القطر
قطر سوُّاقـُه بيغني عـ الخلايق
بالكلام البزراميط
الغريبة إنـُّه لسّه برضو سايق
اللي بيتكلـِّم مجنون
ليه اللي بيسمع عبيط
وقف لـُه شاب مـ الـركاب اللي فاهمين القضية
سألـُه ليه تبقى السِواقة غـُصبانيِّه
واخدها حِكـْر على اللي زيَّـك
واللي شبهـَك
يا إمّـا ليك يا إمّا لواحد من قـَـرايبك
من زمان القطر دا
إنتوا قلبينـُه تكيِّه
قال لـُه ياابني عـِلـتـي اللي انت
بتجيب سيرتها في كل حِتـّه
مافيهاش جـِعْـرّ أو نِتن
قرّب تعاله خد هاقولـَّـك
مالك كده خايف كإنـَّك
طالب وداخِـل يمتحن
قال اجرّب منـُّه اقرب
أسمع كلامـُه واستوعب
قال لـُه ياابني انا نفسي أبني
جيل عظيم من الشباب
لو ينفع ابيع نفسي وا اضحّي
مش مستني اخد ثواب
دا انتوا أملي ونور عينيِّه
بس ليه تلبسلي توب الثورجية
حلّ عنـّي وياريت تسبني
عشان أركز في السِواقه دا السِواقه مسؤليِّة
عنها ربَّك هيحاسبني
عمل لـُه فيها
كأنـُّه واعظ أو نبي
فاكرُه جاهل
لكنـُّه فاهم مش غبي
امّا صحيح راجل مسهوك
كلامـُه زيِّ طبيخ مسبـِّـك
والناس بتاكـُل
بس الحقيقة
كـلامـُه زيِّ قـُرص المشَبـِّـك
تيجي تاكلـُه لازم صوابعك تلبـِّـك
أه منـُّه إبن اللذينا
عَمّال يتمسكن مَسكـَنه
فاكر أمور السهتنا
هتحرك الطيبه فينا
كـأنـُّه من يهود خيْبر
وكأنـّنا قاتلين كليبر
عايزنه نقعُد عـ الخازوق
كل دا علشان يسوق
زيِّ الشطان لا بيهديك
ولا بيخلى مـ النجاسه
ملعون أبو كلاب الحِراسه
اللي تهوهو عـ الشريف
وتطـرمخ على الدياسه
كأنـّنا في سوق نِخاسه
جواري على كل لون
جاريه ماسكه إزازاه حمرا فيها خمـره
ناويه تـِفـتـَح
جسمها عمّال يتمرّجح
قاعده على حِجر الزبون
رجّاله بشنبات بتـُرقـُص
محسوبين على الجواري
ضمايرهم زيِّ الكباري
بتمشِّي صفقات وبـزنس
البليه أهي لاعبه ياريس
وكلـُّه ماشي بالقانون
ليه راميين طوبة الفقير
عايزينـُه يفضل بـ جَهلـُه
أو حتى ياخدُه الطاعون
ياخوفي لا الليِّلة تبهوأ
ومانعرفشي نلمَّها
الناس من كل حِتـّة تهبأ
تاكـُل اللي فـ وشّها
ويصيب العاقل جنون
ساعتها هتشيل القناع
تبقى مواجهه
بينك وبين ملايين جياع
يا خوفي لا الخراب يحلّ
وحديد القضيب يفلّ
القطـر بينا يتقلب
والشـَرق يستسلِم لـ غرب
بدون تعب وجنود وحرب
الهويِّه تتسلب