يضرب رأسه بيده ليتذكر أي شئ ولكنه تذكر انها ستراه فأحس بالإحراج وحدث نفسه مره آخري قائلا :

- ياض مانت لسانك طويل علطــــول ، إشمعني دلوقتي ، يــــارب أي حاجه شكلي بقي وحش

ثم وجد نفسه يحدثها بدون تفكير :

- بتحبي الرغي ؟

نظرت له بتعجب ممزوح بالخجل وقالت :

- رغي ؟!!

إنتبه لما قال فتنحنح بإحراج قائلا :

- هكلمك عن نفسي يعني ، تحبي أختصر ولا أقولك كل حاجه ؟

ظلت تفكر للحظات وهي تقول لنفسها :

- طيب لو قولتله يقول كل حاجه عن نفسه ممكن يقول مدلوقه ، وفي نفس الوقت برضو انا عاوزه اعرف كل حاجه ، متهيألي ده حقي أصلا !

إجابته علي الفور :

لا إتفضل حضرتك قول كل حاجه تحبها

نظر لها مبتسما وبدأ حديثه قائلا :

- إحنا عندنا 2 إسلام ، إسلام بتاع زمان وإسلام بتاع دلوقتي ..

أنا عيشت أكتر من 20 سنه من حياتي كده بدون هدف ، كان هدفي الوحيد أكون عايش مبسوط ومتفوق وبس ، مكنتش أعرف أنا مخلوق ليه ولا مهمتي في الدنيا دي إيه ولا أي حاجه ، كنت بمعني أصح مستهتر ومش بعمل حاجه مفيده ، يمكن الحاجه المفيده الوحيده اللي عملتها هي اني اتحملت مسئولية ماما وهند وكمان ده مكنش بمزاجي ده كان غضب عني لما بابا الله يرحمه مات .

أما بقي دلوقتي الموضوع مختلف ، يمكن إتأخرت شويه بس الحمد لله ربنا هداني ، من حوالي سنتين إلا شويه كده بدأت أقرب من ربنا وأصاحب صحبة صالحه ، بدأت أعرف أنا عايش ليه ؟ عرفت إن هدفي الأساسي هو الجنه ، وإن كل حاجه بعملها في دنيتي دي المفروض توصلني للجنه ، مذاكرتي وشغلي ونومي وأكلي وجوازي وأولادي وأهلي وكــــل حاجه بعملها في حياتي لازم أعملها بس علشان أرضي ربنا ، عرفت يعني إيه بجد إحساس إنك تستشعر قرب ربنا منك ، تحس بجد بكلمات القرآن بتلمس قلبك ، تحس إنك مش عايز حاجه من الدنيا دي غير رضا ربنا وبس ، أي نعم أنا لسه في بداية الطريق لكن بحمد ربنا في كل وقت إنه هداني قبل ما أموت وانا بعيد .

السبب بقي في تغييري من إسلام رقم 1 لإسلام رقم 2 هو حبيبي وصديق عمري محمد الله يرحمه

محمد ده كان كتله خيـر وحنان ماشيين علي الارض ، كان دايما بيوجهني للطريق الصح ودايما واقف جنبي في كل مشكله تقابلني ، كان بيحبني أكتر من نفسه وكان بيقولي كتيــر اوووي اننا لازم نقرب من ربنا قبل ما نموت بس أنا كنت مستهتر اوي ساعتها ومكنتش متخيل أبدا انه ممكن يروح مني كده بين يوم وليله ، ومن ساعتها بقي بدأت أفوق لنفسي وأعرف أنا عايش ليه وأقرب من ربنا وأفهم أكتر عن ديني وكده ، رغم إن هو مش معايا دلوقتي بس روحه عايشه جوايا أصلا وبإذن الله أي حاجه حلوه بعملها دلوقتي تكون في ميزان حسناته .

نظر لها بإبتسامه وهو يمسح علي عينيه ببطء حتي لا تخرج منها دمعة حائره ، تنهد بعمق وقال :

- هو ده بقي إسلام

أخذت سلمي تستمع إلي كلماته وهي ما بين السعاده والحزن والتأثر والفخر ، أحست بمشاعرها مختلطه تماما وما إن إنتهي حتي قالت بصوت خفيض :

- ربنا يرحمه

تبسم وهو يقول بأدب :

- ممكن انا بقي أسألك ؟

- إتفضل

صوب نظرة تجاهها وقال :

- مين هي سلمي ؟

إتسعت إبتسامتها وهي تقول :

- أرغي برضو ؟

أومأ برأسه إيجابا وقال بمرح :

- اه إرغي

تنهدت بعمق وهي تنظر للارض وبدأت حديثها قائله :

- سلمي برضو نفس نظام حضرتك كده ، يعني كانت عايشه حياتها كلها كده وخلاص ، كانت دايما بتحس إن ليها دور في الحياة بس هي مش عارفه إيه هو ، بتحس إن حياتها ناقصه حاجه معينه بس هي مش عارفاها ، من الأخر كنت عايشه وخلاص زي ناس كتير لحد ما ربنا رزقني ببنوته من علي الفيس إسمها حفصه عرفتني علي جروب كده شقلب حياتي كلها ، إتعلمت منه حاجات كتير جـــدا ، عرفت أنا عايشه ليه وإيه هدفي في الحياة ، بدأت أغير من نفسي والحمد لله بطلت حاجات كتير كنت بعملها غلط ولسه بحاول أكمل طريقي أهو ، كمان غيرت تفكيري تماما وأهدافي ، دلوقتي بقيت أهدافي كلها متعلقه بالجنه وبقيت بعمل أي حاجه علشان أرضي ربنا وبس ، مش هنكر ان سعات بييجي عليا وقت ضعف كده ومش بكون عارفه أعمل أي حاجه ، ويمكن كمان الموضوع ده زاد بعد ما حفصه سابتني واتجوزت ، بس برضو الحمد لله ربنا مقويني وبيرجعني تاني للطريق المستقيم .

أحس إسلام بالسعاده وهو يستمع إلي كلماتها ، فكأنها تتحدث عنه هو وليس عن نفسها ، راوده سؤال كان لابد منه فقال بلهفه :

- لو ربنا رزقك بزوج كويس بس فقير هتوافقي ؟

همت بالتحدث ولكنه قاطعها مسرعا وقال :

- عاوزين نتفق علي حاجه الأول ، كل كلمة هنقولها هنا هنكون مقتنعين بيها 100% ماشي ، يعني مش عايزين نزوق الكلام والحاجات دي ، أكيد كل إنسان فينا مهما كان كويس برضو جواه حاجات وحشه ، علشان كده كل واحد فينا هيقول اللي بيفكر فيه بكل صدق حتي لو هيبان انه وحش في النقطه دي ماشي ؟ وطبعا علي الطرف التاني إنه يحسن الظن تمام ؟

إبتسمت له وقالت :

- علي فكره أنا أكتر شخص بكرهه في حياتي أصلا الكذاب واللي بيخلف وعده

ثم أردفت قائله :

- علشان كده بقي أنا اوعد حضرتك إني هتكلم بكل صدق ، مبدأيا كده علي حسب درجه الفقر ده ، وعلشان أكون صادقه مش هقدر أجزم إني هقدر أعيش في عشه فوق السطوح مثلا ، لكن لو شقه صغنونه كده حتي لو إيجار والمرتب صغير شويه مفيش مشكله ، وطبعا الشبكه والحاجات دي كلها مش فارقه معايا طالما الإنسان بيخاف ربنا فعلا وهياخد بإيدي للجنه .

أحب إسلام صراحتها ، فكان من الممكن أن تقول انها تقبل زوجها فقيرا وفقط ، ولكنها أرادت ان توضح له رأيها بالتفصيل كي يكون علي نور ، سألها مره آخري قائلا :

- لو قولتلك قوليلي صفات زوجك المستقبلي في جمله واحده وبعدين فسريها في جمله برضو هتقولي إيه ؟

أخذت تفكر قليلا ثم قالت :

- إجابتي هتكون " يكون حد بيخاف ربنا بجد وهدفه الجنه وبس "

والتفسير بقي " إنه لو خاف ربنا فعلا وعاش حياته كلها بيعمل لآخرته أكيد هيكون إنسان كويس بلاشك "

سألها ثانية :

- طيب والصفات اللي حباها تكون في شخصيته ؟

نظرت له في حيرة وقالت :

- يعني يكون راجل بجد ، مسئول ، صادق ، خلوق ،عارف يقول إيه وإمتي ، مش بيرجع في كلمته ، بيساعد أهل بيته ، من الآخر يكون حد قدوته النبي عليه الصلاة والسلام ، يحاول دايما يشوف سيدنا محمد كان بيتصرف إزاي ويعمل زيه

هم أن يسألها مرة آخري ولكنه سمع أذان العشاء فنهض من مكانه وقال باسما :

- أنا هروح أصلي وآجي تاني علشان نكمل

ثم صوب نظره تجاهها وقال :

- ولا مجيش ؟

نظرت إلي الارض بخجل ولم تتحدث ، فقال بمرح :

- أجي تاني ولا أروح علي بيتنا بقي ؟

إنكمشت في نفسها أكثر وكادت أن تنصهر من الإحراج فأحس بها وقال بطيبه :

- خلاص نكمل مره تانيه بإذن الله ، يلا السلام عليكم

نادي علي والدته ووقف عند الباب في إنتظار والد سلمي ليودعه قبل المغادره ، صافح كل منهما الآخر وهبط درجات السلم كالأطفال وهو يقول لوالدته بسعاده :

- والله حلوه حكاية الرؤية الشرعيه دي يا حجه ، ما تيجي نعمل كده كل يوم

ضربته علي كتفه بمرح وقالت :

- إمشي يا واد بدل ما حد يسمعنا ونتفضح

أوصلها إلي المنزل وذهب هو لأداء الصلاه وعندما عاد وجد هند تنتظره بلهفه فدخل غرفته ولم يعرها أي إهتمام فقالت بغضب :

- يا سلام يعني أخدت مصلحتك مني وطنشتني علي كده ؟!! قولي عملت إيه يا عم !

رفع حاجبه قائلا بتعالي :

- عاوزه حاجه يا أنسه ؟

وكزته في ذراعه بشده وقالت بضيق :

- إسلام خلص بجد !

جلس علي حافة الفراش ونظر لها بسعاده وقال :

- هييييح ماشي ، مبدأيا كده يا ستي أول ما قعدت قدامها حسيت إني معاق مكنتش عارف انطق ولا كلمة وكل الاسئله اللي كانت في دماغي طارت والحمد لله ، روحت بقي قعدت أحكيلها عن نفسي وهي كمان حكتلي عن نفسها وكده وبس

رفعت حاجبها قائله بإستنكار :

- يـــاراجل !! هو ده بس اللي حصل

ضربها علي كتفها بطرف يده وقال بخجل مصطنع :

- ما تكسفينيش بقي يا هند الله

ضحكت قائله :

- أهم حاجه بس عملت فيها مؤدب ولا عرفتها إنك مجنون ؟

- والله يا بنتي أنا حاولت أعمل مؤدب علي قد ما اقدر بس اللي فيه طبع بقي ، عموما متقلقيش أنا هعرفها إني لاسع حبتين أو هخليكي تقوليلها ، إحنا أتفقنا علي الصراحه في كل حاجه .

ثم نظر لها مستنكرا وقال :

- وبعدين هو حد لاقي واحد كيوت زيي كده اليومين دول ؟

كادت ان تضحك ولكنها تذكرت شيئا هاما فجأة وقالت :

- صحيح إتفقت مع باباها إنك هتبلغه برأيك إمتي ؟

ضرب رأسه بشده وقال بدهشه :

- أوبــــس ، تصدقي نسيت !

لــ #رقيه_طه

إيه رأيكم في الحلقه ؟

كمان قولولي متخيلين شخصيات الرواية شكلهم عامل إزاي او إستايلهم إيه وكده ؟

وإيه المواقف اللي أثرت فيكم ؟ وإيه المواقف اللي حسيتوا إنكم شايفينها بالفعل ؟

في الحلال

#في_الحلال

الحلقه الثانية والعشرون :

عادت سلمي إلي غرفتها وهي في غاية السعاده ، فكلمات إسلام جعلتها تشعر وكأنه الشخص الذي تبحث عنه طيلة حياتها ، يفكر مثلها وأهدافه وصفاته قريبه منها وأيضا بدأ إلتزامه في نفس الفترة التي بدأت فيها هي ، كانت تشعر وكأنها تجلس أمام نفسها وليس امام شخص آخر ، كل هذا جعلها تشعر بالراحه المبدئية تجاهه ، قطعتها ولاء من تفكيرها عندما دخلت عليها قائله ب...مرح :

- هاه عملتي إيه يا عروسه

إرتمت سلمي علي الكرسي المجاور لها وقالت بسعاده :

- عملت كل خيــر

نظرت لها بلهفه وقالت :

- هاه يعني وافقتي ولا لأ

رفعت حاجبها قائله بتعجب :

- أوافق علي إيه يا بنتي ؟ هو أنا لحقت ؟!! مش لما أصلي إستخاره الأول وافكر كده

جلست بجوارها قائله بهمس :

- طيب هتبلغيهم برأيك إمتي ؟

إنتبهت سلمي فجأة وقالت :

- تصدقي بابا مقالش حاجه عن الموضوع ده ، ولا إسلام كمان !

أطلقت ضحكات متواصله وقالت :

- الواد إتلبخ يا عيني ، يلا ما علينا ، المهم يعني هتعرفوا رأي بعض إزاي ؟

أجابة سلمي بإبتسامتها المعتاده :

- أولا متقوليش واد علشان كده عيب ، ثانيا عادي أكيد هند هتتصل بيا في أي وقت وتقولي رأيه وبعدها بقي أنا أقول رأيي

ضحكت ولاء بمرح وقالت :

- عيب ؟!! وماله

ثم إلتفت لها بإنتباه وقالت :

- طيب قوليلي حسيتي إنك عجبتيه يعني ؟ تلقاه يا عيني إتصدم لما شافك وكأنك لسه صاحيه من النوم كده

زفرت سلمي بضيق وقالت :

- ولاء إحنا مش إتكلمنا في الموضوع ده قبل كده ؟ وقولتلك ساعتها رأيي وهفضل متمسكه بيه ، وبرضو مش هحط نقطه ميك اب واحده علي وشي وهطلع بطبيعتي جــــدا ، لو عجبه كده تمام معجبهوش يبقي خلاص ده نصيب ، أكيد يعني مش هفرح لما أكب وشي في جردل ميك اب والولد يا عيني يعجبه الشكل وبعد الجواز يشوفني علي الطبيعه ويتصدم !!

انا بحب شكلي كده وواثقه في نفسي الحمد لله ، واللي مكتوبلي هيتجوزني علي شكلي ده ومن غير ما أضطر إني أخدعه او اظهر بشكل غير شكلي ، وساعتها يا ستي لما نتجوز هيبقي يشوف شكلي بالميك اب براحته .

تنهدت ولاء بملل وقالت :

- ماشي يا ستي براحتك ، بس ده الطبيعي يعني !!

أومأت برأسها نفيا وقالت :

- الطبيعي فعلا إنك تكوني علي طبيعتك تماما ، علشان لما يتجوز يشوف الأحلي مش الأوحش ، فهماني ؟ وبعدين أبسط حقوقه يعني إنه يبقي عارف شكلك الحقيقي ، صح ولا إيه ؟

- ماشي

_____________________

في اليوم التالي ظل إسلام يدور في غرفته في حيرة ، فهو لم يستطع التحدث مع سلمي إلا قليلا ولم يعرف عنها سوي القليل ، ذهب لغرفة والدته وطرق الباب بخفه وقال بهدوء :

- ماما إنتي صاحيه ؟

نهضت من فراشها بتثاقل وقامت بفتح الباب وقالت بحنان :

- أيوه صاحية تعالي

دخل الغرفه وجلس بجوارها وقال بجديه :

- ماما هو إحنا ينفع نروح لسلمي تاني ؟ علشان إمبارح ملحقتش أتكلم معايا كتير يعني ولسه معرفش حاجه عنها برضو .

إبتسمت قائله بحنان :

- يعني إنت لسه مش عارف تحدد إذا كنت موافق ولا رافض؟

تنهد قائلا بسعاده :

- هو أنا غالبا يعني موافق ، بس برضو حابب أعرف عنها أكتر وكده ، ينفع نروح مره كمان ولا خلاص كده ولازم أقول رأيي ؟

ربتت علي كتفه قائله بإبتسامه :

- اه ينفع عادي ، خلي اختك تكلمها وتشوف رأيها إيه في الموضوع ده ، بس خد بالك خليها تجس نبضها الاول وتشوف مايله للقبول ولا للرفض ، علشان لو هي رفضت هيكون شكلك وحش لو عرفت إنك عاوز تروح تشوفها تاني ..

نهض من مكانه وقال بحماس :

- متقلقيش يا كبيره ، هروح بقي أشوف البت هند

وقبل أن يغادر الغرفه وجد هند بإنتظاره وهي تقول بمرح :

- تم سماع كل شئ بنجاح ، والآن سوف يصل هذا الكلام إلي الأخت سلمي ويقال لها إنك موافق وبتستعبط نيهاهاهاهاهاها

أمسكها من شعراتها ورفع حاجبه قائلا بمرح :

- إبقي إعمليها كده وأنا هوريكي ، فاكرة الجثه اللي كانت هتكون تحت الشباك هاه ؟

أفلتت شعرها من يده وإبتلعت ريقها قائله بخوف مصطنع :

- تمام يا فندم تم نسيان كل ماقيل وجاري الإتصال بسلمي

عادت لغرفتها وإسلام خلفها وأمسكت بهاتفها وقامت بالإتصال بسلمي وقالت :

- السلام عليكم

- وعليكم السلام ورحمة الله وبركاته ، أخيـــرا بطلتي ألــو دي

- بطلت ياختي بطلت ، المهم عاوزه أعرف رأيك في الموضوع

نظرت سلمي للمرآه وهي متعجبه وقالت :

- رأيي في إيه يا بنتي هو أنا لحقت ؟ ده أنا كمان لسه مصليتش إستخاره والله

نظرت هند لإسلام بسعاده وقالت بصوت مرتفع :

- إيــــه ؟ بتقولي موافقه ، يا ألف نهار أبيض يا ألف نهار مبروك

إنتابتها حاله من الذهول وقالت بصراخ :

- موافقه إيه يا هند إنتي بتستعبطي ؟

ثم نظرت للجانب الآخر وقالت بتساؤل :

- وكمان بتعلي صورتك كده ليه ؟ اوعي يكون في حد جنبك يا هند !

غمزت هند لإسلام وقالت ببراءه :

- لأ مفيش حد جنبي ده إسلام بس

زفرت سلمي بضيق وقالت بصوت هامس :

- هنــــــد إنتي بتهرجي ؟!! في حد يعمل كده ؟!! إتفضلي صلحي اللي عملتيه ده بقي علشان خليتي شكلي وحش حرام عليكي

أطلقت هند ضحكات عاليه وقالت :

- يا ستي مش بهرج ولا حاجه

ثم نظرت لإسلام وقالت :

- ما قالتش إنها موافقه ياعم ، أنا اللي بستعبط

ثم عادت لسلمي مرة آخري وقالت :

- المهم كنا عاوزين نيجي مره كمان ينفع ولا إيه ؟

في الحلال

تنهدت بحيره وقالت :

- مش عارفه ، قولوا لبابا وشوفوا رأيه إيه ؟

قالت بسرعه هائله :

- قشـطه ، يعني موافقه إننا نيجي تاني ، ماشي هقول لإسلام يكلم باباكي ، يلا سلام

وأغلقت الهاتف بسرعه ، نظر لها إسلام بتعجب وقال :

- ليه اللفه دي كلها ؟ ما كنتي قولتي اللي إحنا عاوزينه وخلاص !!

صوبت نظرها تجاهه وقالت بجديه :

- كان لازم أجننها شويه علشان أحس من طريقة كلامها إذا كانت موافقه ولا لأ ، ولما حسيت انها ممكن تكون موافقه قولتلها إننا جايين وقفلت بسرعه علشان متتحرجش

ثم نظرت له بثقه وقالت :

- في حاجات كده يا إسلام لازم تستخدم فيها ذكائك ، ومن الذكاء إنك تستعبط في بعض المواقف علشان متحرجش اللي قدامك وبرضو توصل للي إنت عاوزه .

نظر لها إسلام بفخر وقال بمرح :

- تصدقي إنتي برنصه

نظرت له بتعالي وقالت :

- عارفه عارفه

_____________________

إتصل إسلام بوالد سلمي وطلب منه الحضور لعمل رؤية شرعيه ثانيه قبل إخبارهم بقراره ، وافق الاب علي ذلك وتم تحديد الموعد في الإسبوع القادم ، كانت سلمي أيضا سعيده بهذا القرار ، فهي لم تعرف شيئا عن إسلام سوي انه تحول من شخص غير ملتزم إلي شخص أكثر جديه وإلتزاما ليس إلا ، لا تعرف شيئا يذكر عن حياته ولا عمله ولا قراراته ولا مسئولياته ولا أراءه في بعض الأمور ولا أي شئ آخر سوي ما قاله هو وما قالته هند عنه ، مر الإسبوع ببطء شديد ولكنه إنتهي أخيرا وجاء يوم المقابله ، عاد إسلام من صلاة العصر وما أن دخل منزله حتي سمع رنين هاتفه المحمول ، أجاب فإذا به فاروق فقال مبتسما :

- يا رااااجل إنت لسه فاكرني ؟!! عمال أتصل بيك طول الإسبوع وإنت مش بترد عليا !

ضحك قليلا وقال علي الفور :

- أنا تحت البيت

أسرع إسلام الخطي نحو الشرفه وأطل منها فلم يري شيئا فقال متعجبا :

- إنت فين ؟

قال فاروق مازحا :

- يا عم إنزل بس وهتشوفني

هبط درجات الدرج علي عجل ووقف أمام الباب فلم يري شيئا ، أمسك بهاتفه وكاد أن يتصل علي فاروق مرة آخري ولكنه سرعان ما ظهر أمامه قائلا بمرح :

- تـاتـاتـاتـــــــاه ، إيه رأيك بقي في المفاجئه دي ؟ شكلي حلو صح ؟

عاد إسلام للخلف وهو ينظر له ذبهول ثم قال مداعبا إياه :

- عملتها برضو يا مجنون ، يعني مش طولت دقنك بس ، لا كمان جلبيه بيضا وحركات

أطلق فاروق ضحكات عاليه متواصله وقال :

- طولت دقني !! إسمها أعفيت لحيتي يا عم الحاج ، هفضل أعلم فيك لحد إمتي بس ؟!!

جذبه إسلام من لحيته وقال بمرح :

- والله حلوه ، أهو الواحد يلاقي حاجه يشدك منها برضو

ثم أخذ يلعب في شعره ليستفزه وقال :

- والشعر الحلو ده بقي مش هيتغطي ولا إيه ؟ لأ ومسرح وحاطط كريم وعاملي فيها برنس ، مش لايق علي فكرة

أبعد يده بخفه ورفع حاجبه قائلا بإبتسامه :

- لأ حلو كده وعاجبني ، عقبالك بقي يا أخ

أخذ يحرك رأسه يمينا ويسارا عدة مرات وهو يقول برفض :

- لأ يابني بعيده اووي وصعبه كمان ، خليني ماشي واحده واحده كده

تنهد فاروق بسعاده وقال :

- بس عارف ؟ بقيت مرتاح اووووي دلوقتي لما أعفيتها وحسيت كده إني مسئول وقدوه وبحاول دايما أكون مثال للملتزم اللي بجد من الداخل والخارج ، كمان والله اللحيه هي اللي بتربيك مش إنت اللي بتربيها ، لإنك لو فكرت تعمل أي حاجه حرام بتلاقي نفسك تلقائي بتقول أنا ملتحي ما ينفعش أعمل كذا ، فبتساعدك بقي علي إنك تكون أفضل ، كمان بصراحه لما قريت حديث الرسول صلي الله عليه وسلم :

" قصوا الشوارب وأعفوا اللحى ، خالفوا المشركين " رواه البخاري ومسلم

وإن جمهور العلماء إتفقوا علي وجوب إعفاء اللحيه وحرمة حلقها أخدت قراري بقي إني أعفيها علشان أتشبه بحبيبي وقدوتي سيدنا محمد عليه الصلاة والسلام وأتبع سنته زي ما ربنا قال في القرآن :

" وَمَا آَتَاكُمُ الرَّسُولُ فَخُذُوهُ وَمَا نَهَاكُمْ عَنْهُ فَانْتَهُوا "

" لَقَدْ كَانَ لَكُمْ فِي رَسُولِ اللَّهِ أُسْوَةٌ حَسَنَة ٌ "

بجد دلوقتي أنا مبسوط فــوق ما تتخيل يا إسلام وبقيت بندم علي كل لحظه عيشت فيها من غير لحيه ، متضايق من نفسي اوووي ومش عارف إزاي كان بيجيلي قلب أحلق دقني ، بس الحمد لله إن ربنا هداني في الوقت المناسب وقريت في الموضوع ده بقي علشان مفضلش جاهل كده طول عمري ، كمان قرار نهي بإرتداء النقاب شجعني اووي وبقينا لحيه ونقاب هيييح بقي ، الحمد لله علي الراحه اللي أنا فيها دلوقتي

نظر له إسلام بتعجب وقال :

- هي كمان لبست النقاب ؟

أجابه مبتسما :

- اه الحمد لله ، رغم إني مش هينفع أشوفها تاني بس برضو أنا مبسوط من القرار ده ، وبإذن الله نحاول نظبط الإتفاقات بتاع الجواز علطول ونقرب كتب الكتاب شويه بقي

رفع حاجبه قائلا بحزن :

- مش هينفع تشوفها كمان ؟! ليه ؟

تنهد بأريحيه وقال :

- بص يا سيدي " الخطوبه ماهي إلا وعد بالزواج " يعني أنا بالنسبه لها راجل غريب والحكم اللي هيمشي علي أي راجل غريب لازم يمشي عليا أنا كمان ، الفرق بس إنه يجوز ليا أروح عندهم وأتكلم معاها علشان نقرب أفكارنا ونتفق علي أساسيات حياتنا وكده ، لكن طبعا يكون الكلام ده بدون خلوه وفي وجود محرم يعني وعلي قدر الحاجه والله أعلم طبعا

نظر له بضيق وقال :

- الواحد حاسس إنه مش عارف أي حاجه في الدين والله ، وخصوصا بقي إني تقريبا كده والله أعلم داخل علي خطوبه ولازم أقرأ في الضوابط بتاع الخطوبه وكده

قفز فاروق من مكانه بسعاده وقال :

- خطـــوبه ؟!! إمتي ده وحصل إزاي ؟

نظر له بتعالي وقال :

- ماهو يا استاذ لو كنت بترد علي التليفون كنت عرفت إني اتقدمت للبنت اللي قولتلك عليها دي وروحتلها مره وبإذن الله النهارده رايح تاني ربنا ييسر بقي ، إدعيلي يا شيخنا

ربت علي كتفه بحنان وقال :

- ربنا يتمملكم علي خيـــر يا إسلام لو فيكم الخير لبعض ، وبعدين ياعم منا كنت عاوز أعملهالك مفاجئه

ثم نظر له ضاحكا وقال :

- مش كفايه ياخويا إني مستحملتش أستني لحد ما اللحيه تطول ع الآخر وجيت أقولك علطول أهو

إبتسم قائلا بمرح :

- ماشي يا عم كتر خيرك

أمسكه من يده وقال بإبتسامته المعتاده :

- هروح انا بقي يا عريس علشان تلحق تحضر نفسك ، ربنا يوفقك ويتمملك علي خيــر

- ماشي يا فاروق نورتني ، يلا السلام عليكم

- وعليكم السلام ورحمة الله وبركاته

__________________________

بعد صلاة المغرب أعد إسلام نفسه لزيارة سلمي للمره الثانيه ، إرتدي أفضل مالديه هو ووالدته وذهب إليها ، طرق الباب بخفه ودخل المنزل وجلس مع والدها قليلا ثم خرجت هي بخمارها وحيائها المعتاد ، جلست أمامه وبدأ حديثه معها قائلا :

- أنا قولت بقي أجي مره كمان علشان ملحقناش نتكلم المره اللي فاتت يعني

» أفضل مطاعم الحلال في انترلاكن سويسرا
» صادق الصباح وسمية الخشاب يحتفلان ببدء تصوير"الحلال"
» الجيش الثالث مقتل 3 تكفريين وضبط 3 آخرين وتدمير مخازن سلاح بجبل الحلال