قصة (( في الحلال ))

إبتسمت بخجل ولم تتحدث فنظر لها بجديه وقال :

- إحنا إتفقنا إننا هنتكلم بكل صراحه صح ؟ وبناء عليه فأنا أحب أعرف عن شخصيتك أكتر ، يعني إيه الحاجات اللي بتضايقك ؟ إيه اللي ممكن تستحمليه ؟ طباعك وإيجابياتك وسلبياتك وكده يعني ، وطبعا ده بس علشان أفهمك أكتر وأعرف هل ممكن يكون في توافق في تفكيرنا وشخصياتنا ولا لأ

ثم تنحنح قائلا بحرج :

- معلش أنا صريح شويه ، بس بصراحه بشوف إن الحاجات دي مهمه جــدا ، لأن ممكن اتنين يكونوا ملتزمين جــدا وكويسين بس شخصياتهم غير بعض وميعرفوش يتفاهموا ويحصل بينهم مشاكل كتير بسبب الموضوع ده

ثم إبتسم قائلا :

- يلا معاكي المايك

نظرت للارض بخجل وقالت :

- مبدأيا كده أنا متفائله جــدا وقويه إلي حد ما ، يعني مش عندي حاجه إسمها مستحيل وبحاول دايما أدوس علي نفسي علشان أعمل الصح ، مش بيهمني حد طالما أنا بعمل اللي يرضي ربنا ، كتير أووي بتناقش وبختلف مع الناس بس دايما الحمد لله محافظة علي هدوئي ومش بتخانق مع حد لو الحوار إشتد أو كده ، ده طبعا مش حاجه من عندي ولكنه فضل من عند ربنا إن طبيعتي مش بعرف أتخانق أصلا , بس ده ميمنعش إني ممكن أنفجر كده كام مره بس في الغالب يعني هاديه .

في حاجه مهمه بقي في شخصيتي لازم زوجي المستقبلي يبقي فاهمها لأنها هيتوقف عليها حياتنا كلها تقريبا ، أنا مش عارفه هي حاجه حلوه ولا وحشه بس برضو لازم أقولها لانها مهمه جدا بالنسبالي ، أنا من النوع اللي مش بيعرف يتخانق أوي لكنه بيشيل جواه ، يعني دايما لما حد يتكلم عليا وحش أو يظلمني أو يطلعني غلطانه في حاجه أو كده بحاول مره واتنين وتلاته وعشره إني أوضح وجهة نظري ، لو لقيت إستجابه يبقي تمام ، ولو لقيت الإسلوب برضو فضل حاد فأنا مش بعرف أتكلم وبنسحب في هدوء .

طيب أنا بقول الكلام ده ليه دلوقتي ؟

لأن الموضوع ده لو حصل من زوجي المستقبلي تبقي مصيبه ، لان غالبا المشكله دي بتتكرر في كل البيوت وبصراحه أنا مش هسمح إن يحصل كده في بيتي علشان كده كان لازم أعمل زووم عليها .

ثم قالت مفسره :

- يعني تلاقي الاتنين مختلفين في نقطه معينه وبيتخانقوا جامد وكل واحد بيحاول يطلع نفسه هو اللي صح ولما ميلاقوش حل كل واحد فيهم يشيل جواه من التاني ومع الوقت يبدأوا يبعدوا عن بعض ومهما حاولوا يرجعوا زي الاول مش بيقدروا ..

معلش لو إتكلمت كتير في الموضوع ده ، بس من كتر المشاكل اللي الواحد بيسمع عنها وبيقرأها كان لازم أوضح النقطه دي جـــدا ، ومش عارفه بقي ده وقتها أصلا ولا لا .

نظر لها بتفهم وقال :

- لأ طبعا إنتي عندك حق والنقطه دي مهمه جــدا ولازم الواحد يكون واخد باله منها ، أنا مبسوط إنك ذكرتيها .

ثم نظر لها بجديه وقال :

- بالنسبالي بقي فأنا مجنون شويتين تلاته خمسه كده ، يعني حد علطول بيتنطط ومش بيقعد في مكان أبدا ، وده طبعا مع الناس اللي أعرفهم لكن في الشغل وكده ببقي جد وعلي اد الهزار الخفيف مع زمايلي الرجاله وخلاص لان سعات بيكون معانا ستات وطبعا مش هينفع أتكلم معاهم ونضحك والحاجات دي !

صمت قليلا ثم قال بإحراج :

- في حاجه بقي وحشه في شخصيتي وهي إني سعات بتعصب شوية وساعتها مش بكون طايق حد يناقشني في حاجه ولا يكلمني أصلا ، لكن لما بهدأ برجع تاني أتناقش وأعتذر وكده .

وعارف إن دي مش من صفات الملتزم وعلشان كده بحاول الفترة دي أقلل الموضوع ده بل إني بحاول أقضي عليه تماما علشان أكون مثال كويس للشاب الملتزم وبإذن الله أنا متأكد إن ربنا هيقدرني ويقويني وأتغلب علي النقطه دي .

نظرت له بحزن وقالت بصوت خفيض :

- ولما بتتعصب بقي ممكن تضرب حد أو تشتم أو كده ؟!

وقبل أن يجيب قالت بسرعه :

- إحنا إتفقنا إن ربنا شايفنا ومش هنقول غير الحق هاه

أجابها علي الفور :

- معتقدش ، متهيألي أنا أخري خالص صوتي يعلي شويه وبعدين أنزل علي مفــيش ، بس والله دايما بتناقش وبحب أتفاهم علي كل حاجه ومدخلش في نقاشات حاده ، يعني في العادي أنا بهزر وبضحك وكده وممكن تسألي هند بنفسك لكن وقت العصبيه مش بحب حد يكملني خــألص، أنا حبيت أوضحلك النقطه دي علشان مكونش بضحك عليكي وأبين إني كويس علطول .

قالت بضيق :

- بس وقت العصبيه ده ممكن الإنسان يقول كلام جارح ويفضل محفور جوا الطرف التاني العمر كله

أومأ برأسه نفيا وقال :

- ولا بعرف أقول كلام جارح كمان ، وزي ما قولتلك أنا الأيام دي بشتغل علي نفسي في الموضوع ده وبإذن الله مش هستريح إلا لما ينتهي خالص ، أوعدك اني هحاول أقلله جدا في الفترة الجايه

ثم نظر لها بثقه وقال :

- وإسلام لما بيوعد مش بيخلف وعده أبــــــــدا

أجابت مبتسمه :

- تمام

ثم سألته قائله :

- شايف إنك ممكن تعرف تربي أولاد ؟ يعني هتكون قدوة صالحه لأولادك ؟

تنهد بحيره وقال :

- اللي شايفه إني لازم أكون قدوه ولازم أكون بعرف أربي كويس ، يعني حاليا لسه مبقيتش كده لكن شغال علي نفسي الفترة دي وبحاول أعرف عن ديني أكتر وأواظب علي فروضي وعلي بعض السنن علشان ولادي يبقوا شايفينني قدامهم مثال للأب اللي بجد ، وطبعا هيقلدوني في كل حاجه فلازم أكون جاهز للمرحله دي وخصوصا لأن الرسول صلي الله عليه وسلم قال :

" كلكم راع وكلكم مسئول عن رعيته " رواة البخاري

فالموضوع مش فيه مجال للتفكير ، يأما أبقي أب بجد وأد المسئولية يأما بلاش من الجواز خالص ، لأني هتحاسب علي ولادي والموضوع مش سهل . بس كده

نظرت له سلمي بإعجاب وقالت :

- صح كده ، يأما نبقي أد المسئوليه يأما بلاش

هم أن يسألها هو الآخر ولكنه سمع آذان العشاء مره آخري فقال :

- العشاء أذنت ، هروح أصلي

وقبل أن يغادر نظر لها وقال بمرح :

- بس المرادي راجع تاني علشان نكمل ، يلا السلام عليكم

لــ #رقيه_طه

معلش علي التأخير النهارده

بالنسبه لأي حكم في حلقة النهارده بالذات فأنا قريت عنه كتير جداااا لحد ما إقتنعت بالرأي اللي كتبته ده علشان كده إتأخرت شويه ،، فـ يـــارب مكونش أخطأت في أي حاجه لأن الموضوع عليه خلاف كبير جـــدا ومش سهل

وأي رأي آخر مستعده أسمعه طبعـــا ، بس محدش يزعق هاه

رأيكم في الحلقه يهمني طبعـــا ، وكمان المقابله اللي حصلت بين سلمي وإسلام شايفيها ماشيه صح ولا المفروض تمشي بشكل تاني ؟

في الحلال

الحلقه الثالثة والعشرون :

هم أن يسألها هو الآخر ولكنه سمع آذان العشاء مره آخري فقال :...

- العشاء أذنت ، هروح أصلي

وقبل أن يغادر نظر لها وقال بمرح :

- بس المرادي راجع تاني علشان نكمل ، يلا السلام عليكم

نظرت للأرض بخجل وقالت :

- وعليكم السلام ورحمة الله وبركاته

غادر المنزل هو ووالدته ليوصلها هي لمنزلها ويذهب هو للصلاة وبعدها يعود مرة آخري لمنزل سلمي بينما نهضت هي لأداء صلاة العشاء لأنها كانت علي وضوء حتي يستنير وجهها بنور الوضوء بدلا من نور مستحضرات التجميل الزائف ، إنتهت من صلاتها وجلست علي فراشها في حيره وحدثت نفسها قائله :

- إيـــه الصعوبه دي بقي ، مكنتش أعرف إن الموضوع صعب كده ، يعني هو كلامه مريح أوووي وانا فرحانه بتفكيره أصلا ، بس في نفس الوقت خايفه من عصبيته دي وخصوصا إني مش بعرف أتخانق مع حد ومش هستحمل حد يتعصب عليا كل شويه .

نظرت للجانب الآخر وقالت هامسه :

- بس هو برضو كان ممكن يخبي عليا علشان يبان كويس وبرضو مكنتش هعرف حاجه وهتصدم في النهايه ، لالا هو أكيد كويس وبيحاول أهو مع نفسه إنه يبقي أحسن ، وكمان ما أنا برضو فيا عيوب يعني مفيش حد كامل .

عقدت ذراعيها أمام صدرها في حيره وقالت :

- يــــوه بقي مش عارفه ، عموما صلاة الإستخاره هي اللي هتحسم الأمر لأن ربنا واحده هو اللي عالم الخير فين وبإذن الله طالما أنا إتوكلت علي الله يبقي ربنا هيفعلي كل الخيـر ، أنا متأكده من كده

نهضت من مكانها وقامت بفتح خزانتها وأخرجت منها الورقه التي كتبتها من قبل والتي تحتوي علي كل الأسئلة التي تريد أن تعرفها عنه ، ورغم أنها تعلم إنها لن تتذكر إلا القليل أو ربما لا تتذكر شيئا أصلا ولكنها حاولت أن تفعل كل ما تستطيع كي تبدأ حياتها بداية جيده .

عاد إسلام من الصلاة فخرجت وجلست أمامه ليكملا الحديث سويا فقال مبتسما :

- كان في سؤال كنت عاوز أسأله قبل الصلاة بس نسيت ، هو إحنا وقفنا فين ؟

أجابت بخجل :

- كنا بنتكلم عن تربيه الاولاد ومسئوليتهم وكده

تذكر علي الفور وعاد للخلف قليلا وهو ينظر لها وقال بجديه :

- طيب إنتي شايفه إنك المفروض تربي ولادك إزاي ؟ وحاسه إنك هتعرفي تربي تربيه صالحه ولا الموضوع صعب ؟

أخذت تحك ذقنها بتفكير ثم قالت :

- لاشك إن الموضوع مش سهل أبدا ، كتير من الناس فاهمين إن الأم يعني تأكل وتشرب وتنيم وتودي المدرسه وتذاكر وخلاص ، بس أنا بإذن الله مش هعمل كده .

إبتسمت بحماس ثم نظرت له بجديه وقالت :

- أنا لازم أربي نفسي الاول علشان أعرف أربي أولاد ، ومش قصدي إني أربي نفسي يعني أكون مؤدبه وكده ، لأ أنا قصدي إني أكون عارفه ديني كويس جــدا وكمان عارفه عن التربيه السليمه للأطفال والمراهقين وقاريه في علم النفس و كده ، وده برضو في الخطه بإذن الله ، حاليا بدأت دينيا وشوية كده هبدأ بقي في العلوم التانيه إن شاء الله

وجدت نفسها تصوب نظرها تجاهه بجديه ثم طأطأت رأسها خجلا وقالت :

- بس أنا مش هينفع أعمل كده لوحدي ، لازم جوزي كمان يشاركني في تربيتهم ، لازم يكون قدوه ليهم وياخدهم معاه المسجد علطول ، لازم يسعي دايما إنه يعلمهم الدين ويفهمهم هما عايشين في الحياة دي أصلا ليه ، لازم يشوفلهم شيخ كويس يحفظهم ويفهمهم القرآن ، مش هسمح أبدا إن أولادي يكبروا زيي كده وهما مش حافظين حاجه

ثم تنهدت بثقه وقالت :

- وده قرار ، وسلمي لما بتاخد قرار مش بترجع فيه أبـــــدا ، ربنا يقدرني ويقويني

نظر لها بسعاده وقال :

- أنا كمان زيك كده ، وبرضو مش حافظ كتير للاسف ، بس حاليا بدأت أحفظ الحمد لله وبالتفسير والتجويد وكله ، ورغم إني ماشي علي مهلي شويه بس برضو فخور إني فاهم كل كلمة بحفظها ، الحمد لله

إبتسمت سلمي بأريحيه وقالت :

- كلمني عن علاقتك بمامتك وهند ، يعني بر الوالدين إيه أخباره ؟ صراحه هاه

أجابها علي الفور :

- لأ هند دي عادي بقتلها كل يوم مفيش مشكله ، إنما ماما تبقي حاجه كبيره أوووي بالنسبالي ربنا يخليهالي مقدرش أصلا ازعلها ، سعات بحس إنهم أولادي وإني مينفعش أزعلهم لأنهم ملهمش حد غيري بعد ربنا ، يعني لما يبقي أقرب حد ليهم بيعاملهم وحش هيروحوا فين ؟!! وخصوصا إن بابا الله يرحمه مات برضو وإحنا صغيرين إلي حد ما ، فبقيت أنا المسئول عنهم وأنا في ثانوي ، واهي ماشيه الحمد لله

ضحكت رغما عنها وقالت :

- بتقتلها إزاي يعني ؟

تذكر هند فإبتسم قائلا :

- يعني مثلا ادخل أرخم عليها وأجننها شويه وأطلع ، أضربها بأي حاجه وأجري ، لو مثلا الحوار إشتد شويه بيني وبين ماما بروح علي اوضه هند وأطلع كل غضبي عليها ونتخانق شويه ونضرب بعض بأي حاجه قدامنا وبعدين نضحك وحاجات غريبه كده ، عيله مجنونه متاخديش في بالك

حاولت كتم ضحكاتها كي لا تُحرج أمامه وقالت في نفسها بمرح :

- وأنا أقول البنت مجنونه كده من إيه ؟ أتاريها متجيش 10% منك ومن جنانك ، بس عادي الجنان حلو برضو مفيش كلام

إنتبهت علي حديثه وهو يقول :

- فعادي بالنسبالك وممكن توافقي ولا إيه ؟

نظرت له بتعجب وقالت :

- أوافق علي إيه ؟

ضحك رغما عنه وقال متعجبا :

- بعد كل اللي قولته ده طلعتي مش واخده بالك ؟ ماشي ما علينا هعيد تاني ..

في الحلال

كنت بكلمك عن ظروفي وإمكانياتي ، بقولك يعني إني مش عندي شقه فالمفروض إني هأجر شقه لحد ما ربنا يرزقني وأقدر أجيب واحده ، بالنسبه للجهاز فبابا الله يرحمه سايبلي مبلغ كده ممكن يقضي الشبكه وشويه من العفش والباقي إن شاء الله هتصرف فيه من مرتبي ، بالنسبه لبعد الجواز فأعتقد هيكون الحال ميسور يعني مش فقر ومش غني برضو ، كمان أنا متأكد إن ربنا هيرزقني ويديني علي أد تعبي ، حبيت أقولك برضو علشان تكوني عارفه لأن ممكن الموضوع ده يأثر علي قرارك ، وطبعا الكلام ده المفروض هيتقال لعمي لو في نصيب يعني ، بس أنا قولت أعرفك من دلوقتي لأن ده حقك .

كانت تريد أن تخبره بأنها موافقه علي تلك الإمكانيات ولا تريد شيئا سوي رجل يتقي الله فيها فحسب ولكن خجلها منعها فقالت :

- تمام

صمت قليلا ثم قال بتساؤل :

- حابه تسألي عن حاجه تاني ؟ علشان بس حسيت إني طولت ولازم أستئذن

إبتسمت وهي تومأ برأسها نفيا فنهض من مكانه وألقي عليها التحيه وهم بالخروج ولكنه سمعها من خلفه تقول :

- في حاجه كمان

إستدار ليراها ويعرف منها ماذا تريد وقال :

- إتفضلي

أجابته علي الفور :

هتاخد بإيدي للجنه ؟

ثم تنحنحت قائله بحرج :

- قصدي يعني هتبقي تاخد بإيدين زوجتك للجنه ؟

أبتسم بسعاده وقال :

- أوعدك إني هعمل كده ، لو في نصيب يعني

ثم تركها وغادر وقلبها يخفق بشده ، لا تعرف بماذا تشعر ؟ هل هي سعاده ام قلق ام خوف ام توتر ام كل هذا ؟ دخلت إلي غرفتها مسرعه وبدلت ملابسها وإستلقت علي الفراش وأخذت تفكر في كـــل ما حدث حتي ذهبت في النوم .

_______________________

وقبل الفجر بساعة تقريبا إستيقظت سلمي وتوضأت وصلت ركعتين قيام ليل ، ثم عقدت النيه لتصلي صلاة الإستخاره ، كانت تعلم أنه من السنه أن تقرأ بالركعة الأولى بعد الفاتحة بسورة ( قُلْ يَا أَيُّهَا الْكَافِرُونَ) ، وفي الركعة الثانية بعد الفاتحة بسورة ( قُلْ هُوَ اللَّهُ أَحَد (

إنتهت من الصلاة ورفعت يدها متضرعه إلي الله وهي مستحضرة عظمته وقدرته ، بدأت تحمد الله عزوجل وتثني عليه ثم قامت بالصلاة علي النبي صلي الله عليه وسلم ثم بدأت دعائها قائله :

اللهم إني أستخيرك بعلمك ، واستقدرك بقدرتك ، وأسألك من فضلك العظيم ، فإنك تقدر ولا أقدر ، وتعلم ولا أعلم ، وأنت علام الغيوب . اللهم إن كنت تعلم أن زواجي من إسلام بن محمود خير لي في ديني ومعاشي وعاقبة أمري فاقدره لي ، ويسره لي ، ثم بارك لي فيه . وإن كنت تعلم أن زواجي منه شر لي في ديني ومعاشي وعاقبة أمري عاجله وآجله فاصرفه عني واصرفني عنه ، واقدر لي الخير حيث كان ثم أرضني به .

وعلي بعد بضع أمتار كان يجلس إسلام نفسه الجلسه وهو يرفع يده إلي الله بكل تضرع وخشيه ويقول :

اللهم إني أستخيرك بعلمك ، واستقدرك بقدرتك ، وأسألك من فضلك العظيم ، فإنك تقدر ولا أقدر ، وتعلم ولا أعلم ، وأنت علام الغيوب . اللهم إن كنت تعلم أن زواجي من سلمي بنت مصطفي خير لي في ديني ومعاشي وعاقبة أمري فاقدره لي ، ويسره لي ، ثم بارك لي فيه . وإن كنت تعلم أن زواجي منها شر لي في ديني ومعاشي وعاقبة أمري عاجله وآجله فاصرفه عني واصرفني عنه ، واقدر لي الخير حيث كان ثم أرضني به .

__________________

كانت سلمي تشعر بالراحه التامه تجاه إسلام ولكنها كانت تريد التأكد من أمر ما في نفسها ، إنتظرت حتي أذنت صلاة المغرب وصلت بعدها مباشرة ، وبعدما يقرب من الخمس دقائق إتصلت علي هند وحاولت التحدث معها في أي شئ وفي وسط الكلام قالت لهند :

- عماله تضحكي إنتي كده ياختي وتتكلمي براحتك ولا كأنك ممكن تحرجيني ولا حاجه ، اوعي يا بت يا هند يكون أخوكي جنبك ، هتضربي والله

قالت هند علي الفور بكل براءه :

- لأ إسلام لسه مرجعش من الصلاة

وضعت يدها علي قلبها وتنفست براحه تامه وهي تحمد الله علي هذا ، أخذت تحدثها في أشياء آخري لوقت قصير ثم أغلقت الهاتف ولكنها لم تكتفي بهذه المره فقط ، حاولت التفكير في أي طريقة تعاود بها الإتصال بهند وقت صلاة العشاء لكي تطمئن أكثر وأخيـــرا وجدتها ، إنتظرت أيضا صلاة العشاء وصلتها ثم إتصلت بهند وقالت :

- هنود حبيبتي إزيك ؟

رفعت هند حاجبها بتعجب وقالت :

- إيه يا بنتي مالك ؟ ما إحنا لسه متكلمين من شويه

ضحكت قائله بمرح :

- يا ستي كنت هتعشي فقولت أقولك تيجي تتعشي معايا

ضحكت بتعجب وقال :

- يا سلام ؟!! وهتبعتيلي الأكل في التليفون ولا إيه بقي ؟ وبعدين يا ستي كلي إنتي بالهنا والشفا ، انا هستني إسلام لما ييجي ونتعشي كلنا

نظرت للمرآه بخبث وقالت :

- إيه ده هو لسه مرجعش من الشغل لحد دلوقتي ؟

- شغل إيه يا بنتي اللي هيقعد فيه لحد دلوقتي إنتي ناصحه ؟!! وبعدين ماهو كان هنا المغرب أصلا ، هو نزل للعشاء وهيجيب الأكل معاه وييجي

أخذت سلمي المعلومة التي تريدها وتحدثت قليلا مع هند وأغلقت الهاتف وهي تنظر للمرأه بإصرار وتقول :

- كده تمام أوووي ، فاضل بقي آخر حاجه !!

إستيقظت من نومها قبل الفجر كالعاده لتستعد للصلاة ، سمعت أذان الفجر فأدت الصلاة وقامت بالإتصال علي هند ، لم تجيبها في المرة الآولي ولكنها عاودت الإتصال مرة آخري فأجابت بصوت شبه نائ م :

- سلمي تــــالت ، نعم يا بنتي

قالت بمرح :

- بصحيكي للفجر يا حجه ، أنا الغلطانه يعني

تنهدت هند بتعب وقالت :

- يا بنتي ماهو لسه مصحيني ، هو أنا هلاقيها منك ولا منه بــــس

سألتها بشغف :

- مين اللي لسه مصحيكي ؟

أجابت علي الفور :

- هيكون مين يعني ؟ هو فيه غيره سي إسلام ، سيبوني في حالي بقي يا جدعان همووت من النعس

إبتسمت قائله بمرح :

- يا بنتي لازم تقومي تصلي حرام عليكي

تنهدت بضيق وقالت :

- يا ستي قايمه والله قايمه ، عاوزه ألحق أناملي شويه بس قبل ما ييجي من الجامع ويكهربني زي كل يوم ويقومني بالعافيه ، إمشي بقي يا سلمي وهكلمك بكره والله

أطلقت ضحكات عاليه متواصله ثم قالت :

- مـاشي يا ستي ، يلا تصبحي علي خير ، قصدي تصبحي علي خير بعد الصلاة يعني

أغلقت الهاتف وقفزت من مكانها بسعاده وهي تنظر للمرآه بكل فخر وتقــول :

- yeeeeeeeeeeeees

إرتمت علي الفراش وهي تتنهد بفرح وتقول :

- كده بقي أنا وثقت فعلا إنك مواظب علي الصلاة في الجامع ، معلش بقي ماهو الواحد لازم يتأكد بنفسه ، دي صلاه مش هزار

في الحلال

عاد إسلام من المسجد فوجد هند مازالت في الفراش ، دخل عليها وقال بصوت جهوري :

- هنــــــــد إلـــــحـــــــقــــــي أعاااااااااااااااااااااااااااا

إنتفضت من مكانها بفزع ووقفت عند باب الغرفه وقالت بخوف :

- إيه في إيـــــــــه ؟

قال علي الفور :

- إلحقي الصلاة كانت هتروح منك

قذفته بالوساده وهي ثائره تماما وقالت :

- إنت بتستعبط يا إسلام ؟!! أنا إفتكرت حصل مُصيبه

نظر لها بغضب وقال :

- وهو فوات الصلاة مش مصيبه ؟!!

جلست علي حافة الفراش وقالت بإحراج :

- لأ طبعا حرام ، بس مكانش ينفع تصحيني كده يعني

أمسكها من يدها وذهب بها متجها إلي الحمام وقال :

- إتفضلي إتوضي يا أستاذه وتاني مره لما أصحيكي تقومي علطول مش لازم تستني لما آجي من الجامع هاه

زفرت بضيق مختلطا بالحزن وقالت :

- طيب

جلس في غرفتها يلعب في هاتفها قليلا حتي إنتهت من الصلاة ، نظرت إليه وقالت :

- عروستك يا عم كانت لسه مكلماني دلوقتي

نظر لها بسعاده وقال :

- إشمعني ؟

قالت علي الفور :

- كانت بتصحيني للفجر برضو

حرك رأسه للأعلي وللأسفل وقال بمرح :

- أفارم أليها والله

ضحكت وهي تقول :

- مش عارفه ايه حكايتها النهارده ؟ كل شوية تتصل بيا وإنت تكون مش موجود ، حظها حلو علشان متتحرجش ، بس مش عارفه برضو إتصلت كتير كده ليه ؟!!

إبتسم قائلا :

- وأنا بروح فين يعني ؟ منا موجود علطول أهو

أومأت برأسها نفيا وقالت :

- لأ ما إنت بتكون في الصلاة

نظر لها متعجبا وقال :

- وهي كل ما بتتصل بكون أنا في الصلاة ؟!!

أومأت برأسها إيجابا وقالت :

- أيوه إتصلت ساعة المغرب والعشا ومن شويه ، وكل مره تبقي إنت تحت في الجامع

نظر لها بإهتمام وقال :

- طيب وسيرتي بتيجي في الموضوع ؟

أجابته بالتأكيد قائله :

- أه سعات بتيجي سيرتك وبقولها إنك في الجامع وبعدها نتكلم شويه ونقفل

ضحك بشده بل وسقط علي الأرض من كثرة الضحك حتي كاد أن يختنق فنظرت له بتعجب وقالت :

- إيه مالك ؟

خرجت الكلمات من بين ضحكاته وقال بخبث :

- صحبتك دي أروبه أوووي علي فكره ، أنا كده خوفت منها بصراحه ، بس والله برافو عليها ، يـــاريت كل البنات زيها مكنش حد عرف يضحك عليهم .

تعجبت أكثر وقالت :

- إيه يا عم ما تفهمني ؟!

رفع حاجبه قائلا بمرح :

- معقوله ده كله مش فاهمه ، الأخت سلمي يا اخت هند بتعمل ده كله علشان تتأكد إني مواظب علي الصلاة في الجامع ، والله جدعه

ضربت هند رأسها وقالت بإنتباه :

- ااااااه وانا أقول برضو إشمعني إتصلت بيا كتير كده النهارده ، اه يا بنت الإيه يا لذينه

___________________

وبعد مرور إسبوع تقريبا دخل إسلام غرفة والدته وقال بحيره :

- ماما أنا عاوز أقول لوالد سلمي إني موافق ، بس خايف هي ترفض وأتحرج

ربتت علي كتفه بحنان وقالت :

- لأ مش هترفض إن شاء الله ، أنا حاسه بكده ، وبعدين ماهو لازم الراجل هو اللي يقول رأيه الأول ، كلمه النهارده في التليفون وشوف رأيه ورأيها إيه ؟

تبسم قائلا :

- هكلمه وربنا يستر

ثم إنتبه فجأة وقال :

- هو إحنا المفروض نعمل إيه بعد كده ؟ هنقعد بقي مع الرجاله علشان نتفق علي الجهاز والحاجات دي صح ؟

أومأت برأسها إيجابا وقالت :

- أيوه المفروض هتاخد عمك وتقعدوا مع أبوها وعمها ويعرفوا إمكانياتك وتتفقوا بقي هتجيبوا إيه وكده

أخذ يمرر أصابعه بين خصلات شعره في حيره وقال :

- والله أنا خايف من الأعده دي ، يعني حرام نبقي موافقين علي بعض والموضوع كله يبوظ علشان الفلوس !!

وضعت يده بين كفيها وقالت مبتسمه :

- لو إنتوا من نصيب بعض محدش هيقدر يمنع الجوازه ، حتي لو مريتوا بشوية صعوبات بس برضو هتتجوزوا في النهايه ، خليها علي الله يا إسلام

تبسم قائلا :

- عندك حق يا ماما ، خليها علي الله

___________________________

إتصل إسلام بوالد سلمي وأخبره بموافقته ، فكان رد والدها ان سلمي هي الآخري موافقه ، قام إسلام بأخذ موعد من والد سلمي حتي يأتي مع عمه ويتناقش كل منهما حول تفاصيل الجهاز والفرح وما إلي ذلك ، أغلق الهاتف وذهب مسرعا إلي غرفة هند وقال بمرح :

- إلحــقي يا هند صاحبتك وافقت عليا ، والله دي طيبه غلبانه هيهييهييهيهي

قفزت هند من مكانها وقالت بسعاده :

- أيــوه بقي يا عم العريس ، والله لو كنت بعرف أزغرط كنت زغرطت

إرتمي علي الفراش ونظر لها بقلق وقال :

- سيبك من الزغاريط دلوقتي ، تفتكري أنا ممكن أتنفخ ؟

نظرت له بتعجب وقالت :

- يعني إيه تتنفخ ؟

تنهد بحزن وقال :

- حاسس إن والدها هينفخني ، ربنا يستر بقي ، إدعيلي ربنا يتمم الموضوع علي خيــر

جلست بجوارة وهي تربت علي كتفه قائله :

- إن شاء الله النفخه تكون خفيفه يا إسلام

نظر لها بإستنكار وقال بضيق :

- يا شيخه حرام عليكي ، ده بدل ما تقولي ربنا يعدي الموضوع علي خيــر

تنهدت بثقه وقالت :

- أنا عارفه والد سلمي أكتر منك ، خليك بس مستعد كده وحافظ علي هدوئك واوعي تزعله بدل ما يبوظلك الجوازه كلها ، وبرضو هو مهما كان أب وبيحب بنته وعاوز مصلحتها ، لازم تحط ده في إعتبارك

أجابها علي الفور :

- عندك حق !

_____________________

بعد ثلاثة أيام حضر إسلام بصحبة عمه الوحيد وجلسا مع والد سلمي وعمها ، جلس إسلام يتحدث عن نفسه بحرج ووالد سلمي يسمع ويناقشه في كل شئ ، بعد عدة دقائق جاءت ولاء تهرول إلي غرفة سلمي وقالت بفزع :

- إلحقـــي يا سلمي أبوكي بيزعقلهم بـــرا

لــ #رقيه_طه

رأيكم في الحلقه أولا طبعا

ثانيا متخيلين الأحداث هتمشي إزاي الأيام الجايه ؟

ثالثا بقي وده الأهم :

في طبعا ناس كتير متخيلين إن الرواية هتخلص علي جواز سلمي وإسلام بس لسة المشوار طويل ^__^

في الحلال

الحلقه الرابعة والعشرون :

بعد ثلاثة أيام حضر إسلام بصحبة عمه الوحيد وجلسا مع والد سلمي وعمها ، جلس إسلام يتحدث عن نفسه بحرج ووالد سلمي يسمع ويناقشه في كل شئ ، بعد عدة دقائق جاءت ولاء تهرول إلي غرفة سلمي وقالت بفزع :...

- إلحقـــي يا سلمي أبوكي بيزعقلهم بـــرا

إنتفضت سلمي من مكانها وقالت برعب :

- ليـــه حصل إيه ؟!! بيزعق إزاي يعني ؟!!

إلتقطعت ولاء أنفاسها وهي تجلس علي حافة الفراش وقالت :

- بصي هو مش بيزعق اوي يعني ، بس باين عليه كده متضايق جــدا ومش متفاهم معاهم

زفرت بضيق وقالت :

- ليه بس ؟

نظرت لها بعدم فهم وهمست :

- مش عارفه ، بس أكيد يعني مش متفقين علي الجهاز والحاجات دي

تنهدت سلمي بحزن وقالت :

- يــــارب عديها علي خيـــر

وبعدما يقرب من الساعه والنصف غادر إسلام وعمه وعم سلمي أيضا ودخل الأب غرفته ليستريح ، هرولت سلمي إليه وقالت بلهفه :

- ها يا بابا عملتوا إيه ؟

زفر بضيق وقال :

- إنتي موافقه علي الولد ده فعلا ؟

أومأت برأسها إيجابا وهي تنظر له بتعجب ولم تتحدث فأردف قائلا :

- يا بنتي ما إنتي كان متقدملك واحد هيعيشك ملكه وموافقتيش عليه ، إشمعني موافقه علي ده يعني

نظرت له بعدم فهم وقالت :

- بابا بعد إذنك أنا مش فاهمه حاجه !! فهمني أكتر

تنهد بحيره وقال :

- الولد مستواه مش أد كده وإنتي هتتعبي معاه ، مش عارف موافقه عليه علي إيه بس !!

إبتسمت قائله بحنان :

- يا بابا إسلام شاب كويس وبيخاف ربنا وهي دي أهم حاجه عندي

أخذ يحرك رأسه يمينا ويسارا بضيق وقال :

- والله إنتي طيبه يا سلمي ومتعرفيش حاجه ، انا وأمك تعبنا في أول حياتنا كتير جـــدا علشان نوصل للمستوي ده ، ومش هسمح بصراحه ان بنتي تتمرمط مع واحد غريب والله أعلم هيقدر ده في الآخر ولا هيذلها ويقولها أهلك باعوكي بالرخيص .

نظرت له بدهشه وقالت :

- لأ يا بابا مستحيل إسلام يعمل كده لانه فعلا شاب بيتقي ربنا ، وكمان مستواه مش عيب علشان نرفضه وانا بصراحه موافقه أعيش معاه علي أد مستواه ده لحد ما ربنا يرزقنا ، كمان هو مش فقير اوي يعني زي ما حضرتك متخيل

تنهد بملل وقال :

- يعني أتعب عليكي السنين دي كلها وفي الآخر تخيبي ظني في تعليمك وكمان جوازك !!

نظرت له بحنان وقالت :

- متقلقش يا بابا مش هخيب ظنك المرادي بإذن الله ، وكمان أنا صليت إستخاره والحمد لله مرتاحه وحاسه إن ده الزوج الصالح المناسب ليا

إبتسم قليلا وقال :

- عموما يا سلمي الجواز ده الحاجه الوحيده اللي مش هقدر أغصب عليكي فيها ، بس برضو أنا مش هتنازل عن الحاجات اللي طلبتها

قالت بقلق :

- طيب حضرتك طلبت منهم إيه يا بابا ؟

ضحك قائلا :

- شوف البت خايفه علي الواد إزاي ، يا بنتي أنا اللي أبوكي مش هو

إبتعدت قليلا وقالت بخجل :

- اه طبعا يا بابا

نظر لها والإبتسامه تعلو وجهه وقال :

- عموما يا ستي إحنا قسمنا الحاجات بيننا ، رغم إن الراجل المفروض يبقي عليه كل حاجه بس برضو إحنا عارفين الظروف وإن مفيش شاب بيقدر يشيل كل حاجه لوحده دلوقتي ، فـ هيكون هو عليه النوم والسفره وإحنا علينا الصالون والمطبخ ، وطبعا بقي عليه كمان الشبكه والفرح والحاجات دي ، وكفايه أوووي إني وافقت إنك تقعدي في شقه إيجار

تنهدت سلمي بأريحيه وقالت :

- طيب كده تمام جــدا

ثم نظرت له بتساؤل وقالت :

- طيب هما كان رأيهم إيه ؟

مط شفتاه للأمام بعدم فهم وقال :

- معرفش أنا عطيتهم مهله إسبوع يفكروا ويردوا عليا وهما حرين بقي

تبسمت قائله :

- ماشي يا بابا شكرا ، هسيبك بقي تستريح شويه

______________________

عاد إسلام إلي المنزل والحزن يملأ قلبه ، فطلبات والد سلمي كانت أكثر مما يطيق ، فالمبلغ الذي تركه له والده لن يكفي وأيضا مرتب سنه كامله لن يفي بالغرض ، دخل غرفته في هدوء وأغلق الباب خلفه حينها سمعت هند صوت باب غرفته فخرجت مسرعه ودخلت عليه وقالت بسعاده :

- أيـــوه بقي ياعم العريس ، كده الموضوع بقي رسمي

تنهد بحزن وقال :

- لسه مبقاش رسمي ولا حاجه !

نظرت له متعجبه وقالت بلهفه :

- ليه حصل إيـــه ؟

إرتمي علي الفراش ونظر إلي سقف الغرفه بضيق وقال :

- طلباته غاليه اوووي ومش عارف أتصرف إزاي

جلست بجواره وقالت بخوف :

- ليه هو طلب إيه ؟ مش العادي دلوقتي إن العريس والعروسه بيشتركوا في الجهاز علشان ظروف الشباب وكده

نظر لها بحيره وقال :

- أيوه الحمد لله إتفقنا إن أنا هجيب النوم والسفره وهما هيجيبوا الصالون والمطبخ ، بس مش دي المشكله ، المشكله إن الشبكه اللي والدها طالبها لوحدها هتخـــلص كل الفلوس اللي معايا وكده مش هلاقي أي حاجه أجهز بيها

إتسعت عيناها ونظرت له بذهول وقالت :

- إنت بتتكلم بجد !!

أومأ برأسه مؤكدا وقال :

- اه للأسف ، حاولت معاه إنه يقلل عدد الجرامات شويه بس هو مش راضي أبـــدا وعمال يقولي بنتي غاليه ويجيلها الغالي ، وهي مش أقل من بنات إعمامها ومعرفش إيه

ثم أخذ يمرر أصابعه بين خصلات شعره في توتر وقال :

- والله أنا لو عليا أجيبلها الدنيا كلــها ، بس أعمل إيه بقي ظروفي كده

ربتت علي كتفه بحنان وقالت :

- طيب وإنت هتعمل إيه دلوقتي يا إسلام ؟

نظر لها والهم يملأ قلبه وقال :

- مش عارف والله ، هو عطانا مهله إسبوع علشان نفكر وطبعا أنا مضطر أوافق ، بس تيجي تقوليلي هتجيب بقية الفلوس منين أقولك معرفش !!

نظرت له بحيره وقالت :

- لأ ما إنت لازم تعرف يا إسلام ، مش هينفع توافق علي حاجه وبعدين متبقاش قدها

حاول الإبتسام قليلا وقال :

- أكيد مش هوافق علي حاجه وأنا مش أدها يا هند ، بس كده مش قدامي غير إني أطلب منه نطول الخطوبه ونخليها سنتين كده ولا حاجه لحد ما ألحق أحوش من مرتبي وأجيب الجهاز ، وكمان بقي هضطر أشوف شغل بليل أهو يساعد بأي حاجه ، وعندي في الشغل بيثبتوا موظف كل سنه في شهر 9 وحاسس إن التثبيت السنادي ممكن يكون من نصيبي ومرتبي يزيد شويه ، إدعيلي بس ربنا ييسر الأمور وأهو شهر 9 قرب أهو وهنشوف

زفرت بضيق ممزوج بالحزن وقالت :

- بس إنت كده هتموت نفسك يا إسلام

إبتسم إبتسامة مكسوره وقال :

- معنديش حل تاني يا هند ، إدعيلي إنتي بس

____________________________

بعد ثلاثة أيام إتصلت سلمي علي هند وقالت مازحه :

- السلام عليكم يا ست هنود ، بقي كده متسأليش عليا 3 أيام بحالهم

أجابت هند بكلمات خاليه من أي مشاعر :

- وعليكم السلام ورحمة الله وبركاته ، معلش يا سلمي

ضحكت قائله بمرح :

- معلش يا سلمي ؟! ودي أصرفها من أي بنك بقي إن شاء الله !

زفرت بضيق وقالت :

- سلمي قولتلك معلش ، خلاص بقي

قطبت حاجبيها وقالت بدهشه :

- مالك يا هند بتكلميني كده ليه ؟!!

تنحنحت قائله بإحراج :

- معلش يا سلمي مش قصدي والله ، بس متضايقه شويه بسبب اللي حصل ده

نظرت للمرآه بتعجب وقالت بلهفه :

- حصل إيه خيــر ؟ مامتك فيها حاجه ؟

أجابتها بضيق :

- ويعني إنتي مش عارفه اللي حصل يا سلمي ؟ ده الواد يا عيني كل شويه يقولي أجيبله برشام صداع ودماغه تعبت من كتر التفكير

قالت علي الفور :

- يا بنتي فهميني اللي حصل الله يباركلك ، أنا مش فاهمه حاجه والله ، واد مين وحصل إيه ؟

أخذت هند تحدثها عن طلبات والدها وإمكانيات إسلام التي لا تستطيع تحمل كل هذه النفقات ، فإنه بالفعل سوف يقاسمه في شراء أثاث المنزل ولكنه أيضا أكثر عليه في طلب شبكة إبنته ، شهقت سلمي فجأة وهي تنظر للمرآه بعينين متسعتين وقالت بصوت متقطع :

- هو بابا طلب الشبكه دي كلها فعلا ؟

قالت متعجبه :

- أيوه ، هو إنتي متعرفيش ولا إيه ؟

أجابت علي الفور :

- لأ والله يا بنتي معرف حاجه ، هو بس قالي إنه وافق علي موضوع الشقه الإيجار دي وهيقسم معاكم الجهاز وطبعا الشبكه والفرح والحاجات دي عليكم فأنا قولتله كده تمام اووي ، بس مكنتش أعرف انه طلب حاجات غاليه يعني ، بس عموما إقفلي دلوقتي وأنا هحاول أتصرف وهتصل بيكي تاني .

_________________________

حاولت سلمي الهدوء قليلا حتي تستطيع ترتيب أفكارها وإقناع والدها بتخفيف طلباته قليلا ، ذهبت لغرفته وطرقت الباب ففتح لها وقال مبتسما :

- أيوه يا سلمي

جلست علي أول كرسي أمامها ونظرت لوالدها بجديه وقالت :

- بابا ليه حضرتك طلبت شبكه كبيره كده ؟

نظر لها بتعجب وقال :

- مش كبيره ولا حاجه ، هو ده العادي دلوقتي

أومأت برأسها نفيا وقالت :

- يعني يا بابا العادي إننا ناخد كل الفلوس اللي معاه علشان نحطها في شبكه وفي الآخر ميلاقيش حاجه يجهز بيها !! وفي الغالب الدهب ده كله مش بيتلبس أصلا غير للمنظره وانا مش بحب المنظره

زفر بضيق وقال :

- تلبسيه ما تلبسيهوش إنتي حره ، ده حقك ولازم شبكتك تكون عندك حتي لو هتتشال في الدولاب سنين ، وبعدين إنتي مش رخيصه علشان أجوزك بالساهل كده ، وكمان لما هو مش قد الجواز كان بيتقدم لبنات الناس ليه ؟!!

تنهدت بحزن وقالت :

- يا بابا ماهو هيجيب شبكه برضو بس مش لازم تكون كبيره كده يعني ، حتي لو ده العادي اليومين دول خلينا إحنا مقدرين ظروفه ونبقي أقل من العادي بشويه ، كده كده أنا مش هلبس ده كله فوق بعضه يعني .

نظر لها بضيق وقال بعصبيه :

- خلاص يا سلمي الموضوع بالنسبالي منتهي ، مش هتنازل عن شبكتك لأنها من حقك وكمان إنتي مش أقل من بنات عمامك .

أخذت تفرك كفيها في توتر بالغ وهي تفكر ماذا تفعل ، صمتت قليلا ثم حاولت فعل محاولة أخيره فقالت :

- طيب حضرتك يا بابا ممكن توافق نمد فترة الخطوبه شويه علشان يلحق يتصرف يعني ؟

أومأ برأسه إيجابا وقال :

- ماشي مفيش مشكله لانك لسه متخرجتيش أصلا ، بس الموضوع ميطولش أوي يعني وكمان يبلغني بالتطورات أول بأول

إبتسمت قليلا وهي تقول :

- حاضر يا بابا ، بعد إذنك

ذهبت سلمي إلي غرفتها وقامت بالإتصال بهند لتخبرها بما حدث ، كانت هند تتوقع كل هذا ولكنها سعدت بخبر موافقة والد سلمي علي مد فترة الخطوبه قليلا كي يستطيع إسلام تحصيل باقي المبلغ المطلوب .

وفي اليوم المحدد حضر إسلام بمفرده ليخبر والد سلمي بقراره النهائي ، إعتدل في جلسته ونظر لوالد سلمي بإبتسامه وقال :

- حضرتك مفيش مجال إن الإتفاق يتغير شوية ويقل حبتين صح ؟

نظر له بضيق وقال :

- ده كلام رجالة يا إسلام وكلام الرجاله مابيتغيرش طبعا

تنحنح قائلا بإحراج :

- تمام يا عمي وانا موافق

ظهرت علي وجهه ملامح الإنتصار وقال :

- حيث كده بقي نقول مبروك

إتسعت إبتسامته وهو يقول :

- الله يبارك فيك يا عمي

ثم نظر للأرض بخجل وقال :

- معلش يا عمي كان في طلب كده

نظر له بتفهم وقال :

- إتفضل

حاول الإبتسام وهو ينظر له بقلق وقال :

- كنت بطلب من حضرتك إننا نطول فترة الخطوبه شويه علشان ألحق أجهز نفسي يعني

نظر له نظره لم يرها من قبل ، نظرة الحنان الأبوي وقال :

- ماشي مفيش مشكله ، بس أخرك سنتين علشان تكون سلمي إتخرجت وإستريحت شويه ، انا كنت ناوي أقولك علي سنه واحده خطوبه بس مفيش مشاكل نخليها إتنين لإنك شاب محترم وتستاهل

تنهد بسعاده وقال :

- بإذن الله يا عمي مش هتكون أكتر من كده ، ولو ربنا أذن ولحقت أجهز المطلوب قبل كده هنتمم الموضوع قبل السنتين بإذن الله

- إن شاء الله

نهض الأب من مكانه وذهب لإحضار سلمي ، وقبل أن تدخل سلمي طلبت من والدها أن يجلس في مكان قريب منهما لكي يستطيع رؤيتهما بوضوح وهذا سيكون الحال في كل مرة يأتي فيها إسلام إليه ، دخلت وألقت التحيه وجلست علي بعد مناسب وقالت بحياء :

- معلش والله أنا مكنتش أعرف الحاجات اللي بابا طلبها دي ، حاولت أعمل اللي أقدر عليه بس معرفتش

تبسم قائلا :

- عادي ولا يهمك ، أنا إتفقت مع عمي علي كل حاجه ، بس هل يا تري هتوافقي إن الخطوبه تطول شويه لحد سنتين مثلا ؟ علشان بس ألحق أجهز

نظرت للأرض بخجل وقالت :

- هوافق إن شاء الله

تنهد بسعاده وقال بحماس :

- حيت كده بقي نتكلم في المهم ، قريتي حاجه قبل كده عن ضوابط الخطوبه ؟

تنحنحت بإحراج وقالت :

- بصراحه لأ بس كنت ناوية أقرأ يعني

أخذ يرتب أفكاره للحظات ثم قال بجديه :

- بس أنا بقي قريت ، ركزي معايا اووي علشان نشوف هنمشي المرحله دي إزاي

مبدأيا كده " أنا قررت أحافظ عليكي حتي من نفسي "

وإعملي زوووم اوووي علي الجمله دي واوعي تنسيها ، وبناء عليه : فأنا قريت كل الضوابط اللي المفروض تتعمل في فترة الخطوبه علشان منغضبش ربنا

وبما إن " الخطوبه ماهي إلا وعد بالزواج " يبقي أنا بالنسبالك دلوقتي أجنبي والحكم اللي هيمشي علي أي راجل غريب هيمشي عليا ، مع الفرق بس إني مسموح ليا أزورك لو في حاجات هنحتاج نتكلم فيها يعني ، والضوابط اللي هنمشي عليها الفترة دي هتكون كالأتي :

طبعا يكون الكلام علي قدر الحاجه ومن غير خضوع بالقول أو كلام بشهوه ، كمان طبعا ميكونش في خلوه ، يعني لازم بباكي يكون قاعد وشايفنا دايما زي النهارده كده ، وطبعا مع إلتزامك بكامل حجابك وكمان غض البصر من الطرفين

لو إلتزمنا بالحاجات دي يبقي أنا هينفع أجي ومش هنغضب ربنا إن شاء الله ، ومش في حل تاني غير إننا نلتزم بالكلام ده علشان إحنا إتفقنا إن هدفنا الجنه تمام ؟

بالنسبه بقي للتليفون فهيكون للضرورة بس ، يعني لو في حاجه لازم تتقال يبقي يأما تتصلي بهند وتقوليلها يأما تتصلي بيا بس ساعتها إستئذني باباكي الأول وأقفي كده في نص الصاله وخلي صوتك مسرسع علشان البيت كله يسمع الكلام اللي هتقوليه ، ونقول الحاجه اللي هنقولها بسرعه بسرعه ونقفل ، وآخر حاجه بقي مفيش إتصال بعد الساعه 9 بليل مهما كان السبب تمام ؟

حاولت كتم ضحكاتها وقالت بهدوء :

- مسرسع !! حاضر

تنحنح قائلا بإبتسامه :

- قصدي يبقي عالي يعني وتبقي قدام كل الناس علشان منحسش إننا بنعمل حاجه تغضب ربنا ، انا عارف إن الموضوع ممكن يكون صعب شويه ، بس اللي هدفه الجنه ممكن يعمل أي حاجه صح ؟

وكمان في قاعده فقهيه بتقول " من إستعجل شيئا قبل أوانه عوقب بحرمانه "وانا بصراحه بقي مش عايز أتعاقب بحرماني من حاجه بعد جوازي بسبب ذنوب الخطوبه

كانت تريد أن تقول له إنه يزيد في نظرها كل يوم عن اليوم الذي يسبقه ، تريد أن تقول له كم هي فخوره به وكم كانت تحلم دائما أن ترتبط بشاب يخاف الله ويحافظ عليها حتي من نفسه ، كانت تريد أن تقول له كم تمنت أن يرزقها الله بشاب مثله تماما ، كانت تتمني أن تقول الكثير والكثير ولكن لايجب أن تتحدث الآن بما في داخلها فإكتفت بقول :

- موافقه علي كــل حاجه ، ربنا يعيننا ويقدرنا علي طاعته

تذكر شيئا فجأة فقال بجديه :

- أخر حاجه بقي معلش معلش ، لو حسيتي في يوم إني ممكن أخلف وعدي ده إقفلي باب الشيطان في وشي ، يعني لو جيت عندكم هنا وكنت هقول حاجه ممكن تغضب ربنا إطرديني ولا يهمك أي حاجه المهم رضا ربنا ، ولو برضو كلمتك في التليفون وحبيت أستعبط إقفلي السكه في وشي علطول وانا مش هزعل ، وحتي لو زعلت شويه أتفلق مش مهم ، المهم رضا ربنا ، هتوعديني بكده يا سلمي ماشي ؟ أنا مش عايز أغضب ربنا فيكي وعاوز أحافظ عليكي وإنتي لازم تساعديني

أومأت برأسها إيجابيا وقالت بحياء :

- حاضر

حاول غض بصره وقال بمرح خفيف :

- ماشي كده إتفقنا ، نغير الموضوع بقي ، إنتي قريتي في السيره قبل كده ؟

تنهدت بإحراج وقالت :

- علي خفيف كده

ضحك بسعاده وقال :

- قشطه يبقي هاخد الثواب ، أنا كنت جايب مجموعة كتب كده عن سيرة الرسول والأنبياء والصحابه ، خلصت سيرة الرسول والأنبياء التانيين وحاليا شغال في سير الصحابه ، لو كده هجيبلك الكتب دول تتسلي فيهم علشان هيفيدوكي اووي لو حابه يعني

إبتسمت بفرحه وقالت :

- اه يــــــاريت

- خلاص بإذن الله هجيبهم معايا المره الجايه

- تمام جـــدا ، انا كمان عندي كتاب فووق الرائع إسمه إستمتع بحياتك للشيخ العريفي ، هبقي أعطيه لحضرتك تقرأه لانه بجد حلو اوووي وفيه إقتباسات كتير مفيده

قفزت ضحكاته رغما عنه وقال :

- حضرتي !! وماله الإحترام حلو برضو

شعرت بالإحراج ولم تستطع الرد فحاول تغيير الموضوع وقال :

- طيب عموما إحنا كده إتفقنا علي أهم حاجه وهي المبادئ اللي هنمشي عليها الفترة دي ، وأنا بإذن الله بفكر أجي كل إسبوع لحد ما نعرف بعض كويس ونتفق علي كل حاجه وبعدين ممكن نقلل الموضوع شويه أو نمنعه خالص طالما مفيش ضروره ، المهم يوم الجمعه هيكون مناسب معاكي ؟

تنهدت بحيره وقالت :

- يوم الجمعه بيكون إجتماع العيله بتاعتنا ، بس عادي برضو ممكن تيجي وتتعرفوا علي بعض بس هيكون دوشه شويه يعني

- امممم طيب السبت كويس ؟

- اه تمام جـــدا

- خلاص بإذن الله هكلم عمي وأخد رأيه في الميعاد ده ، يلا هستأذن أنا بقي عاوزه حاجه ؟

إبتسمت بحياء وقالت :

- شكرا

هم أن يغادر ولكنه عاد مرة آخري وقال :

- صحيح إبقي أي سؤال ييجي في بالك خلال الإسبوع ده إكتبه في ورقة ولما أجي بصي في الورقه عادي وإسأليني علشان أجاوبك علي كل حاجه بتدور في دماغك ، وانا كمان هعمل كده ، وهنمشي بالنظام ده علطول بإذن الله لإن الواحد لما بييجي هنا بينسي كل حاجه

- أيوه يــــاريت

هم بالذهاب مرة آخري وقبل ان يصل إلي باب الشقه ليغادر ضرب رأسه بيده وهو يقول بتعجب مضحك :

- أوبـــــس ، نسيت اهم حاجه

قالت بلهفه :

- إيـــه ؟

نظر للأرض مبتسما وقال :

- متفقناش هنعمل حفلة الخطوبه إزاي علشان نفرح أهلنا وبرضو منغضبش ربنا

لــ #رقيه_طه

شايفين سلمي وإسلام ممكن يمشوا خطوبتهم من غير ما يغضبوا ربنا ولا هيقعوا زي ناس كتير وخصوصا إن الفترة كبيره ؟

وبابا سلمي عنده حق في رأيه ؟ ولا دي عادات عقيمه ؟

الحلقه الخامسة والعشرون :

هم بالذهاب مرة آخري وقبل ان يصل إلي باب الشقه ليغادر ضرب رأسه بيده وهو يقول بتعجب مضحك :...

- أوبـــــس ، نسيت اهم حاجه

قالت بلهفه :

- إيـــه ؟

نظر للأرض مبتسما وقال :

- متفقناش هنعمل حفلة الخطوبه إزاي علشان نفرح أهلنا وبرضو منغضبش ربنا

أخذت تفكر قليلا ثم قالت بإبتسامه :

- ممكن نعملها حاجه علي الضيق كده علي أد الأهل والاصدقاء المقربين وندور علي أناشيد أفراح بدون موسيقي ونشغلها ونخلي الرجالة في الصالة والستات في الأرج مثلا لو العدد كبير .

ثم تنهدت قليلا وقالت بتساؤل :

- بس مش عارفه بقي هنجيب الأناشيد دي منين ؟!!

إبتسم قائلا :

- هتصرف أنا في الموضوع ده إن شاء الله متقلقيش ، عندي واحد صاحبي أكيد هيكون عنده أناشيد من دي وبإذن الله هبعتهوملك مع هند لما أجيبهم ، كمان أنا بقول نعمل الخطوبه الإسبوع الجاي علشان يبقي الموضوع رسمي يعني ونلحق قبل الدراسة برضو .

- تمام

- طيب خلاص بإذن الله هكلم عمي ونتفق علي يوم خلال الإسبوع ده علشان نروح نشتري الدبل

ثم إنتبه قائلا بجديه :

- اه صحيح قبل ما أنسي ، أنا لو لبست الدبله دي هتكون علي اساس إنها خاتم مش أكتر لان الخاتم الفضه يجوز للرجل ، بس مش علشان دي حاجه بتربط بين الزوجين وبتخلي بينهم موده والحاجات دي لأنها كلها إعتقادات محرمه . تمام ؟

- تمام جـــدا

أمسك بقبضة الباب وصافح والدها بحرارة و غادر عائدا إلي منزله

_____________________

» أفضل مطاعم الحلال في انترلاكن سويسرا
» صادق الصباح وسمية الخشاب يحتفلان ببدء تصوير"الحلال"
» الجيش الثالث مقتل 3 تكفريين وضبط 3 آخرين وتدمير مخازن سلاح بجبل الحلال