العم سام
سيناريو بـ لون دَمَويّ درامي
مُنتج ومُخرج بالفعل بدأوا ينفـّذوه
ممثليـن من غيـر أسامي
بيقدّمولهم كـل اللي منهم بيعُذوه
ورق الشجر عمّال يسقـّط الزُهور ألوانها بَهتت
منظـر فظيع ناس شايفينوه ربيع
وبيوصفوه بـ إنـُه عربي
زيِّ واحدة أجنبيِّه أصبحت من أصل مصري
لأنـّها لـِبسِت إشاربي
شُفت المُفارقة حاجة إنت شايفها حمره
ناس تقول لك لأ دا بمبي
المُخطـّط مش بإسمُه المُخطـّط للـّي رَسمُه
واللا إيه رأيك يا صاحبي ؟!
في الحياة إتوقـّع يحصل أي حاجة إلا حاجة
إن عربي يحب اخوه زيِّ الخواجه
هُمّا هِناك وِحدة وتكتـُّل
واحنا هِنا في بعض نقتل
شُفت السَّذاجة
ألف حزب وألف راية
كل راية بألف غاية
بيتصارعوا ف عُنـُق الزُجاجة
رافع ف وش أخوه سلاح
شايف امُّه بتـُغتـَصب سايبها تِحبَل من سِفاح
عاجبُه شأنـُه مربّي دَقنـُه
طالع فوق المأذنة بينادي حيّ على الفلاح
الدّم سايل ع التـُراب إيديه مرفوعه للسما
مش مستني حقـُه يرجع من نظام أو محكمة
بَـشر كتير هذا الزمان
يكفرون بدين محمد ويؤمنون بمُسيلمه
العم سام مُـربّي الحمام
بيبعتـُه في كل حتـّه برسالة حُب وسلام
بدون مقابل أو ثمن
بَعـَتـُه لـ تونس بَعـَتـُه لـ مصر
بَعـَتـُه لـ ليبيا وكمان لـ سوريا واليمن
ولا عزاء للأذكياء
ما قبـل منهم زار بنفسُه قنداهار ويِّه العـراق
دع عم سام يفعل بالعالم ما يشاء
دع الغباء للأغبياء
وتعاله نِدعي ربّنا بـ قلوب نِظيفة مؤمنة
يبعت مدد
من تاني يبني كل شيء صابـُه الهدد
يلحق وينقذ أُم و ولادها بيصرخوا
بتضمهم بقلب عمّال ينتفض
صوت الـرُصاص سرق الأمان لمّا ولادها في حُضنها بتـرتعد
يرجّع وطن للاجئين فقدوا السَكينة والسَّكن
بيرددوا أحدٌ أحد فردٌ صَمد
يا حرب كوني بالدُعاء برداً سلاماً
وا ارحمي دمعاً يسيل
يا مُجيب السأليـن فـ التـُوهه انت الدّليل
يا بـركة سِدنا النبي وبـركة البيت الحرام
يابركة سِدنا المسيح والبتول ست الأنام
تهدي أولاد إسماعيل وترُدُّهم لعبضهم ردّاً جميل