( أصول اللعب ) قصيدة بالعامية المصرية

أصول اللعب

مش قَدّ اللعب ليه تلعب
واللا انت فرحت

بـ المكسب
عشان ماكسبت

فـِ الأوّل
فـَ بتهيّص وتتنطط وبتزيّط
طبيعة اللعب بيغوّط
عشان يحلو بيطوّل
فَـ ماتجيش فجأه تستعبط
وبعد خساره بتعيط
رميت ورَقك رما ورَقُه
على ترابيزه دوّاره
رمالك طُعم اديك كلتُه
وشفتُه راضي بخساره
مافهمتش إنّك السمكه
وإنُّه ناوي يصتادك
حسب الجو والحاله
ساعات يستخدم الشَّبَكه
يا إمّا يرمي سنّاره
الشُرب بَعد أوّل كاس
مابيلذّش
وتهويشك لو اتكرر
مابيهزّش
البنت في العيون فرسه
ماتتسبشي بدون خيّال
رمالك ورقه بتبرجل
حساباتك
فـَ سِبت البنت واتشتت
فجأه استبدل الأحوال
بداء يضغط على الأعصاب
بكام لِعِبه
تزوّد في إيديك رعشه
حَسّ بقوّتك هشّه
ذكاء منُّه فتحلك باب
عشان تخرُج من الزنقه
وتكمّل خطه مرسومه
عشان تمشي بـ هواه تلقى
الشّايب سلّمك للواد
فـ قَش اللي اترمى ع الأرض
م اللي رميتُه من أوراق
واديك بغباء
عشمان من تاني وبتحسب
على التربيزه هتعوّض
فـَ سابك رغم سيطرتُه
تعمل فـِ الّلِعِب مابدالك
هيألك إنُّه عالابيض
طبخلك وضع يحلالك
رميت اكتر
رمالك سِم فـِ السُكر
وقبل حتى ما تفكّر
بقى بـِ الكومي متسيّد
مافيش دبّور مابيزنّش
ويسْلَم من خراب عِشُّه
واللي بيخسر فـِ لِعْبتنا
ضروري بيتسلخ وشُّه
وأصول اللعب يا شاطر
بيقول الضِحك فـِ الأخر

#ذِكر_ما_لا_يُقال

» قصيدة بالعامية المصرية (( العرّاف ))
» ( المَحطّه ) قصيدة بالعامية المصرية
» قصيدة بالعامية المصرية ((( العُوره )))
» ( تُفّاحه ) قصيدة بالعامية المصرية
» ( بورتريه ) قصيدة بالعامية المصرية