من وَحيّ الدراما الهزليّه
( دراما الأرجوز )
أنا لسّه بـ اَعيش والروح بتإن
من فوق اِكتفها جراح بالطِن
مش عاوز حَد بألمي يحس
بقيت أرجوز
عمّال بيضحّك خَلق اللاه
وهُوَّ بيبكي من جوّاه
شُفتوا اللا يجوز
خسران مـ الحزن يخلّي الغيْر بالفَرْح يفوز
( دراما الشاب العازِب )
كات ممكن تفضل لو أملُك
مُرتب ثابت مع شقّه
مَصلحة النَفْس البشريّه
ديماً بتكون بعيون عاميه
مُفتَقِده الرحمه مع الشّفقه
كات أول نِمرة فـِ فرحها
منولوج بـِ حُروف مشحونه بـ خُوف وعشان مكسوف
اِتحوّل فجأه كلام كوميدي
زغزغ فـ ودان المعازيم
صراخات مـ الضِحْك المتواصِل
الفقره بدون أي فواصل
وهِيَّ عيونها من الحاصل
عمّاله مـ الضِحْك تدمع
وفجأه لقتهم بقوا نجمه
من شِدة دهشتها بتلمع
وانا قلبي بيغرق فـ جحيم
عِرفتني رغم الألوان
الفقره بحالها ومنولوجها
الشخص الخسران من حُبِّك
بقى هو بطل التصميم
( دراما الطفل العاجِز )
كان قاعد فـ الفصل مسهّم
وعيونُه شاردين وبتحلم
السما من فوقُه هيوصلها
وهيفتح بإيديه اِبوابها
فاضلُّه خلاص درجة سِلّم
أخيراً هيكلم ربُّه
قُدّامُه مافيش أي حواجز
رَكّبلي رجل بدل رجلي
علشان ماابقاش انسان عاجز
جَرَس المرواح هُوَّ المُجرِم
زعّق عـ الأخر فـ ودانُه
ما رأفش بـ حالتُه ومن صوتُه
أهو جسمُه كلُّه بيتألّم
مع حُزن بيضربُه ويشدُّه
إكمنُّه يعني اَكبر منُّه
من حلمُه قال لُه ياالله اخرُج
وزمايلُه بدأوا كالعاده
بتعاير فيه علشان أعرج
( دراما موظّف حكومي )
مش عيب على سِنَّك تتسوّل
لا وانت فـ الدوله موظّف
كان صوت الباشا بيتَّريق
فاكرني راح اسيبك تمشي
بتبوس فـ إيديا وتتأسف
لو بوست الجزمة ماانيش حالّك
والمُخبر على وشُّه بيعزف
اللحن الرسمي بحَذَفيرُه
كام باشا بيضحك على الموقف
والدم ملوُّن مناخيرُه
بيبكي وبيكلّم نَفْسُه
كان نِفْسُه يجهّز بنتينُه
طب هو هينفع بمرتب
بيأكّل أُسره بالعافيه
ملعون الميري وقاونينُه
عالحجز بشلاليت سايقينُه
والباشا بيضحك عالأخر
وَصّوهم جوّه وقلولهُم
أهو دا بالذات يطلّع دينُه
( دراما مُستَمِرّه )
راح اسيبك تضحك على روحك
الواقفه فوق سقف طموحك
عَمّاله تصفّر وتشاور
بإيديها لسرب الأحلام
ينزل ويبيّت فـ الغيّه
ويشاركوا بعض الأنغام
راح اسيبك دي الوقتِ عشان
النّوم بيبنّج فـ عينيا
تصبح على كام موقف بُكرة
يستاهلُه منَّك كام ضِكة
من وَحي درامة هزليّه
#ذِكر_ما_لا_يُقال
الخميس 29 نوفمبر 2018, 2:24 pm من طرف 
