أربع نُسَخ للروح
الدنيا أُوضه
والزمن أربع حيطان
رغم المساحه الضيّقه
بتبان براح
مهما كان فيه مِيْت جناح
فـ ضَهرك مزروعين أمل
بيعزفوا لحن الخلود
ويحسّسك ديماً بإن
خروجك شيء غير مُحتمل
برضو الخروج بيساوي موت
فجأه مايعودش النَّفَس
من تاني يدخل جوّه صَدر
العَرض ساري بدون تذاكر تلتقيه قُدّام عينيك
أربع زوايا كل زاوية
فاتحة كادر
(كادر أوّل)
فُستان وبَدْله
وناس تدمّع مِن فرح
أبوك الدنيا فرّقت قلبُه فـ مفارق
واُمك الأرض اللي قِدرت تجمَعُه
وانت فـ ضَهرُه حِلم عُمْر بـ يزرَعُه
فـ ليلة فيها
الحُب في عروقهم سَرَح
عَرَق جبينُه
من أثر مُتعة جِماع
قد أعلن بدء اِنطلاق
مارثون وغرضُه
مين هيوصل للرَحِم ؟!
سَبَقْت ملايين لجل توصل
وَحَدك فـَ تفوز بـِ الحياة
وهُما رِجعوا للعَدم
شِلْت الأمانه بـِ مَكسَبَك
كأنك آدام من تاني غاوي الهبوط
مَشهد درامي مأساوي
بيَحتَوي سِر الوجود
( كادر تاني )
ولأن روحك زيْ سما متزيّنه للناظرين
من جمال توب البراءة
يُعتَبَر الكادر دا
أكتر الكادرات إضاءة
فيه طفولة بتتوشم
جوّه خزنة ذكرياتك تضوي ألوان السعادة
تنعكس فـ العين حنين
إستحالة يوم يقل
مهما مَرّ عليه سنين
ضحكة اُمك بطّانية
تدفي جسمك فـ الشتا
واللي أكتر من كدا
فـ الصيف بتبقى نسمه هالّه
تلقى فيها الحَر ضِلّه
وتبتدي
حَسب اِحتياجك مـ المشاعر
بعد ما بتبداء تعبّر
تلقى أُمك تديهالك
من طيبيتها تشوفها جنّه
وكف اَبوك اِللي اِتبرا
من اِلشّقا
لمّا بيطبطب عليك
بيحسّسك اِلكون أمان
وإن نظرة من عينيه
بتثبّت المعنى دا فيّك
( كادر تالت )
بـ اِسم شهوات اِلبلوغ
تبتدي نَفْسك تصوغ
كل فِعل لنُسختين
والحَكَم فـ الإختيار
دفّة هواك
الدنيا مسرح وانت لاعب
دور شيطان مع دور ملاك
تقدر تقول الدور نهايتُه
نهاية حتميه فـ حُدوثها
للنجاة أو للهلاك
( كادر رابع )
ضَهر مَحني وشَعر أبيض
زّي بياضْ ضؤ الفلاش
والعَضم بَعد ماكان زمان
فـ اِلشِدّه زان
دي الوقتِ أصبح أبلكاش
الزُهد يغلب أي شهوة جوّه منك
لأنُّه نابع من يقين
إن اللي باقي مش كتير
يمكن حتى أقل من
وقت حركة رمش عين
إيه ياعم الشيخ يا زاهد
راضيه فيك الروح دي والّلا
رضاها رَهن لألف عِلّه
عشان تفوك الرهن لازم
تاني تتعاد المشاهد
والأكاده مافيش إعادة
لـ حَد كان
على روحه شاهد
دنيا أوضه
والزمن أربع حيطان
رغم المساحه الضيّقه
بتبان براح
مهما كان فيه مِيْت جناح
فـ ضَهرك مزروعين أمل
بيعزفوا لحن الخلود
ويحسّسك ديماً بإن
خروجك شيء غير مُحتمل
برضو الخروج بيساوي موت
فجأه مايعودش النَّفَس
من تاني يدخل جوّه صَدر
العَرض ساري بدون تذاكر
تلتقيه قُدّام عينيك أربع زوايا كل زاوية
فاتحة كادر
الكادر : مُصطلح سينيمائي يعني الحيز الذي تَرى فيه لقطات المَشاهد
#ذِكر_ما_لا_يُقال