عيد تايب يوسف عضو متميز
عدد المساهمات : 222 نقاط : 508 السٌّمعَة : 5 تاريخ التسجيل : 30/07/2015
| موضوع: ( اللُغز ) قصيدة بالعامية المصرية الإثنين 26 نوفمبر 2018, 11:47 pm | |
| اللُغز
لاكُنت خايف بـ ارتِجِف ولامتطمّن للأسف تقدر تقول حالتي لُغز حَلُّه فـ إيدين الإله بيني وبين المشنَقة كات خطوة واحده لقيتها بتختصر الحياه من طفولة بتبكي على حالها الملايكه عشان شفوها بتندبح تحت الكباري ولا حَد من حواليها داري ولسانها يلعن كل مِن لُه يد ساهمت في سبيل تشويه برائتي فـ كل مرّة بـناام فـ وسط عيال كتير واحس برضو ان انا على طول لوحدي جفوني ديماً بوابات وقت الكابوس مش بتفتح إلا لمّا كل أحداثُه بتِخْلَص شُفت عيّل كان بيضحك قال لي بُص بابا كل يوم يجيبلي شيبسي وشيكولاته وملَبّس وقبل ما اتكلّم معاه ابوه ندَهلُه ازّاي تسيْب أُختك وتنزِل مـ العربيه يا اَبني فجأه وانا كنت مشغول بـ الكلام مع المُدَرِّس قال لُه انا اسف يا بابا دخل فـ حُضنُه وركِّبُه العربيه تاني وانا بـ ابكي على نفسي فـ مكاني الأب كلمة لساني بيستغرب حروفها أنا طفل فعلاً ليّا أب زيّ العيال اِللي بـ اشوفها ماسكه فـ إيدين أبَّهتها من بَعدها ليالي ياما كُنت اَبحلق فـ السما واقول انا اِبن مين يارب اَفتح إيديا واقول لو فيه إجابه هاتها وارجع أضُم إيديا لمّا أحس بيها مِخدِّله واَفْتَح كفوفي القيها فاضيه مافيش فـ مَرّه تشوفني عيني فـ المرايه وتبقى فيها عنّي راضيه النقص واضح عـ الملامح الجبين ناقص حَنِين يظهر بـ لمسه من كفوف إيدين أبويا الشقيانين والخدود لسّه برضو أرض بور عُمْرها فـ يوم مافِرْحِت بـ النهار كان نفسي أُمي كُل خَد تسيبلُه بوسه كـَ ذِكرىٰ توهِبها الخَضَار أنا اللي حُزني أشد من حُزن اليتيم انا مُصِبتي طلقة من ذُل ومهانه مضروبالي فـ الصَّميم أول سيجارة شِربتها ماجابش عُمْري وقتها سَبَع سنين من يومها وهِيَّ صاحبتي دُخّانها يشبه سِكِّتي والعُمْر ايامَه بيشبه تبغها قُدَّام عينيا بيتحِرِق من يوم ما وعيت عـ الدنيا وانا عايش وحاسس بـ القلق والزمن حسّيتُه مُخبِر بـ افترا عمّال يكفكف وشّي ويبهدل كرامتي يعني قيمتي بالنسبالُه واد مُسَجَّل سَحَلني وسفّفني التُّراب كان كل يوم عَمَّال بيقتل جوّه مِنّي كل حاجه فيا حِلوه صَبَحْت غِنوة كلامها هابط ولحنها محتاج لضابِط كُنت نِفْسي ألاقي حد يمد إيدُه وينتشلني مـ العذاب الجاني مين المُجتَمَع ؟ واللا أب وأُم غِلطوا وكل حَبْل لرحمه كان يربطني بيهم اِتقطع ؟ مُتَّهم وكل واحد فيكوا بالنسبالي قاضي خَلّوني اَدافع عن قضيّه صاحبها هيموت السّاعادي كُلِّنا أولاد لآدام فـِ الحياة عايشين بنبني يعني أصل حياتنا مَبنىٰ من الظروف يا إمّا يحمينا يا إمّا نشوفُه يتدربك فوقينا ولو ما موتناش نلقى روحنا مشوّهه و وقتَها هـَ نِحِس إن الدنيا سيما والبشر جمهور متابع للجريمة الجاني مش واحد ياناس والدليل لو دققتوا معايا أكتر مش هتلاقوا بصمة واحدة لا دا فيه بصمات كتيرة والقانون بيقولوا أعمى بس نسيوا يوصفوا نوع العما وإنُّه مايخُصّش نَظَر دا أصلُه بيخُصّ البصيرة ماانيش شِيْطان ولا حد فيكم كان مسيح لكن خلاص ما عدش ينفع حُكمُكُم فات الأوان ماعدش فيه فُرصة تتيح ليّا من تاني النجاة خلاص مافيش بيني وبين الموت خطاوي وانا لا خايف بـ ارتجف ولامتطمّن للأسف وحالتي زيّ ماقولت لغز حَلُّه فـ إيدين ربنا فـَ ماتِسألوش فـِ الحل ساحر أو حتى تاخدوا رأي حاوي #ذِكر_ما_لا_يُقال
| |
|