قصة (( في الحلال ))

#في_الحلال ‎^_^

الحلقه الثامنة عشر :

ظهرت نتيجة التنسيق وبالفعل تم قبول ولاء في كلية الهندسه كمان كانت تحلم ، شعر كل من في المنزل بالسعاده ولكن سعادة سلمي كانت ظاهرية فقط ، فقد كانت تعاني في تلك الفتره بـ فتور في قلبها ، ككل إنسان يأتي عليه وقت ويشعر أن إيمانه قل وأنه لن يستطيع مواصلة مسيرته وخصوصا لو كان وحده ، حاولت إخفاء هذه الحالة عن الجميع وكــانت تنام طوال اليوم وتستيقظ فقط لأد...اء الصلاة وتنام مره آخري ، من سوء حظها أن هذه الحالة أتت إليها في نفس توقيت تنسيق الاء ، في البداية لم يلحظ أحد الأمر ولكن مع مرور الوقت أخذت اختها تلاحظ هذا التغيير وتخبر به والديها .

مر حوالي إسبوع ونصف علي هذه الحالة حتي جاءت إليها أختها ذات يوم لتخبرها ان والدها يستدعيها للحضور ، نهضت ووقفت أمام باب غرفته وطرقت الباب للحظات وسرعان ما سمعت صوته من وراء الباب يأذن لها بالدخول ، نظرت له بإبتسامتها المعتاده وقالت :

- حضرتك كنت عاوزني في حاجه يا بابا ؟

أجلسها بجواره وقال بإبتسامه :

- مالك اليومين دول يا سلمي ؟

إبتسمت له بحنان وقالت :

- مفيش يا بابا انا كويسه الحمد لله

إختفت الإبتسامه من علي وجهه وقال بجديه :

- بس من ساعة ما ظهرت نتيجة التنسيق بتاع اختك وانتي مش مبسوطه ؟ خير في حاجه ولا إيه ؟!!

نظرت له بتعجب وقالت :

- طيب وإيه دخل ولاء في الموضوع يا بابا ؟

ثم انتبهت فجأة وقالت بصوت مختنق :

- بابا هو معقول حضرتك تكون لسه متخيل إني بغير منها !!!

عقد ذراعيه أمام صدره وقال بضيق :

- يمكن !

إنتفضت من مكانها بذهول وقالت :

- إزاااي حضرتك تظن فيا كده !! طيب ما أنا كنت متأكده أصلا إنها هتتقبل في هندسه لأن مجموعها الحمد لله كويس ، وبعدين أنا إيه اللي هيخليني أغير منها مش فاهمه !! أنا مقتنعه بكليتي جــدا والحمد لله جددت نيتي وبقيت بحبها وحبيت إني أبقي مدرسة ، هغير منها ليه بقي ؟!!

نظر لها بوجه خالي من أي تعبير وقال :

- طيب وإيه تفسيرك إنك من ساعة ما نتيجة اختك بانت وانتي نايمه في السرير ومش طايقه تعملي أي حاجه ؟

حاولت كتم غضبها بداخلها لانها تحدث والدها وقالت :

- يعني حضرتك عاوز تعرف أنا متضايقه ليه بابا ؟ لو عرفت مش هتظلمني تاني يعني !!

أومأ برأسه إيجابــا ، فقالت بتعب :

- علشان حاسه ان قلبي مات يا بابا ، لا بقيت عارفه أقرأ قران ولا أصلي زي زمان ، مبقيتش عارفه أضحك وحاسه إني مخنوقه علطول ، مبقيتش حاسه إني سعيده في حياتي زي الاول ، مبقيتش قادره أستحمل كمية التريقه اللي باخدها دي ومحدش حاسس بيــا ، بقيت حاسه إن الدنيا سوده قدامي وإن ربنا مش متقبل مني العباده ، من الآخر مبقيتش حاسه بروحي !!

لكن مع ذلك أنا مطلبتش من حد يساعدني ، وعمري ما عاملت حد وحش زي ما بتعاملوني ، حرام يعني إني أكتئب شويه وأخليني في حالي وأبطل ضحك ؟!! حتي دي كمان هتظلمني فيها يا بـــابــا !!

أنا قلت لحضرتك قبل كده إني عمــري ما هغير منها ومقتنعه بنفسي جــدا الحمد لله وعمري ما حقدت علي حد أو بصيت لحاجه في إيدين حد ، وحضرتك مربيني من زمان وعارف كده ، لكن لو حضرتك مصٌر إني وحشه يبقي خلاص مش مشكله ، كفايه إن ربنا عالم بنيتي لاني أصلا مليش غيره يحس بيـــا

ممكن أمشي يا بابا ولا حضرتك عاوز تقولي حاجه تاني ؟

جذبها من يدها وأجلسها بجواره مره آخري وظل ممسكا بيدها وهو يقول بحنان :

- إيـــه يا بنتي اللي إنتي شايلاه جواكي ده كله ؟

تنهدت بمرارة وقالت :

- حضرتك عارف من زمان إني كتومه ومش بطلع اللي جوايا بسهوله ، علشان كده أرجــوكم خدوا بالكم من كلامكم لأنكم مهما عملتوا برضو مش هعرف أرد عليكم وهشيل جوايا وبس ، ممكن حضرتك بس تدعيلي وانا هبقي كويسه ؟

تنهد بحزن وقال :

- حــاضر ، روحي علي أوضتك لو حابه

غادرت سلمي الغرفه وهي لا تدري شيئا كالعاده ، هل والدها قاسي أم حنون ؟ لماذا دائما يغضبها ويوبخها ويظلمها وأيضا تشعر أحيانا انه يحبها ويخاف عليها ؟ سألت نفسها هذا السؤال مئات بل الاف المرات ولكنها لم تجد إجابة كالعاده ، فمن الممكن أن يكون رد فعله هذا نتيجة لانه يحبها ولكن بطريقته ؟!! لا تعلم شيئا فقررت عدم التفكير في هذا الأمر الآن ، فيكفيها الم قلبها الذي تحمله .

ذهبت إلي حاسبها وقامت بفتح حسابها علي موقع الفيس بوك وأرسلت رسالة لحفصه الغائبه وكتبت فيهــا :

- حفصه أنا محتاجالك أووووي اليومين دول ، أنا حاسه إني كارهه نفسي ومبقاش ليا نفس أعمل أي حاجه زي زمان ، واقفه مكاني ومش عارفه أتقدم خــالص ، مفيش أي حد كان بيساعدني غيرك ودلوقتي مبقاش ليا حد اصلا ، يلا ما علينا ، ربنا يسعدك

أخذت تعيد قراءة المحادثات التي حدثت بينها وبين حفصه وتوقفت عند هذه الرسالة الموجوده في آخر محادثه بينهما :

" لما تحسي إنك تعبتي ومش قادره تكملي طريقك إستخدمي سلاحك .. معاكي الدعاء والقرآن "

" إفتحي المصحف وانتي بتقولي لـ ربنا يـــارب إبعتلي رسالة ، إبدأي دوري كل يوم علي رسالة من ربنا ليكي لحد ما توصليلها ، إدعي كتير اوووي ربنا يقويكي ويثبتك ، اوعي يا سلمي تستسلمي للشيطان اووعي حد يضايقك بكلمتين ويخليكي ترجعي عن هدفك "

" معاكي قرآنك ودعائك يا سلمي فاهماني ؟ معاكي سلاحك يا سلمي اوعي تتخلي عنه "

أخذت سلمي تقرأ الكلمات مرة تلو الآخري وتنهدت بأريحيه وقالت :

- زي ما تكوني حاسه بيـــا يا حفصه ، يـــارب أقدر أكلمك تاني في يوم من الايام

ثم أخذت تردد :

- يــــارب إبعتلي رسالة ، يــــارب إبعتلي رسالة ، يــــارب إبعتلي رسالة

تركت الرسائل وهي مازالت تردد جملة " يــــارب إبعتلي رسالة " وذهبت لصفحتها الرئيسية لمتابعه آخر الأخبار ، نظرت أمامها فإذا بها تري منشور مكتوب فيه :

زهرة اللوتس تستمع الآن إلي " إشتقت إليك "

شعرت بالحزن بداخلها ، نظرت للسماء وقالت :

- الحمد لله الذي عافاني ، ربنا يهديكي يا زهرة ، ربنا يبعدك عن الاغاني ويعلق قلبك بالقرآن

وقبل أن تهبط لتري منشور آخر لمحت إسم صاحب الأغنيه " أحمد سعيد "

أخذت تحدث نفسها قائله :

- أنا شوفت الإسم ده قبل كده ، فين يــــاربي فيــــن

ثم تذكرت فجأة وقالت :

- أيـــوه صح ده واحد من المنشدين الجداد اللي حفصه قالتلي عليهم

أخذت تحك ذقنها ببطء وتفكر قليلا ثم إبتسمت قائله :

- مش يمكن دي تكون رسالة من ربنا ليــا ، أحملها وأشوف

قامت بتحميلها وبدأت تستمع إلي كلماتها :

ضاقت بيا الدنيا .. لقيتنى انسان غريب

وبقيت انا حاجة تانية .. بجد انسان عجيب

لقيتنى بعدت فى ثانية .. بعد أما كنت قريب

لقيت قلبى بقى آسى .. عينيا مافيهاش دموع

لقيتنى بجد ناسى .. أى معنى للخشوع

خلاص قلبى احساسى .. بيتمنوا الرجوع

وخلاص يارب انا راجع ليك .. ندمان بشدة انا بين ايديك

على كل لحظة ماكنتش ليك .. وكنت فيها عاصيك وناسيك

يارب راجع ادق الباب .. باب الرحيم باب التواب

دا لما بعدت شوفت العذاب .. خلاص يارب اشتقت اليك

انا قولت هاعيش حياتى .. بس انا عايشها حرام

علشان ارضى شهواتى .. وابقى مبسوط وتمام

اتارينى هازيد آهاتى .. وكل دا اوهام

وخلاص عرفت حقيقى .. بجد احلى حياة

لما ينور طريقى .. برضا وحب الله

يبقى القران صديقى .. ورسولى امشى فى خطاه

وخلاص يارب انا راجع ليك .. ندمان بشدة انا بين ايديك

على كل لحظة ماكنتش ليك .. وكنت فيها عاصيك وناسيك

يارب راجع ادق الباب .. باب الرحيم باب التواب

دا لما بعدت شوفت العذاب .. خلاص يارب اشتقت اليك

في الحلال

أخذت تسمع كلماتها بذهول !! فكأنها توصف حالتها تمـاما ، سمعتها مره تلو الآخري حتي كادت ان تحفظها كإسمها وأخذت تردد :

وخلاص يارب انا راجع ليك .. ندمان بشدة انا بين ايديك

على كل لحظة ماكنتش ليك .. وكنت فيها عاصيك وناسيك

يارب راجع ادق الباب .. باب الرحيم باب التواب

دا لما بعدت شوفت العذاب .. خلاص يارب اشتقت اليك

تنهدت بأريحيه وهي تقول مؤكده :

- راجعالك يــــارب ومش هيهمني حــد ، مش هستني مساعده من حد لإنك معايا دايما ، حفصه كانت دايما تقولي اللي معاه ربنا مش هيحتاج مساعده من حد ، وانا معايا ربنا ومش عايزه أي حاجه من حد ، هفوق لنفسي كده وأرجع أحسن من الأول مليـــون مره وأبدأ أخد خطوه جديده في حياتي بإذن الله ، يـــــارب قدرني وقويني .

أغلقت حاسبها وذهبت لمصحفها ولكن بقلب آخر ، فهي قد سمعت إنشوده واحده فقط ولكن غيرت فيها الكثير ، أمسحت مصحفها بإشتياق ونظرت إليه فوقعت عينها علي هذه الآيه التي أراحت قلبها اكثر وأكثر :

" وَنَحْنُ أَقْرَبُ إِلَيْهِ مِنْ حَبْلِ الْوَرِيدِ "

أخذت تنظر للآية بسعاده وتقول :

- فهمت الرسالة يــــارب وهنفذها بإذن الله

_________________________

كان إسلام يتحدث مع اخته هند عندما سمع رنين هاتفه المحمول ، تركها ودخل غرفته فوجد فاروق المتصل فأجاب مسرعا :

- الـــو

- يابني أنا مش قلتلك إسمها السلام عليكم

- أيوه أيوه صح ، إستني لما أقفل وأتصل تاني بقي

- يـــابـــاي عليك مش هتبطل رخامه بقي ، السلام عليكم أولا بس

- وعليكم السلام ورحمة الله وبركاته ، هاه متصل ليـه ؟

- إقفل ياض ، إنت أصلا متستحقش الأخبار الحلوه اللي أنا جايبهالك دي

- أخبار حلوه ، يـــاريت ياخويا حد لاقي

- بص عندي خبرين حلوين وواحد وحش ، تحب نبدأ بإيه ؟

- قول أي حـــاجه ، المهم تتكلم بس

تنهد فاروق بسعاده وقال :

- أولــا كده يا سيدي نهي وافقت عليـــا الحمد لله

تنهد بدلع مصطنع وقال :

- هييييح وإيه كمــان

ضحك فاروق رغما عنه وقال :

- يـــاواد بطل بقي ، ثانيا يا سيدي لقيتلك شغل

إنتفض إسلام من مكانه واتسعت عيناه وقال :

- لقيتلي أنــا ؟!! قول وربنا

- وربنا لقيت ، بص هي شركة خاصه مفتوحه من كام سنه كده ، كانوا طالبين مهندسين ومدير شركتنا قالنا لو تعرفوا حد محتاج وظيفه وكده وانا رشحتك ليهم ، إبقي تعالي بقي بكره وهات معاك اوراقك وربنا يقدم اللي فيه الخير إن شاء الله

- بجد يا فـاروق انا مش عارف أقولك إيـــه ، ربنا يبارك فيك

- يابني عيب ماتقولش كده ده انت أخـــويا

- طيب وإيه الخبر الوحش بقي ؟

- بص هو مدير الشركة دي صعب حبتين واللي أعرفه إن محدش بيحبه ، بص أنا مش عايز أظلمه بس ده اللي أنا سمعته عنه ، عموما روح وشوف بنفسك

- يا عم وانا مالي ومال المدير ، هو حد لاقي شغل دلوقتي ، هحضر اوراقي وأجيلك بكره بإذن الله

- تعالي علي الساعه 9 الصبح كده مــاشي ؟

- ماشي بإذن الله

- يلا إقفل بقي

تنهد إسلام بدلع مستفز وقال :

- لا إقفل إنت الأول ، هخاف أقفل علي ودنك وتوجعك وإنت عارف أنا حونين إزااي

- مـاشي يا ظريف ، مستنيك بكره بإذن الله ، يلا سلام عليكم

- وعليكم السلام ورحمة الله وبركاته

_____________________

- أمــــامـــــا أمـــــامــــــا

قالها إسلام وهو يهرول كالأطفال نحو غرفة والدته ، نظرت له بسعاده وقالت :

- مالك يا واد في إيه ؟

أخذ يقفز كالأطفال وهو يقول :

- لقيت شغل يـــاماما لقيت شغـــل

ضمته والدته بقوه وقالت :

- يا مانت كريم يــــارب ، الحمد لله يابني الف مبرووووك

ثم نظرت له بتساؤل وقالت :

- بس لقيته إمتي ده ؟ ما إنت كنت لسه قاعد من شويه ومقولتش حاجه

- لأ ماهو فاروق كلمني دلوقتي وجابلي شغل

- والله يابني فاروق صاحبك ده فيه الخيــر ومن ساعة ما عرفته وانت حالك اتصلح

أجابها مؤكدا :

- والله فعلا يا ماما ، طلع جدع وراجل بجد ، وانا اللي كنت دايما بظلمه ، يلا الحمد لله

- طيب يابني هتروح إمتي تقدم ؟

- بكره إن شاء الله

- بإذن الله هتقبل ، هما هيلاقوا زيك فين يعني ؟

- قولي يـــــارب

______________________

تقدم إسلام للوظيفه وبالفعل تم قبولة بفضل الله ، لقد كان المرتب صغير بعض الشئ ولكنه رضي به وأخذ يدعو الله أن يرزقه من حيث لا يحتسب ، وبعد هذه المناسبه السعيده قرر أيضا أن يفاتح فاروق في الموضوع الذي يفكر فيه من عدة أيام ، فقال له مبتسما :

- فاروق أنا عايز أحفظ قرآن

نظر له فاروق بدهشه ممزوجه بالسعاده وقال :

- بجد والله !

إتسعت إبتسامة إسلام وهو يومأ برأسه إيجابا ويقول :

- بجد والله نفسي أحفظ ، بس مش مجرد حفظ لأ ، أنا عايز أحفظ بالتفسير ، والتفسير عندي كمان أهم من الحفظ علشان أكون فاهم كل كلمة بقولها وأحس بيها ، ينفع تحفظني ؟

إحتضنه فاروق بسعاده وقال :

- ينفع طبعــا ، بس الأفضل إنك تروح لشيخ يحفظك ، هيكون أحسن مني يعني ، عموما أنا هظبطلك ميعاد مع الشيخ اللي كنت بحفظ عنده وأقولك ، تمــام

- تمــام جــــدا ، بس ما يكونش بيزعق ولا بيضرب هاه

-

في الحلال

هههههه لأ متقلقش ده كويس اوووي والله

________________

بدأت سلمي تعود لطبيعتها مرة آخري ، طبيعتها القويه العنيده المُصره علي التغيير ، طبيعتها التي رفضت أن تعيش بلا هدف كباقي البشر ، طبيعتها التي جعلتها علي إستعداد لفعل أي شئ حتي تتقرب من الله عزوجل .

____________

بعد مرور شهر تقريبا كان إسلام واقفا في الشرفه ينظر إلي الشارع عندما رأي سلمي تعبر هي ووالدتها من أمام منزله ، وجد نفسه بكل براءة يشير إليها ويقول :

- إيه ده سلمي صاحبة هند أهي

ولكنه سرعان ما أشاح بوجهه جانبا وقال بصرامه :

- إيــه ياعم ما تغض بصرك ، وبعدين إيه حركات الأطفال دي !!

أحس بشئ غريب بداخله وخطرت في باله فكره فهبط من منزله وذهب لأقرب مكان يباع فيه ورد وإشتري خمس وردات صغيرات باللون الاحمر والوردي وعاد بهما إلي المنزل ، طرق باب غرفة هند ودخل والإبتسامة تعلو وجهه وقال :

- هند جبتلك ورته

قفزت من مكانها وأمسكت بالوردات بسعاده كالأطفال وأخذت تشتم رائحتهن بكل شوق ومن ثم إنتبهت له وهو واقف ينظر لها فقالت متعجبه :

- ربنا يخليك يا إسلام ، بس إشمعني يعني ؟!!

تنهد بخبث وقال :

- إيــه يعني حرام أدلع اختي الصغيره شويه ، قلت أجيبلك ورد ونقعد نتعرف علي بعض بقي وكده

رفعت حاجبها قائله :

- هنستعبط يا إسلام ؟!! نتعرف إزاي يعني مانت عارف عني كل حاجه

جلس علي الفراش ووضع ساقا فوق الآخري وقال بثقه :

- لأ طبعا أكيد مش عارف عنك كل حاجه ، إحكيلي عن نفسك لاني حاسس اني بقالي كتير متكلمتش معاكي

جلست بجوارة وقد فرحت بهذا الإهتمام وإخذت تحدثه عن نفسها لفترة طويله حتي إنتهت فقال :

- طيب وعندك إصحاب بقي ؟

- أكيد عندي

نظر لما بمكر وقال :

- طيب إحكيلي عنهم

نظرت له نظرة غاضبه وقالت :

- إحكيلك عنهم ليه ؟ وإنت مالك بيهم أصلا !!

ضحك ببراءه وقال :

- يا بنتي مش لازم اتطمن علي اختي مصاحبه مين وبتتكلم مع مين وكده ؟

أومأت براسها موافقه وأخذت تحدثه عن سلمي أولا ، حدثته عن أخلاقها وتفكيرها ، عن التغيير المفاجئ الذي حدث بشخصيتها وإقترابها من الله عزوجل وتغيير خطة مستقبلها بالكامل ، عن حبها لهما وحنانها عليهما ، عن إصرارها وعدم يأسها ، عن كل شئ جميل تشعر به تجاه سلمي

أخذ إسلام يستمع إلي الكلمات وهو في غاية السعاده ، لا يعرف لماذا شعر بالسعاده وقتها وهو يسمع عنها ولا يعلم أيضا لماذا الآن فقط فكر في السؤال عنها ، كل ما كان يدور بداخله وقتها انه يريد معرفة كــل شئ عنها وفقــط ، إنتهت هند من كلامها عن سلمي وبدأت في التحدث عن فاطمه ، لم يرد سماع شئ آخر بعد ما سمعه عن سلمي ، حاول الخروج من الموقف بطريقه مرحه وقال :

- إيــــه يا ست إنتي رغايه كده ليه ؟

نظرت له بتعجب وقالت :

- يابني مش إنت اللي قلت عاوز تعرف عني أكتر ؟!!

إبتسم ببراءة وقال :

- مــاشي منا عرفت عنك خلاص ، بس مليش دعوه بصحباتك أنا

وافقته الرأي وقالت :

- صح عندك حق

نهض من مكانه متجها لغرفته وهو يقول بمرح :

- إبقي إدفعي تمن الورد ده بقي هـــاه

أطلقت ضحكة عاليه وتبعتها بنظره ساخره وقالت :

- خد الباب في إيدك يا إسلام ، ربنا يهديك يابني

__________________

وقف امام شرفة غرفته وأخد ينظر إلي السماء ويقول :

- يــاربي هو في بنات كده ؟!! طيب وهو أنا معقوله أستاهل واحده زي دي بعد كل المصايب اللي عملتها في حياتي دي ؟

نظر للجانب الآخر وقال هامسا :

- بس أنا توبت والله ، وبإذن الله يــاربي تكون سامحتني وغفرتلي ذنوبي ، هو معقوله لو انا اتقدمتلها ممكن توافق ؟

عـاد بنظره إلي الشرفه وقال :

- طيب هو أنا ليه أصلا دلوقتي بالذات بفكر فيها ؟ ماهي جارتي من زمان ومكنش بيهمني أعرف عنها حاجه قبل كده ، معقوله يكون كلام فاروق عن الحلال والقرب من ربنا أثر فيا وخلاني أنا كمان أفكر زيه ؟ معقوله تكون دي البنت اللي ربنا كاتبهالي علشان يعوضني عن كل مره حزنت وتعبت فيها ؟ معقوله يـــارب تكوني بتحبني وسامحتني ؟

- طيب وليه لأ ؟ مش دايما محمد الله يرحمه كان بيقولي ان ربنا أحن علينا من أي حد ؟ ودايما كان بيقولي محدش هيحس بيك غير ربنا ، يا حبيبي يا محمد كان نفسي اوووي تكون موجود جنبي دلوقتي وتشوفني وانا كده ، يــــارب لو هي من نصيبي قربني ليها وسهلي الامور في الحلال ، ولو مش ليا نصيب فيها ارزقها بالزوج الصالح اللي يسعدها ويحقق لها ما تتمني .

بس انا برضو مش هسكت ، هحــاول .. هنخسر إيه يعني ؟!!

عاد إلي غرفة اخته وطرقها ودخل مسرعا وقال بسرعه البرق :

- هنــد أنا عايز أتجوز سلمي

لــ #رقيه_طه

يـــاتري هند هتقتل إسلام ولا هتعمل فيه إيه بعد اللي قاله ده ؟ ‎

طيب هل سلمي هتوافق ؟ هل هو يستاهلها فعلا ؟

طيب ممكن صعوبات تواجههم ولا الموضوع هيعدي علي خير ؟

كمان إيه رأيكم في إصرار سلمي ؟ ليه إحنا منبقاش زيها ؟!!

شايفين القصه الفترة الجاية هتمشي إزاي ؟

ويــــاتري نهاية الرواية قربت ولا لسه في حاجات مستنيانا ؟

الحلقه التاسعة عشر :

عاد إلي غرفة اخته وطرقها ودخل مسرعا وقال بسرعه البرق :...

- هنــد أنا عايز أتجوز سلمي

رفعت حاجبها وقالت متعجبه :

- نعم ياخويا !!

تنحنح بحرج وقال مؤكدا :

- والله بتكلم بجد ، أنا عاوز أتقدملها

نظرت له بعدم إهتمام وقالت :

- روح نام يا إسلام علشان عندك شغل الصبح ، إنت شكلك نعست وخرفت !!

قفز من مكانه وجلس متربعا في وسط فراشها وقال :

- مش هنـــام ، ومش ماشي من هنا غير لما تقوليلي أتقدملها إزاي

صرخت به قائله :

- يا إسلام إنت مجنون ؟!!

أطلق ضحكات عاليه متواصله وقال :

- اه اه مجنون ، وبرضو هتجوزها مليش دعوة ، لو ربنا أذن يعني

مطت شفتاها للأمام وقالت بغضب :

- يا إسلام إحنا هنستعبط !! يعني علشان قولتلك عليها كلمتين تقوم تقولي عايز أتجوزها ؟!! طب لو كنت كلمتك عن فاطمه كمان كنت هتروح تتقدملها هي التانيه !!

أخذ يحرك رأسه يمينا ويسارا وهو يقول بصوت طفولي :

- تؤ تؤ سلمي بس

تنهدت بغضب وقالت هامسه :

- لا حول ولا قوة إلا بالله ، ربنا يهديك بابني

قفز من علي الفراش ووقف أمامها مباشرة وقال مؤكدا :

- يا هند والله بتكلم جد ، أنا فعلا عاوز أتقدملها وإنتي لازم تساعديني

عقدت ذراعيها امام صدرها وقالت بإستنكار :

- طيب وإنت لحقت تعرفها بقي علشان تتقدملها ؟!!

نظر لها بثقه وقال :

- لأ ما أنا هعرفها في بيت أهلها ، كل اللي أعرفه عنها دلوقتي سمعتها الحلوه وأنا بصراحه يشرفني تكون مراتي بنت زي دي ، كمان كلامك عنها دايما كان بيبين أد إيه هي بنت محترمه فعلا وقليل اللي زيها اليومين دول ، يمكن زمان مكنتش بهتم أوي بكلامك عنها بس دلوقتي بتكلم بجد والله

أخذت تحك ذقنها عدة مرات وهي تفكر ثم نظرت له بجديه وقالت :

- يعني أكيد أكيد عاوز تتقدملها ؟

- وربنا اه

تنهدت قائله بقلق :

- بس اللي أعرفه إن هي مش هتوافق تتخطب قبل ما تتخرج ، هي كانت دايما بتقول كده ، كمان باباها شديد شوية فمش عارفه هيوافق علي إمكانياتك ولا لأ

نظر لها بتوتر وقال :

- هو عايز يجوزها لواحد غني يعني ؟

- بص مش عارفه بالظبط ، لكن برضو ممكن أجس نبضها كده وأقولك

نظر لها بسعاده وحب وقال :

- يعني هتساعديني بجد ؟

قالت بإبتسامه :

- هساعدك علشان أخلص منك بس

- طيب بصي اوعي تقوليلها حاجه عليا هاه ، إنتي بس شوفي الأول هتوافق علي المبدأ ولا لأ ، يعني هترضي تتجوز واحد ظروفه زيي كده ؟ كمان إيه مواصفات الولد اللي عايزه تتجوزه ، كمان قوليلها لو جالك واحد مواصفاته كذا وكذا هتوافقي ولا لأ ، كده يعني اكيد إنتي فاهمه أكتر مني في الحاجات دي .

- مـــاشي أمري لله ، وانا أقول برضو الواد جايبلي ورد وعاملي فيها عم الرومانسي ، أتاريها طلعت رشوة

- هع هع فاهماني إنتي دايما أهنود

______________

- سرحانه في إيه يا لوءه

قالتها سلمي عندما دخلت غرفتها لكي تحضر بعض الأشياء ولكن ولاء لم تلحظها ، إنتبهت ولاء وقالت :

- هاه

- بقولك سرحانه في إيه يا بنتي ؟

أسندت وجهها علي كفتها وقالت بحزن :

- إفتكرت العريس التحفه اللي إنتي رفضتيه ده ، بجد لو كان جالي أنا كنت وافقت فـــورا !

أخذت سلمي تضحك بشده وتقول :

- إنتي لسه فاكراه ؟ ده من أكتر من شهر يا بنتي ، والله ده أنا بحمد ربنا إن هو كمان رفضني علشان مكونش ظلمته معايا

قالت ولاء بإستنكار :

- والله إنتي عبيطه ، وده هتلاقي زيه فين بقي إن شاء الله

نظرت لها بثقه وقالت :

- هيجيلي أحسن منه

مطت شفتاها للأمام وقالت بإستنكار :

- ليه بقي إن شاء الله تكونيش الوزيرة وأنا معرفش ؟!! ولا بتعرفي في علم الغيب !!

جلست علي حافه الفراش ونظرت لها بجديه وقالت :

- لأ مش كده ، لكن علشان أنا عندي ثقه في ربنا إنه مش هيخذلني ، ربنا عالم باللي جوايا وإني بجد مش عايزه حاجه من الدنيا غير واحد يكون كل هدفه الجنه ويشدني معاه ويساعدني علي تربية أولادنا علي القرآن والسنه .

عارفه إني أقل بكتير من إني أستاهل واحد زي ده ، بس برضو ثقتي في ربنا أكبر من كده ، وكمان اللي بيدعي بيقين بإذن الله ربنا هيستجيب دعائه لان الرسول صلي الله عليه وسلم قال : "ادعوا الله وأنتم موقنون بالإجابة واعلموا أن الله لا يستجيب دعاءً من قلبٍ غافل لاه". رواه الترمذي ، وكمان ربنا قال في الحديث القدسي " أنا عند ظنِّ عبدي بي "

علشان كده يا ستي أنا متأكده إن ربنا هيرزقني بالإنسان اللي أنا بتمناه ، ماهو مش معقول هيكون كل هدفي أعيش حياتي صح وأرضي ربنا وربنا هيخذلني ومش هيساعدني ، مستحيــل يا بنتي لأن ربنا كريم وأنا واثقه في كرمه .

__________________

- يلا إتصلي إتصلي خليكي جدعه يلا يلا يلا يلا

قالها إسلام وهو يقفز في مكانه كالأطفال ويطلب من هند بإلحاح أن تتصل علي سلمي لتخبرها برغبتها في الذهاب إليها لكي يتحقق حلمه ويعرف رأيها في الأمر وذلك بعد موافقة والدته أيضا وترحيبها بالموضوع ، إستجابت هند لكلامه وإتصلت بسلمي وهو ينظر لها بترقب وقالت :

- الو سلمي ازيك

- وعليكم السلام ورحمة الله وبركاته ياختي ، الحمد لله تمام جدااا إنتي عامله إيه يا هنود ؟

- كويسه الحمد لله ، بقولك إنتي فاضيه النهارده ؟

- اه فاضيه هروح فين يعني !! إشمعزه ؟

- كنت عاوزه أجيلك أشوفك ينفع ؟

- يـــاسلام إيه الرضي ده كله ، يلا شدي العباية بسرعه وتعالي هستناكي

- مــاشي 10 دقايق وأبقي عندك بإذن الله

أغلقت هند الهاتف وغمزت لإسلام بسعاده فقال لها :

- هند اوعي تجيبي سيرتي في الموضوع هاه

- ما تقلقش يا باشا عيب عليك

في الحلال

- طيب يلا روحي بسرعه بقي وإسأليها كل الأسئله اللي اتفقنا عليها ماشي ؟

أومأت برأسها إيجابا وهي مبتسمه وتركته وذهبت لغرفتها لترتدي ثيابها وتذهب بينما إتصل هو علي فاروق ليعرف ما إذا كان يستطيع مقابلته الآن ام لا ، أجاب فاروق بالموافقه فهبط إسلام الدرج بسرعه وإستلقي اول سيارة أمامه وذهب إلي منزل فاروق ، حضر إليه فاروق فقال إسلام بسعاده :

- فـــــــــــــــــــــــارووووووووووووق

رفع حاجبه وقال متعجبا :

- إيه يابني بتصوت ليه منا قدامك أهو !!

تنهد إسلام بأريحيه وقال :

- أنا عايز أبقي زيك يا فاروق

تعجب أكثر وقال :

- زيي أنا ؟!! يعني إيه ؟

إبتسم بسعاده وقال :

- بص أنا نفسي أبقي كويس زيك كده وقريب من ربنا ومعملش ذنوب خالص

قطب حاجبيه وقال بدهشه :

- ومين قالك بقي إني مش بعمل ذنوب خالص ؟

ضحك بملل مصطنع ونظر لفاروق مبتسما وقال :

- يابني مش قصدي ، قصدي يعني إني عايز أكون كويس وخلاص

عقد ذراعيه أمام صدره وإبتسم لإسلام وقال بسعاده :

- مـاشي يا سيدي مبدأيا كده لازم يكون قدوتك سيدنا محمد عليه الصلاة والسلام وبس ، ما تبصش لأي إنسان وتقول أنا عايز أبقي زيه لأن كلنا مليانيين ذنوب ربنا يرحمنا ، كمان بقي في حاجه مهمه جـــدا وهي إنك تستشعر مراقبة الله ليك

نظر له متعجبا وقال :

- يعني إيه ؟

- يعني وإنت بتعمل أي حــاجه في حياتك تبقي حاطط في دماغك إن ربنا دلوقتي شايفك ، وتقعد تسأل نفسك يا تري ربنا دلوقتي راضي عني ولا لأ ؟ يا تري أنا دلوقتي باخد حسنات ولا سيئات ؟ لو عرفت تحس بكده فعلا يبقي إنت هتبقي كويس زي ما بتتمني

- طيب أعمل إيه تاني علشان أبقي قريب من ربنا ؟ أنا الحمد لله واظبت علي الصلاة في الجامع وبدأت أحفظ قرآن أهو وكمان قرأت سيرة سيدنا محمد وباقي الأنبياء ، وحاليا بقرأ في سيرة الصحابه ، أعمل إيه تاني بقي ؟

- في حاجات كتير اووي ممكن تعملها ، لو عبادات مثلا ممكن تعمل لنفسك جدول صغير كده وتحط فيه الحاجات اللي هتقدر تواظب عليها يوميا زي مثلا أذكار الصباح والمساء ، عدد معين من التسبيح والصلاة علي النبي والإستغفار ، صلاة السنن وصلاة الضحي ، قراءة سورة الملك قبل النوم ، ورد قرآن مثلا وورد تفسير يومي ، قيام الليل حتي لو ركعتين مع الوتر ، كده يعني

أما بالنسبه للمعاملات فحاول دايما تخليك قدوة بأخلاقك ، عامل كل الناس كويس وإبتسم في وشهم وحببهم في الملتزمين ، وطبعا طبعا بر الوالدين مفيهاش كلام دي ، وخد بالك من أختك اووي لأنها مسئولة منك ، إستئذن دايما من شغلك وروح صلي ومع الوقت هتلاقي صحابك عملوا زيك ، غض بصرك طبعا وحافظ علي بنات الناس من نفسك ، حاول دايما لو جه سؤال في بالك إبحث عنه وإقرأ فيه وزود معلوماتك ، إتفرج علي برامج دينيه بقدر الإمكان وخلي معاك دايما ورقة وقلم وسجل الحاجات المهمه اللي الشيخ بيقولها وإبدأ في التنفيذ ، امممم ده اللي في بالي حاليا

قال إسلام بمرح :

- معلش يا فاروق قولهم تاني بقي علشان أكتبهم في ورقه

وكزة في يده بشده وهو يقول بضيق مصطنع :

- إمشي يا إسلـــام من قدامــــــي

ضحك إسلام بصوت مرتفع وقال :

- خلاص خلاص والله فهمتهم وبإذن الله هبدأ في التنفيذ ، لــازم أكون من عمار الأرض ولازم أكون مسلم بجد

- ربنا يثبتك ويقربك منه أكتر

ثم نظر له بتمعن وقال :

- بس قولي إيه سبب القرار المفاجئ ده بقي ؟ يعني إيه اللي فكرك بيا دلوقتي وجاي فجأة تقولي عايز أبقي زيك يا فاروق ؟!!

أغمض عينيه للحظات ثم نظر له بسعاده وقال :

- علشان قررت اتدوز

ضحك فاروق بمرح وقال :

- تتدوز ! وماله يا خويا مش عيب ، بس برضو مفهمتش إيه علاقة القرار ده بالجواز

تنهد إسلام قائلا بأمل :

- مفيش يا سيدي شوفت النهارده بنت ماشيه تحت البلكونه بتاعتنا مع مامتها وفجأة كده لقيتني بسأل عليها وعاوز أعرف عنها كل حاجه وفجأة كده برضو حبيت شخصيتها أوي ونفس ذات الفجأة لقيت نفسي عاوز أبقي أفضل علشان أستاهلها بجد وأتقدملها بقي ، عارف إني مجنون بس هو ده اللي حصل والله

أطلق فاروق ضحكات عاليه متواصله وقال :

- طب كل ده جميل بس إيه حكاية إنك شوفتها تحت البلكونه دي بقي ؟ يعني لقيت بنت ماشيه في حالها كده قلت تتجوزها ؟!! وكمان فين غض البصر يا استاذ !

شهق إسلام بخوف مصطنع وقال مازحا :

- لالالا اوعي تفهمني صح ، البنت دي أصلا جارتنا وصاحبة هند اختي وانا عارفها من زمان ، كمان والله غضيت بصري ، انا لمحتها بس

ضغط علي يده بقوه وقال بسعاده :

- ربنا يوفقك يا إسلام ويجعلها من نصيبك لو فيها الخير ليك

ثم انتبه قائلا :

- بs خد بالك من حاجه ، إنت هتبقي كويس علشان ترضي ربنا وتبقي مسلم صح مش علشان هي توافق عليك ، فاهم الفرق يا إسلام ؟

أومأ برأسه إيجابا وقال :

- ماتقلقش يا فاروق ، أنا بدأت في الطريق ده ومش هسيبه لأي سبب من الأسباب بإذن الله ، كل الحكاية إني حسيت انها إنسانه بجد تستاهل كل خير فعلشان كده مش عايز أظلمها معايا وبإذن الله لو ليا نصيب فيها هكون فعلا الزوج اللي هي بتتمناه ، ولو مش ليا نصيب فيها برضو هفضل مكمل في طريقي إن شاء الله

- أيــون تمام كده ، ربنا يفعلك الخيــــر

كاد إسلام أن يذهب ولكنه تذكر موضوع غاية في الأهمية فعاد مره آخري وقال بتوتر :

- فاروق صحيح عاوز أسألك في حاجه

- إسأل

صمت للحظات محاولا تجميع كلماته وقال :

- فاكر لما قولتلك إن في واحد أعرفه كان يعرف بنت من علي النت وكانوا بيحبوا بعض وكده

إبتسم فاروق بمكر وقال :

- يــــــاه ده من حوالي سنه ونص او سنتين يابني ، بس اه فاكر ماله ؟

أخذ يفرك يده اليمني باليسري بتوتر وقال :

- هو من ساعتها ندم جــدا علي اللي عمله وسابها وتاب الحمد لله ، دلوقتي بقي لو حب يتقدم لواحده وسألته عن ماضيه وكده ،هل المفروض يقولها إنه كان يعرف واحده زمان ولا يكدب عليها ؟

أجاب فاروق بثقه :

- لأ طبعا ميقولش

تعجب إسلام وقال :

- طيب مش هو كده يكون بيخدعها ؟

تبسم فاروق وقال بحنان :

- لأ يا سيدي مش بيخدعها لأن هو تاب بجد وربنا ستر عليه فمينفعش يروح هو بقي يفضح نفسه ويجاهر بالمعصيه دي ، واجب علي أي حد فينا يا إسلام إنه يستر علي نفسه وميعرفش حد بالمعاصي اللي هو بيعملها ويتوب لربنا من سكات

في الحلال

- متأكد يا فاروق ؟

أومأ برأسه إيجابا وقال مؤكدا :

- متأكد والله يابني ، ولو مش مصدق روح بنفسك وإبحث عن فتاوي عن الموضوع ده هتلاقي كلامي صح ، أنا قريت في الموضوع ده كتير متقلقش

تنهد تنهيده قويه أخرجت كل ما كان يحمله من خوف وقال بفرحه :

- ربنا يريح قلبك يا فاروق

نظر له فاروق بخبث وقال :

- يـــاه هو صاحبك ده عزيز عليك أوي كده ؟ والله فيك الخير يا إسلام

انتبه إسلام فجأة ولم يستطع تجميع كلماته فقال بصوت متردد :

- هاه ؟ اه طبعا طبعا

بعد قليل إستئذن منه إسلام وغادر المكان ، شعر بأن قلبه يطير في الهواء ، فأخيرا قد شعر بالراحه من هذا الموضوع الذي آلمه كثيرا وكان يشعره دوما بالذنب ، كان يعرف انه لن يستطيع الكذب علي خطيبته في يوم من الأيام لأن إسلام والكذب أعداء ولكنه أيضا كان دائما يخاف من رد فعلها حتي بعد علمها بأنه تاب إلي الله وندم علي كل شئ ، لكن الآن وبعد أن أصبح لدية رخصه شرعيه أحس بالراحه أخيرا وأن هذه الصفحه من حياته قد تم غلقها نهــــائيــــا ، عاد إلي المنزل فوجد هند لم تأتي بعد فجلس في إنتظارها وهو مابين الخوف والفرح والضحك والحزن والجنون والملل ، لم يعرف كيف مر الوقت ولكنه لم يشعر بنفسه إلا عندما إنتفض من مكانه علي صوت مفتاح الباب وهو يتحرك في مكانه ، دخلت هند وأغلقت الباب خلفها فوجدته أمامها ينظر إليها بلهفه ويقول :

- هاه قوليلي بسرعه عملتي إيه ؟

كانت تتنفس بصعوبه فحاولت الراحه قليلا وقالت بضجر :

- طيب يابني إستني أخد نفسي حتي !

أجابها متعجبا :

- تاخدي نفسك من إيه يا هند ده إنتي يا دوب جايه من آخر الشارع!

تركته ودخلت غرفتها ، جلست علي حافة الفراش محاوله إلتقاط انفاسها ، دخل خلفها وجلس علي الفراش بجوارها وإنتظر حتي ترتاح قليلا وتبدأ في الكلام ، إلتفتت إليه بكامل جسدها ونظرت له بحزن وقالت :

- معلش يا إسلام ..

وصمتت ... نظر لها بخوف وأمسك يديها وهو يحركهما بعصبيه ويقول :

- هــــاه قولي بسرعه حصل إيه ؟

- يابني إستني عليا طيب

- يا هند إخلصي بقي وقعتي قلبي

إنتظرت قليلا حتي يتوتر أكثر وأكثر ثم قالت :

- شكلها كده والله أعلم هتوافق عليك يا إسلام ، هيص يا عم

قفز من مكانه وعاد للخلف قليلا وهو ينظر لها بتمعن ويقول :

- بجد والله ؟

أخذت تفكر للحظات وهي تنظر لتعابير وجهه وقالت :

- يعني ده اللي إستنتجته من كلامها

نظر لها محذرا وقال :

- هند اوعي تكوني قولتيلها عليا حاجه

أومأت براسها نفيا وقالت :

- يابني مجيبتش سيرتك خالص متقلقش

إقترب منها قليلا وهو ينظر لها بسعاده وقال :

- طيب قوليلي بقي اللي حصل بالتفصيل

- مفيش يا سيدي , هي قالتلي إنها كل اللي بتحلم بيه إنها تتجوز راجل بجد يشيل مسئوليتها ومسئولية ولادها ، حد يكون عايش بس علشان يرضي ربنا وياخد بإيديها للجنه ، يكون قدوة ليها ولغيره ويعلمها دينها ويحفظها قرآن ، نفسها يشجعوا بعض دايما علي التقرب من الله عزوجل أكتر ويكون هو ده هدفهم في الحياة أصلا ، مش مهم عندها إنه يكون عنده فلوس أو شقه ملك أو كلية قمه او كده ، يعني قالت أي كلية مش هتفرق واي وظيفه المهم يكون عنده مرتب يعرف يعيشهم حتي لو صغير هي ممكن تستحمل عادي ، طبعا يكون بيحبها اووي وبيحب روحها أكتر من شكلها ومش بيبص لواحده غيرها أبـدا وراضي بيها وبيناقشها لو في حاجه مضايقاه منها ، بإختصار يا إسلام عاوزاه مسلم بجد ، هو ده شرطها الأساسي

أخذ إسلام يستمع إلي كلمات اخته وهو في غاية السعاده ومع كل كلمة يزداد إحترامه لسلمي أكثر وأكثر ، شجعته هذه الكلمات علي ان يكون الرجل الذي تتمناه سلمي بحق ، أخذ قراره بأن يعدل من حاله قليلا ومن ثم يتقدم لها وينتظر من الله الخيـــر ، إنتبه علي صوت هند وهي تنادي عليه قائله :

- إيـــه ياعم روحت فين ؟

- هاه ؟ معاكي اهو

- طيب هتتقدملها ولا إيه ؟

- اه بإذن الله ، بس في حاجات كده هظبطها في نفسي الأول وبعدين أروحلها

تذكرت هند شيئا هاما فقالت بحرج :

- صحيح في حاجه مهمه لازم تعرفها

نظر لها بتوتر وقال :

- خيـــر ؟

- هي قالتلي إنها مش بتفكر في موضوع الجواز ده دلوقتي خالص ، لما تتخرج الاول

نظر لها بحزن وقال :

- الكلام ده أكيد يعني ولا إيه ؟ يعني خلاص كده مفيش أمل السنادي ؟

نظرت له بإستفزاز وقالت :

- أمل ماتت منتحره هيهيهيهيي

وكزها في ذراعها بقوه وقال بغضب :

- مش وقت إستظراف دلوقتي يا هند والله

أطلقت هند ضحكات عاليه أغضبته أكثر ثم هدأت قليلا وقالت :

- بس علي فكره في حل

إنتفض من مكانه وقال بلهفه :

- إيــــه قولي

- كان في عريس متقدملها من فترة كده وباباها ضغط عليها وخلاها شافته ، متهيألي المبدأ متاح يعني حتي لو بنسبه 5 %

ثم أجابت بثقه :

- يعني لو أنا قولتلها إن في شخص كويس ومواصفاته اللي هي بتحبها ممكن توافق تشوفه

إرتمي علي الفراش براحه وقال :

- أيــــوه كده ريحتيني ، بإذن الله هحاول اتقدملها قريب جدااااا

نظرت له هند وقالت بسرعه هائله :

- طيب وقريب ليـــه ؟

ثم أمسكت بهاتفها بسرعه أكبر وضغطت علي الازرار وفي خلال لحظات وجدها تقول :

- سلمي إسلام اخويا عاوز يتقدملك !

لــ #رقيه_طه

إمبارح كنا خايفين هند تقتل إسلام

النهارده بقي متهيألي الموضوع مش هيكون مجرد قتل ،، ده هيكون قتل وحرق وتعذيب وكل حاجه ‏‎grin‎‏ رمز تعبيري

ولا إنتوا إيه رأيكم ؟

يـــــــــــارب الحلقه تعجبكم ^__^

في الحلال

#في_الحلال

الحلقه العشرون :

أمسكت هند بهاتفها بسرعه وضغطت علي الازرار وفي خلال لحظات وجدها تقول :...

- سلمي إسلام اخويا عاوز يتقدملك !

نظر لها بذهول , إتسعت عيناه وضغط علي أسنانه بشده حتي كاد أن يحطمها وأمسكها من يدها بعصبيه وقال بصوت خفيض حتي لا تسمعه سلمي :

- يا بت إنتي مجنونه !! إقفلي بسرعه ولا إعملي أي حاجه

إرتفع صوتها أكثر وهي تقول :

- أيــوه والله يا بنتي إسلام أخويا شافك وعاوز يتقدملك

ضغط علي يدها أكثر حتي كاد أن يعتصرها ونظر لها والشرر يتطاير من عينيه ، أبعدت الهاتف عنها قليلا وقالت هامسه :

- في حاجات ماينفعش فيها غير الجنان ، تلميذتك بقي يا أستاذ

نظر لها نظرة أخافتها وقال بغضب :

- إتصرفي بسرعه يــا هند وإلا ..

قاطعته قائله بهمس :

- يا واد إصبر بس

إنتشل الهاتف من يدها بسرعه وهم أن يغلقه لولا ما رآه ، نظر لها بحده وقال :

- يعني إيه ده بقي إن شاء الله ؟!!

أخذت الهاتف من يده ونظرت له ببراءة وقالت :

- تصدق لسه مدوستش علي زرار الإتصال هيهيهيهيهيهي

أرتمي علي الفراش بقوه وزفر غاضبا :

- إنتي غبية صح ؟!!

جلست بجواره وربتت علي كتفه بإستفزاز وقالت :

- بنتعلم منك يا باشا

أخذ يحول نظرة ما بين النافذه وبينها فإنتبهت لذلك وسألته عن السبب فأجاب :

- كان زماننا دلوقتي سامعين ناس عماله تصوت تحت !

نظرت لها متعجبه وقالت :

- إشمعني ؟!!

رفع حاجبه وقال بمكر :

- علشان كان هيبقي في جثه مرميه تحت الشباك دلوقتي ، بس الحمد لله لحقت نفسها

عادت للخلف قليلا ونظرت له بخوف مصطنع وقالت :

- يعني رخم ومجنون وكمان قتال قتله ؟!!

ثم أردفت قائله بمرح :

- الله يعينك يا سلمي يا بنتي

إتسعت إبتسامته وهو يقول :

- الله يعينها فعلا !

____________________

كانت سلمي تشاهد أحد البرامج الدينيه لداعية شاب عندما أتتها ولاء ونظرت لها بتعجب وقالت :

- إيه يا بنتي اللي إنت عاملاه ده ؟!!

أجابتها بكل براءه :

- بغض بصري !

مطت شفتاها للأمام وقالت بإستنكار :

- يعني حطالي ورقة بتاع لوحه ورسمالي عليها ولد كرتون ضحكته لحد ودانه ولزقاها علي وش الراجل وتقوليلي بغض بصري ؟!! ده اللي هو إزاي يعني ؟!!

إرتفعت ضحكات سلمي وهي تنظر لولاء بتعبيرات وجهها الغاضبه وحركات يدها السريعه وقالت :

- عادي يا ولاء أهو تغيير ، بدل ما أنا علطول بتفرج علي الديكور أو علي التيشرتات بتاعتهم

زفرت بضيق وقالت :

- ويعني فيها إيه لما تبصي للراجل وهو بيتكلم ؟ هو هياكلك ؟!!

إلتفت لها بكامل جسدها وقالت بجديه :

- لا يا ولاء مش هياكلني ، بس غض البصر فرض علينا لان ربنا سبحانه وتعالي قال " وَقُل لِّلْمُؤْمِنَاتِ يَغْضُضْنَ مِنْ أَبْصَارِهِنَّ " وإنتي عارفه إني من النوع اللي مش بعرف أركز غير لو بصيت في وش اللي بيتكلم علشان كده بحاول أعمل أي حاجه تساعدني علي غض البصر ، وبإذن الله مع الوقت أتعود علي التركيز وأنا باصه في الأرض ، إدعيلي إنتي بس

قالت ولاء بتعجب :

- طيب بس ده شيخ يعني مفيهاش حاجه !!

تبسمت قائله بهدوء :

- يعني يا ولاء هو الشيخ ده مش راجل ؟!! أي راجل مهما كانت وظيفته أو درجه قربه من ربنا لازم نغض بصرنا عنه ، وحتي روحي إسألي بنفسك البنات عن رأيهم في الدعاه وخصوصا الدعاه الشباب هتلاقيهم عمالين يقولولك فظـيع وهييييح ووسيم ومعرفش إيه !! رغم إنه شيخ أهو لكن برضو في الأول وفي الآخر هو راجل وماينفعش نفضل نبص عليه كده

- ماشي يا سلمي براحتك ، بس إنتي كده مش بتزهقي يعني ؟

أومأت برأسها نفيا وقالت :

- لأ بالعكس والله ده أنا بكون مرتاحه جـــدا ، وكمان لما أكون مش ببص علي شباب خالص أكيـد ربنا هيجازيني خيـر ويحلي في عيني زوجي المستقبلي حتي لو هو شكله عـــادي ، أختط واثقه في كرمه بقي

تركتها ولاء وغادرت بينما دفنت هي رأسها بين كفيها وأخذت تدعو الله قائله :

- يــــارب إحفظني وإرضي عني وقربني منك أكتر ، يــارب قويني وساعدني علي غض البصر وإحفظلي قلبي وإبعد عني أي فتنه ، يـــارب جنبني الفتن ماظهر منها وما بطن ، يــــارب عوضني عن كل لحظه حزن عيشتها وإرضي عني وإرزقني باللي يساعدني وياخد بإيدي للجنه .

___________________

وبعد ثلاث أسابيع طرقت هند باب غرفة أخيها ودخلت وقالت بحيره :

- يا إسلام إنت مش هتروح تتقدم لسلمي بقي ولا إيه ؟ يابني ده الدراسه خلاص قربت جـدا ، يأما تروح اليومين دول يأما بقي تستني لما نتخرج ونكون فاضيين

نهض من علي الفراش بتثاقل وقال بحيره أكبر :

- والله يا هند كنت لسه بفكر في الموضوع ده دلوقتي

نظرت له بتعجب وقالت :

- طيب ومستني إيه ؟

تنهد بتوتر وقال :

- هروح أقولهم إيه يا هند ولا اتقدم بإيه ؟ إنتي من ساعة ما قولتيلي إن باباها عاوز يجوزها لواحد معاه فلوس وأنا قلقان ، وزي ما إنتي عارفه الفلوس اللي بابا الله يرحمه سايبهالي مش هتكفي جهازي كله والمرتب بتاعي برضو صغير ومش هيعمل حاجه

- طيب يا إسلام ما تروح وتشوف واللي فيه الخير يقدمه ربنا

صمت قليلا ثم نظر لها بتساؤل وقال :

- تفتكري ممكن باباها يوافق عليا ويخفف عني طلباته شويه ؟ وهل هي اصلا هتوافق تتنازل عن شبكه كبيره وفرح مش عارف فين والكلام ده ؟

ربتت علي كتفه مطمئنة إياه وقالت :

- لو علي سلمي متقلقش هي مش بتفكر في الحاجات دي خالص وأكيد هتوافق عليك لو لقت إنك فعلا الشاب اللي هي بتتمناه

ثم نظرت له بحيره وقالت :

- أما بقي باباها فبصراحه معرفش ، بس إحساسي بيقولي إنه هيعصرك

ضربها علي ذراعها بخفه وقال :

- لأ أنا كده إتطمنت بصراحه ، مش عارف من غيرك كنت هعمل إيه بس ؟

قالت بلهفه :

- هاه أروح أفاتحها في الموضوع بقي ولا إيه ؟

أومأ برأسه نفيا وقال :

- لأ إستني شويه هفكر تاني وأخد رأي واحد صاحبي في الموضوع وأشوف

غادرت الغرفه وإستلقي هو علي الفراش وأخذ يفكر في الآمر مرة آخري

_______________

» أفضل مطاعم الحلال في انترلاكن سويسرا
» صادق الصباح وسمية الخشاب يحتفلان ببدء تصوير"الحلال"
» الجيش الثالث مقتل 3 تكفريين وضبط 3 آخرين وتدمير مخازن سلاح بجبل الحلال