السؤال
ظلمتها ؟
والّلا شِدة عِندها
خلّتها ظلمت نفسها
نفس الكافيه بالصدفه من بعد السنين
جمعني بيها
والمرادي حَد غيرها بينديني
وحَد غيري بيناديها
سرحان فـ إيه ؟
نفس السؤال اتقال لها
كانت اجابتي
زيّها
ابداً مافيش
بنظرة مني ونظره منها
زحنا كل الموجودين
فماعدش موجود حَد غيرنا فالمكان
وكأن نبضات الحنين
رجّعت بينا الزمان
أهلاً حبيبتي
أهلاً حبيبي
لمسة إديها لإيدي بتزوّد لهيبي
عينيها ليل
مليان نجوم لو تُهت يوم
تصبح دليل
خُدودها نيل
كورنيشُه علّمني السهر
جبينها أكتر من قمر
ليلة تمام
تملّي نورهم لو لمح جوّايا خوف
يبدّلُه أمن وسلام
حُسنها بدلال وخِفّه
يزرع فـ الذهن الخيال
فاشتاقلها
بألف شهوة مغترب
متغلّفة
برغبة غاوياهم حلال
ضحكة شفايفها الكريز
خنجر بيهوى طعن قلبي
كنوع من القتل اللذيذ
أموت واحيا فـ نَفْس الوقتمعها وبلقى نَفْسي اِشتَقْت
طلبنا كان اتنين لمون
بيهدّي رتم العِشق فينا
قبل ما يصيبُه الجنون
واعمل حاجات
أكتر من إنّي أحضُنها
كان متهيّألي ان الحياة
هتبقى قبر من دونها
ضحكة زماني
صداها رجّعها فمكانها
وبرضو رجّعني فمكاني
ياخسارة ماشيه
والسؤال لسّاه ما بنّا
فيه واحده غيري
خلاص بقيت مرتحلها ؟
فيه حد غيري
خلاص بقيتي مرتحالُه ؟
رد القدر هيفيد بـ إيه
لو فيه إجابة على السؤال ؟
ما كُل واحد راح لحالُه
#ذِكر_ما_لا_يُقال