نص مسرحي بعنوان ( الصِدق المُزيِّـف ) فكرة وتأليف عيد تايب يوسف

المشهد الأول: (يُفتح السِتار والمسرح مُظلِم ثم يظهر للجمهور

بـ إضاءة محددة شخص مُمسِك بكتاب ويبداء بالكلام)

الشخص : يُحكى أن مدينة كان إسمها مدينة الصِدق والسرّ في تسميتها بالإسم ده هو إن ماكانش حد في المدينة يقدر ياخد حق غيره بالكذب لأن كان في حلقة يُقال إنـَّها مربوطة في سلسلة متصلة بالسما وكان قاضي المدينة لو في شخصين ومش عارف مين فيهم الصادِق ومين فيهم الكذاب بيخلـِّي كل واحد فيهم يمسك الحلقة ويحلف والحلقة لو الشخص اللي ماسكها صادِق ما بتتهزش وبتفضل ثابتة ولو كذاب بتتهز وساعتها بيعرف القاضي إن الشخص ده كذاب وبيعاقبه على كذبهُ.

(إظلام)

المشهد الثاني : (شخص إسمهُ صادِق جالس في بيته وماسك في يده قطع معدنية وبعد ما قام بـِ عَدُّهم قال )

الحمدُ لله والشُكر لله بعد ما كـُنت فقير يا صادِق ربّنا رزقـَك وباقيت تاجر كبير ومن التجارة أصبح عندَك ثروة وصلت لـ عشر قطع من الذهب الخالص الحمدُ والشُكر ليك يا ربّ.

( إظلام )

(2)

المشهد الثالث : ( شخص كبير في السِنّ يطرُق الباب و ينادي يا صادِق .. يا صادِق يابني فـ يفتح صادق الباب)

صادِق : أهلا يا شيخ إسماعيل إتفضـَّـل

الشيخ إسماعيل : يزيد فضلك يا صادِق يا إبني

صادِق : أخبارك إيه يا شيخ إسماعيل

الشيخ إسماعيل : الحمدُ لله يا صادِق بخير

صادِق : أنا هروح أجهـّـز الغدا هنتغدا سوا يا شيخ إسماعيل

الشيخ إسماعيل : مافيش داعي يا إبني أنا إتغديت عند أخويا جميل

صادِق : ومالوا إتغدا تاني

الشيخ إسماعيل : الله يبارك فيك خلينا نتكلم في المهم يا صادِق يابني

صادِق : خير يا شيخ إسماعيل

الشيخ إسماعيل : يا صادِق يا إبني إنت سايب بلدك وبقالك فترة مش صغيرة هنا في مدينة الصِدق وأنا خايف تعمل زي أخويا جميل اللي ساب بلدهُ و جِه هنا في مدينة الصِدق عشان البحث عن الرزق وأصبح تاجر كبير وأديلهُ سنيـن مش عايـز يرجع لبلدهُ ولـ أهلهُ

صادِق : يا شيخ إسماعيل

(3)

الشيخ إسماعيل : ماتقاطعنيش أرجوك يابني

صادِق : حاضر يا شيخ إسماعيل

الشيخ إسماعيل : برغم إن عمَّك جميل بقالهُ سنين مازرش بلدهُ ولا أهلهُ إلا إني كل فترة باجي أزورُهُ عشان صِلة الرحِم اللي هُـوَّ مش عاملـَّها أي إعتبار

صادِق : يا شيخ إسماعيل عمّ جميل راجل طيب لكن تجارتهُ واعمالهُ كتيرة وأكيد هيرجع في يوم من الأيام لبلدهُ ولـ أهلهُ

الشيخ إسماعيل : ولو برضو يا صادِق يا إبني .. أديني بعمل اللي عليا وبزورُهُ كل فترة

صادِق : فيك الخير يا شيخ إسماعيل .. طمنـِّي على أبويا وامي وإخواتي يا شيخ إسماعيل .. أخبارهم إيه ؟؟

الشيخ إسماعيل : هو ده الشيء المُهم اللي كنت عايز أكلمَك فيه يا صادِق يا إبني

صادِق : خير يا شيخ إسماعيل أهلي مالهُم

الشيخ إسماعيل : ما تقلقش بخير يا إبني بس أبوك محمّلني وصيِّه

صادِق : إيه هِيَّ .. قول يا شيخ إسماعيل

(4)

الشيخ إسماعيل : أبوك مريض وقالي إنهُ عايز يشوفـَك ضـروري يا صادِق يا إبني

صادِق : (يبكي ويقول) أبويا مريض أنا لازم أسافر وأشوفهُ

الشيخ إسماعيل : أنا هروح عند اخويا جميل أبات الليلة عندهُ والصبح بإذن الله هفوت عليك بدرري ونسافر سوا

صادِق : إن شاء الله يا شيخ إسماعيل

( إظلام )

المشهد الرابع: (شخص إسمهُ فطين يبدو عليه الذكاء جالس في يبيته ويسمع صادِق يطرُق بابهُ مُناديً يا فطين)

فطين : صادِق أهلاً يا صادِق إتفضل

صادِق : شكراً يا جاري العزيز أنا أسف إني جايلك في وقت مش مناسب

فطين : لا لا ماتقولش كده .. إحنا جيران وأصحاب كمان .. خير يا صادِق وإيه البؤجة دي إنت مسافر واللا إيه

صادِق : أيوه يا فطين مسافر الشيخ إسماعيل كان عندي إمبارح وقالي إن أبويا مريض وعايز يشوفني وبصراحة من كلامهُ واضح إن أبويا مريض مرض شديد

(5)

فطين : ألف سلامة وإن شاء الله خير يا صادِق ما تقلقش أووي كده

صادِق : يا فطين يا صديقي أنا جايلك ومحتاج منك خِدمة

فطين : أأمرني يا صادِق أنا رِقبتي سدَّاده

صادِق : عشت يا صديقي أنا مش محتاج منـِّك غير إنـًّك هتشيل الأمانة دي عندك (يمسك في يده منديل قـُماش مربوط وبداخلهُ العشـر قطع الذهبية)

فطين : وإيه هي الأمانة دي يا صادق

صادِق : (يفتح صادِق المنديل القـُماش ويقول لفطين ) دا رأس مالي يا فطين عشر قطع من الذهب الخالص

فطين : (وهو ينظـُر إلى الذهب في إنبهار) ذهب

صادِق : أيوه ذهب خالص دا رأس مالي وطالِب منـًّك يا فطين يا صديقي إنـِّك تشيلهُ عندك على سبيل الأمانة لحد ما أرجع من سفري

فطين : حاضر يا صديقي هتِرجَع تلاقي الأمانة في الحفظ والصُون

صادِق : أستودعكم الله يا فطين

فطين : في حِفظ الله يا صادِق

(يخرج صادِق ويظل فطين يُحدِّث نفسهُ ويقول)

(6)

يااه يا صادِق جيت مدينتنا وإنت فقير مُعدَم وبتدوُّر على شغل وبعد كده باقيت تاجر كبير وراس مالك عشر قطع من الذهب الخالص وانا أنا لسّه فقير زي ماانا عموماُ الفقر مش هيدوم وبكرة نشوف يا صادِق مين فينا اللي هيبقى الغني ومين اللي هيرجع تاني فقير

(ثم يضحك ضحكة توُحي بشيء سيفعلهُ مستقبلاً)

(إظلام)

(المشهد الخامس) : (فطين يجلس في بيته ويطرُق صادِق عليه الباب وهو يحمل بؤجة كبيرة وينادي يا فطين)

فطين : أهلاً بصديقي وجاري وحبيبي صادِق

صادِق : أهلا بيك يا فطين

فطين : طمِّنـّي على أبوك لعلـّهُ بخير إن شاء الله

صادِق : الحمد لله بخير وربّنا شفاه وعفاه

فطين : الحمد لله إنهُ بخير إحنا بقى هنتغدى سوا يا صادِق يا صديقي

صادِق : لالا مُتشكر..أنا لسّه جاي من السفر..هروح على بيتي أستريح.. وبكره هجيلك إن شاء الله وأقعد معاك (يتجه صادِق للباب)

فطين : (وهو يبتسم إبتسامه خبيثه) وأنا في إنتظارك إن شاء الله

(إظلام)

(7)

(المشهد السادس) : (فطين يجلس في بيته ويطرُق صادِق عليه الباب وهو ينادي عليه يا فطين)

فطين : (بتكشيرة) أهلاً يا صادِق

صادِق : (مُتـَعجـِب) أهلا بيك يا فطين أنا بعد إذنك عايز الأمانة اللي شايلها معاك

فطين : سلمتك يا صادِق يا صديقي ما أنا أدتهالك إمبارح

صادِق : (مُندهِش) أنا ما أخدتش منك شيء يا فطين

فطين : أنا إدِّيتك الأمانة يا صادِق

صادِق : فطين .. إنت كده بتخون الأمانة وانا ما اخدتش منك شيء

فطين : إنت بتهنِّي في بيتي أُخرُج بره بيتي وماشوفش وشَّـك هنا تاني .. ولولا إنـَّك في بيتي كان هيبقى ليا تصرف تاني معاك .. أُخرُج بره بيتي يالله ومتعتـّبوش تاني

صادِق : أنا هخرُج يا فطين بس هخرُج من هنا وهروح للقاضي المدينة عشان يعرف مين فينا الكذاب خائن الأمانة ومين فينا صاحب الحق

فطين :إنت اللي كذاب وخائن .. روح مطرح مطروح .. الأمانة اللي شلتها عندي أنا إدتهالك إمبارح وجاي دلوقتي تطالبني بيها

(يخرج صِادق ويَظلّ فطين وهو يُفكـّر ويقول )

(

كده هو في طريقهُ للقاضي وهيحكيلهُ على الي حصل .. والقاضي هيخلـِّينا نحلف سوا على الحلقة اللي بتبين الكذاب من الصادِق

أنا لازم أشوف حيلة تخليني أحلف والحلقة ما تتهزش وما اتكشفش

أيوه جاتني فِكره جُهنـَّميه أنا هجيب عصايا مُجوُّفه وأسدها مـن ناحية وأحُط فيها القطع الذهبية من الناحية التانية وأقفل عليها من الناحية التانية وبكده تبقى الأمانة في إيدي وهناك هاتصرَّف وهنشوف يا صادِق مين فينا الصادِق (ويضحك بصوت عالي)

(إظلام)

(المشهد السابع) : (فطين يجلس في بيته وفجأة يطرُق عليه الباب شخصين على رأس كل واحد منهُم خُوذة وفي يدّ كل واحد منهُم حَربه)

فطين : مين مين

الشخصين : إحنا الشـُرطة "قاضي المدينة عايزك يا سيد فطين"

(فطين يفتح الباب بثبات وثِقه)

فطين : حاضر حاضر هلبس هدومي وهاجي معاكم حالاً

(يرتدي فطين عبائتهُ ويُمسك بالعصا التي وضع بداخلها العشر قطع الذهبية ثم يخرج مع الرجلين)

(إظلام)

(المشهد الثامن) : (كرسي يجلس عليه رجل كبير بلحية وأمامهُ صادِق وفطين وعلى يمنهُ شخص يرتدي خُوذة ومُمسك بحَربة وعلى يساره شخص أخر بنفس ملابس الشخص اللي على يمينهُ وفي ركن من المسرح سِلـّم لابد من صعودهُ للوصول إلى حلقة مربوطة في سلسلة نازلة من سقف المسرح)

(9)

القاضي : يا سيد صادِق انا سمعت منـَّك كل اللي حصل وسمعت كمان منـَّك يا سيد فطين كل اللي حصل وبصراحة أنا مش قادر أحدد مين فيكم بيقول الصِدق ومين فيكم بيقول الكذب وعشان كده هخلـّي واحد واحد يطلع يمسك الحلقة ويحلف وأكيد الحلقة هي اللي هتفصِل في القضية ديه لأنها هتفضل ثابته في إيد الصِادق وها تتهز في إيد الكذاب

(تقدم صادِق نحو السِلـّم ثم صعدهُ وأمسك بالحلقة المعلقة في سقف المسرح وأخذ يقول)

أقسم بالله إني أعطيت فطين عشر قطع من الذهب الخالص على سبيل الأمانة.. وفطين ماردش الأمانة اللي شلتها عندهُ وكِذِب وقال

إنهُ إدَّهاني في أول يوم رجعت فيه من السفر

(لم تهتز الحلقة في يد صادِق وقال القاضي) صادق كلامهُ صادِق

(بداء صادِق ينزل من على السِلـّم ويقوم فطين وهو مرتدي عبائتهُ ومُمسك بعصاه التي تحوي العشر قطع الذهبيه وقابل صادِق وهو في طريقه للجلوس وقال لهُ بخبـُث) بعد إذنك يا صادِق يا صديقي إمسك العبايه والعصايه .. عشان أقدر أطلع السِلـّم وأحلف لأني مش هقدر أطلع بيهم السِلـّم وأمسك الحلقة

(نظر إليه صادِق بدهشة) هات يا فطين دلوقتي هيبان الكذاب من الصادِق (وأمسَك صادِق العبائه والعصا وهو لا يعلم ان العصا بداخلها الأمانة التي إئتمن عليها فطين (عشر قطع من الذهب الخالص)

فطين : (وهو يبتسم إبتسامة خبيثة) شكراً يا صديقي (وصعد فطين السِلـّم ثم أمسك بالحلقة المعلقة في سقف المسرح وأخذ يقول)

(10)

أقسم بالله أني أعطيت صادِق الأمانة اللي شالها عندي عشر قطع من الذهب الخالص .. وصادِق معاه الأمانه اللي شالها عندي

أنا سلـّمتهالهُ في إيدهُ

(فلم تهتز الحلقة وظلـّت ثابته أيضاً في يدّ فطين دليلاً على صدقه وأندهش القاضي والحُرَّاس مِمّا رأوه ونزل فطين من على السِلـّم وذهب إلى صادِق وأخذ منهُ العبائه والعصا التي تحوي العشر قطع الذهبية)

القاضي : الحلقة اللي بتتهز في إيد أي كذاب..أول مره يحلف عليها إتنين وكل واحد فيهم بيدّعي الصِدق .. وما تبيـِّنش مين فيهم الكذاب

فطين في سرّهُ : حلقة إيه ديه اللي توقف قدام ذكائي

القاضي : مافيش حد يقدر يحكم بالعدالة المطلقة غير الله وحدهُ

صادِق : يعني إيه حقي ضاع

القاضي : أنا مش عارف مين فيكم الصادِق ومين فيكم الكذاب ومافيش دليل أو شاهد يثبت حقك عوضك على الله يا سيد صادِق لو كنت فعلاً صادِق

صادِق : (يخرج بخطوات بطيئة وهو يصيح ويقول) حسبي الله ونعم الوكيل ويُكرّرها

فطين : (وعلى وجهه ضحكة خبيثة) سيدي القاضي.. في أي شيء مطلوب مني تاني .. يا سيدي القاضي

القاضي : تقدر تتفضل يا سيد فطين

(11)

(يخرج فطين ثم ينـُظر القاضي للحلقة وهي بترتفع إلى سقف المسرح ثم تختفي ويقول بعد إختفائها)

القاضي : إختفت الحلقة بسبب تدليس الناس وكذبهم اللي أصبح صِدق مُزيِّف .. اللهم أحفظنا ويكرّرها

(إظلام)

المشهد الأخير : (مره أخرى المسرح مُظلِم ثم يظهر للجمهور

بـ إضاءة محددة شخص مُمسِك بكتاب ويبداء بالكلام)

الشخص : في ناس أوقات بتخلـّي الحق يلبس ثوب الباطل

فيظهـر للناس على إنهُ باطل ويشوفوه باطل

مع إنهُ في الأساس حق

وأوقات بتخلـّي الباطل يلبس ثوب الحق

فيظهر للناس على إنهُ حق ويشوفوه حق

مع إنهُ في الأساس باطل

والإنسان هُـوَّ الإنسان فيه الخير وفيه الشر

وفي النهايه أكيد عدالة ربّنا أكبر من كل الأشياء

مهما إمتلك الإنسان من ذكاء

فالعداله الإلهيه أكبر بكتير من ذكاء البشر

(النهاية)

(12)

فكرة وتأليف

(عيد تايب)(01141481085)(01091467223)

جميل جدا كل اللى بتقدميه روعة
تسلمى يارب ومانتحرم من ابداعك

طرح مكتمل بجميع جوانبه جعل اقلامنا
تقف عاجزة عن الاضافة
بارك الله فيك على هذا الموضوع المفيد والنافع
كل الشكر والتقدير

يتجسد الابداع دائما في
مواضيعك عندما يكون
لها هذا التميز مجهود جدا رائع..
تحياتي لك

كل الشكر والامتنان على روعهـ بوحـكـ
نترقب المزيد من جديدك الرائع
دمت ودام لنا روعه مواضيعك

مـجـهـود رائــع جميل حداااا
مشكورين عالطرح الجميل

تسلم ايدك على مجهودك المميز
الله يبارك تعبك

لقد كتبتِ وابدعتِ
كم كان موضوعك رائع
فكم استمتعت وانا اقراء

احسنت الاختيار تـسلم عالطرح الرائع
يدوم عطائك المميز . تحياتى لشخصك

تسلم ايدك ع الابداع فى انتظار كل جديد ورائع
دومت متميز مع الشكر

» فرح يوسف - السورية والدة فرح يوسف سبب زيادة وزنها
» رانيا يوسف رانيا يوسف ترقص مع زوجها بحفل زفاف شقيقها.. وتتلقى قبلة خاصة من دياب.
» عبدالله بن سهل ابن يوسف الأنصاري , سيرة المقرئ عبدالله بن سهل ابن يوسف
» 30 فكرة عملية للتخلص من العصبية
» فكرة عملية للتخلص من العصبية