عيد تايب يوسف عضو متميز
عدد المساهمات : 222 نقاط : 508 السٌّمعَة : 5 تاريخ التسجيل : 30/07/2015
| موضوع: ( الخطايا السَبْع ) قصيدة بالعامية المصرية الأربعاء 28 نوفمبر 2018, 10:59 pm | |
| الخطايا السَبْع "الإختيار"
فـ الوقت دا كل أوتار الحياة إتجمَّعِت لحظة ما عينك دمَّعِت وبتعزف اللحن الحزين عَمّال بيحضُن صَرْخِتَك بَعد ما اتمدت اِيدين من بطن أُمَّك شَدِّتَك اِلرَحِم أوسع كتير مـ الدنيا وحِسبة لتّساع مش خاضعه لقانون المساحه خاضعه لإحساس الأمان اِللي بيدّي اِلنَفْس راحه ورغم حالتك البشر سامعين أنينك من وجع أنغام بتستدعي الفَرَح مين اِللي كان جَبَرَك زمان تقرّب مـ الشجرة وتاكل منّها مـ اللحظة دي إلإختيار بابُه على إيدك فِتَح
"الإنبهار"
ديماً بيبداء من عيون تِمس رَغَبات لمتلاك فـَ تشدّها وتشد روحك وقتها للتجرُبة
جَرَّبْت صِدْق جَرَّبْت كِدْب جَرَّبْت بُعد جَرَّبْت قُرب جَرَّبْت كُره جَرَّبْت حُب جَرَّبْت سِلْم جَرَّبْت حَرب جربْت سَهْل جربْت صَعْب
الملح لونُه زيّ لون السُكر اَبيض حين تدُوق اِلطعم بيخلّيك تِفَرَّق جوهر الأشياء فـ كُوْنها مش فـ لُوْنها وهو دا لُب القرار عَمّال تجرّب كُل شيء يظهر قُصادك فـ الطريق وتبتدي تِكشِف حقيقتُه بعد مايزول لنبهار
"الإنشطار"
مابين براح كاره لضيقه مابين خيال كاره حقيقه مابين خيوط كارها الماكينه مابين ارياف كارها المدينه مابين سكوت كاره كلام مابين حروب كارها السّلام مابين شُجاع كاره جبان مابين ملاك كاره شيْطان من كل حاجه وعكسها معدن الإنسان يبان والمعركه مع نَفْسُه صعبه يا إما يخرج بـ الهزيمة أو يحالفُه لنتصار بَعد حالة لنشطار
"الإضطرار"
مُضطر تمشي عـ الحِبال بس بحقيقتَك راح تُقع من قلوب كارها الحقيقة فـ وشِّك هتقَفّل بِبان لو عاوزها تاني تِفْتَح يبقى تمشي بهلوان بضحكه صفرا فـ وقت فَرْحه ودمعه طالعه للمُجامله فِـ موت فُلان ألوان كتير تلجألها ولكل موقف لون مُعيّن درجة الإتقان تبيّن مَدىٰ نجاحك وقتها
لون قبيح لون جميل لون بيغدُر لون أصيل لون بيصدَق لون كَذوب لون شَجاعه لون هروب لون بيقْسىٰ لون حَنون لون لعاقل لون جنون لون بينفع وقت جد أو هزار وهكذا تفضل فـ دايرة لضطرار
"الإنكسار"
النفس مركب والحياة بحر أقرب للمُحيط والموج حويط ليه تأمنه دا لمّا يقلب عـ المراكب لازم فيها يسيب كسور
كَسْر جاي من حب فايت معنى فـ دماغك يدور إن لو عـ الأرض جنة مش هتلقى فيها حور
كَسْر جاي من إيد صديق مَدّيتلُه إيدك تنقذُه لولاك دا كان هيموت غريق بس لمّا احتجتلُه سابك تعاني فـ وسط ضيق
كَسْرين كفايه ذِكرهم من مجموع كسور كتير فَرَضوا على نَفْسَك حِصار هل تقدر تخرُج سَليم من وسط امواج لنكسار
"الإنتظار"
اَوقات يكون اِللي غاب عن العيون حَد جوّاك ساب خيوط بتشد قلبك لشتياق مصحوب بلهفه تجيب دموع وتعيش بداء مالوش دوا غير في الرجوع
الغايب ابنك او حبيبتك أو صديقك أو دليلك أو نهارك أو طريقك
أياً كان مين اللي غايب الغياب عَمّال يقسّم قلبك المشتاق لهم فـ يترمي زيّ الحطب وقود لنار هل هتعطف السما عليك بغيث يطفّي لهب الإنتظار
"الإحتضار"
الماضي مؤلم والألم بيجي ديماً مـ الخطأ والحاضر أهو حبّة ورق تطير اوامك فالهوا لو ماكنتش تمسكه عشان مستقبل تكتبُه أكيد هيصنع مشنقه حولين رقبتك تبتدي تخنق فـ روحك من فشل قاتل طموحك من ظروف حواليك تطوف وتبث خوف فـ تبقى خايف م اللي جاي قلبك مابين حياه وموت نُصُّه مَيّت نُصُّه حَيّ بس لاهُوْ قادر يعود علشان يصلّح اِللي فات ولا حتى عَندُه مَقدِرة يعرف مصيرُه فـ اللي آت يفضل وتر مالوهش لازمة فـِ الجيتار أصعب خطيئه فـ الخطايا لحتضار
#ذِكر_ما_لا_يُقال
| |
|