عيد تايب يوسف
عضو متميز
عدد المساهمات : 222
نقاط : 508
السٌّمعَة : 5
تاريخ التسجيل : 30/07/2015
 | موضوع: ( خُسارتي بشَرَف ) قصيدة بالعامية المصرية  الثلاثاء 27 نوفمبر 2018, 1:57 pm | |
| خُسارتي بشَرَفبنيت من روحي المقام
وضميري كان صندوق نزور
بدل ما بياخُد بـ يدفع
لكل اللي داخل يزور
وياريت شفع
وقت الوجع
كل الحبايب والوطن ويّه الصحاب
اللي قلبي مسجّلهم ديماً حضور
إلتَقْيتني عندهُهم مكتوب غياب
كل دول بُهتان وزور
هيفيد بـ إيه
تغرس بذور فـ أرض بور
ياضريح فـ ريح
عاتيه بتقلّع فـ طوبك
إيه اللي باقي بس منّك
غير يادوبك
حيطه مايله أيله برضو للسقوط
ليه رغم قُدره
غيرنا يحتجنا نفوت ؟!
ليه وقت حق
تملّي نختار السكوت ؟!
طب ليه بـ نهدم
ونبني تاني اللي اتهدم
دي الوقت بس
فهمت ليه
الله قد خلق النَّدم
مطروفه ياعين النهار من ليل غطيس
فـ مابتشوفيش كل اللي زيّي
وهُمّا فـ قلب المطحنة
انا صوتي ملّ الدندنه
تلاتين سنة
والمخدّه كل ليلة فـ حُضني تسأل
لسّه أعزب
ابتدي اَضحك فـ سرّي
واقول لها لو عالمرتّب
مايساويش للتين فـ شقّه مفروشه
الكبت حاجه فـ النهايه
بتودي سِكة إنحراف
لو ما انتهاش
بـ فرحه وبنت فـ الكوشه
ضَهري اتحنى والشيلة أتقل من جبل
إبني اللي لسّه فـ علم غيب
قُدّامي شَيفُه بيتقتل
بـ رصاص بيُخرُج من فشل
نِزْلِت دموعي تغسّلُه
دا انا كُنت عشمان تبقى سَنَدي
وقت عضمي ما يبقى منحول من كِبَر
أه يا وسطي اللي اِتكَسَر
واقف لوحدي فـ العزا
بـ اَعزّي نفسي
وعملت من حُزني الصفوف
عمّال استّف فـ الأماني
فوق رفوف الخوف واشوف
ضحكة من شمس الأمل
يادوب تنوّر سكتي بـ ضيّ شمعه
مَدِّيْت كفوفي فوق خدود حبي الوحيد
ومسحت دَمعه
أتريها بـ تمهّد لغيث
غرّقلي روحي بالدموع
يادي الضلوع
الغاوية عزف من انين على سنين
ضايعه من عمري هَدر
مقسومه روحي لـ نُسختين
نُسخَه حَبّت
نُسخَه كِرْهِت
نُسخَه قِدْرِت
نُسخَه عِجْزِت
نُسخَه حسّه بـ الأمان
نُسخَه بتعاني الخطر
نُسخَه عشمانه فـ نجاح
ونُسخَه مكسورة جناح
وانا لسّه بينهم روحي زي
خيط مشدود من ناحيتين
يا هل ترى يا حبيبتي حاسّه
بنفس إحساس الألم
يوم ما افترقنا مـ الزمن
صَلَب الحنين على جزع من حُزن وشجن
كفكفلي وشّي بـ أسوه من إيدُه الحديد
قُدّام عينيا
حُبنا بينده عليا
عشان خلاص
هيتقطع منُّه الوريد
فـ اتصفّى شوقِك وابتدا قلبِك يسيب
وانا كنت سادد النزيف
فـَ فضلّي شوقي بس أنا عنِّك بعيد
فكراني لسّه
واللا طويتِ صفحتي وكتبتِ فـ الصفحة الجديدة
إسم تاني يعوضِك عن إسم بائس
أشهد بإنّي كنت فارس
وَحدي أعزل فـ الميدان
وبدون جواد
ماقِدِرش عَزمي اللي انطلق
يهتف بـ حُبِّك
يفلت من ضرب الرصاص
أو يقطع كل الصوابع
الغاوية الدوس عـ الزناد
بـ تِغلِب الكُترة الشجاعة دا الأكيد
فـ الطبيعي عَزمي في وَسَط الميدان يموت شهيد
والحرب مالهاش قلب يرحم من خُسارة
وانا بـ الهزيمة بـ اعترف
خِسِرت لكن يكفي إنّي مش جبان
خِسِرت وخسارتي بـ شَرَف
#ذِكر_ما_لا_يُقال | |
|
